‘Paano Ako Makabantala?’

Sa bilog nga kalibutan, madamo nga kauturan ang padayon nga nagapakigbahin sa pagbantala bisan may malala sila nga balatian. Ang isa sa ila amo si Dalia nga nagaistar sa Vilnius, ang kapital sang Lithuania.

Si Dalia isa ka sister nga mga treintahon ang edad. Natawo sia nga may cerebral apoplexy. Bangod sini, paralisado sia kag nabudlayan maghambal. Gani, ang iya lang pamilya ang makaintiende kon maghambal sia. Ang iya iloy nga si Galina amo ang iya upod sa balay kag ang nagaatipan sa iya. Bisan pa nabudlayan si Dalia kag madamo sing problema, positibo gihapon sia. Ngaa?

Si Galina nagpaathag: “Sang 1999, nagkadto sa amon ang akon pakaisa nga si Apolonija nga isa sa mga Saksi ni Jehova. Natalupangdan namon nga madamo sia sing nahibaluan sa Biblia, gani pirme sia ginapamangkot ni Dalia. Wala madugay, gintudluan niya sa Biblia si Dalia. Kon kaisa, nagaupod ako sa ila pagtuon para ipaathag ang ginahambal ni Dalia. Natalupangdan ko nga nakabulig gid sa iya ang ila pagtuon, gani nagpa-Bible study man ako.”

Samtang nagadugang ang ihibalo ni Dalia sa kamatuoran, may isa ka butang sia nga ginapaligban. Ginpamangkot niya ini kay Apolonija: “Paano makabantala ang paralisado nga pareho ko?” (Mat. 28:19, 20) Ginpasalig sia ni Apolonija: “Indi ka magkabalaka kay buligan ka ni Jehova.” Kag ginbuligan gid sia ni Jehova.

Kon amo, paano nagabantala si Dalia? Ginahimo niya ini sa lainlain nga paagi. Ginabuligan sia sang mga sister nga maghimo sing sulat parte sa mensahe sang Biblia. Ginahambal ni Dalia ang iya mensahe sa mga sister kag amo ini ang ila ginabutang sa iya sulat. Nagapanaksi man sia paagi sa text. Kag kon maayo ang tiempo, ginadala sia sang mga kauturan sa parke ukon sa mga kalye para makapanaksi.

Padayon nga nag-uswag sa espirituwal si Dalia kag ang iya iloy. Nagdedikar sila kay Jehova kag nagpabawtismo sang Nobiembre 2004. Sang Septiembre 2008, ginporma ang grupo sang mga nagahambal sing Polaco sa Vilnius. Nagakinahanglan sila sing dugang nga manugbantala, gani nagbuylog sa ila si Dalia kag ang iya iloy. Si Dalia nagsiling: “May mga bulan nga nagakabalaka ako kay wala pa ako makagua. Pero pagkatapos ko pangamuyo kay Jehova, may nagaistorya dayon sa akon nga maupdanay kami sa pagbantala.” Ano ang pagtamod ni Dalia sa iya sitwasyon? Nagsiling sia: “Bangod sa balatian, paralisado ang akon lawas, pero indi paralisado ang akon hunahuna. Nalipay gid ako nga isugid sa iban ang parte kay Jehova!”