Iluga ang Pagkamabinantayon ni Jesus
Iluga ang Pagkamabinantayon ni Jesus
“Magpadayon kamo sa pagbantay kag magpangamuyo.” —MAT. 26:41.
ANO ANG IMO SABAT?
Paano mapakita sang aton pangamuyo nga nagabantay kita?
Sa anong mga paagi nga mapakita naton nga mabinantayon kita parte sa aton pagbantala?
Ngaa importante nga magmabinantayon kita kon may mga pagtilaw, kag paano naton ini mahimo?
1, 2. (a) Ano ang mga pamangkot parte sa pagkamabinantayon ni Jesus? (b) Makabulig gid bala sa makasasala nga mga tawo ang himpit nga halimbawa ni Jesus? Iilustrar.
MAHIMO mamangkot ka: ‘Posible gid bala mailog ang pagkamabinantayon ni Jesus? Himpit sia kag may mga tion nga mahibaluan pa gani niya sing abanse ang palaabuton bisan linibo pa ka tuig ini matabo! Kinahanglan pa bala niya nga magmabinantayon?’ (Mat. 24:37-39; Heb. 4:15) Binagbinagon anay naton ining mga pamangkot agod mahangpan naton kon daw ano ka importante ini nga topiko.
2 Makabulig bala sa makasasala nga mga tawo ang isa ka himpit nga halimbawa? Huo, bangod makatuon kita sa halimbawa sang isa ka maayo nga instruktor. Imadyina ang isa ka tawo nga nagatuon pa lang sa pagpana. Sa primero, indi niya maigo ang target, apang nagatuon gihapon sia kag nagatinguha. Agod magtanda, ginatun-an niya sing maayo ang halimbawa sang iya instruktor, nga eksperto sa pagpana. Ginaobserbahan niya sing maayo ang pagkapot sang pana kag ang posisyon sang tiil kag kamot sini. Amat-amat nga matun-an niya kon daw ano kakusog ang pag-unat sini; ginaobserbahan niya ang direksion kag kabaskog sang hangin, kag pirme sia nagapraktis. Paagi sa pag-ilog sang iya instruktor, amat-amat nga magatanda sia sa pagpana. Sing kaanggid, ginatinguhaan naton nga mag-uswag subong mga Cristiano paagi sa pagsunod sang mga instruksion ni Jesus kag pag-ilog sang iya himpit nga halimbawa.
3. (a) Paano ginpakita ni Jesus nga dapat sia magmabinantayon? (b) Ano ang binagbinagon naton sa sini nga artikulo?
3 Apang kamusta ang pagkamabinantayon? Kinahanglan gid bala ni Jesus ini nga kinaiya? Huo. Halimbawa, sang katapusan nga gab-i sang iya kabuhi subong tawo, ginpalig-on niya ang iya matutom nga mga apostoles: “Padayon nga magbantay upod sa akon.” Sia nagdugang: “Magpadayon kamo sa pagbantay kag magpangamuyo sing padayon, agod indi kamo masulay.” (Mat. 26:38, 41) Bisan pa pirme sia mabinantayon, luyag niya nga sa sining mabudlay nga tinion, labi pa gid sia nga mangin mabinantayon kag suod sa iya langitnon nga Amay. Nahibaluan niya nga kinahanglan nga magmabinantayon man ang iya mga sumulunod, indi lang sadto kundi tubtob sa palaabuton. Gani binagbinagon naton kon ngaa luyag ni Jesus nga magmabinantayon kita. Pagkatapos, usisaon naton ang tatlo ka paagi nga mailog naton sa aton matag-adlaw nga pagkabuhi ang iya pagkamabinantayon.
KON NGAA LUYAG NI JESUS NGA MAGMABINANTAYON KITA
4. Ano ang kaangtanan sang wala naton nahibaluan parte sa palaabuton sa aton pagkamabinantayon?
4 Luyag ni Jesus nga magmabinantayon kita bangod bisan pa madamo ang aton nahibaluan parte sa palaabuton, may mga butang kita nga wala mahibaluan. Sang si Jesus yari sa duta, nahibaluan bala niya ang tanan nga matabo? Wala, kay mapainubuson niya nga ginbaton: “Tuhoy sa amo nga adlaw kag oras wala sing nakahibalo, bisan pa ang mga anghel sa langit ukon ang Anak, kundi ang Amay lamang.” (Mat. 24:36) Sadto, ang “Anak” nga si Jesus wala makahibalo kon san-o gid ang katapusan sining malaut nga kalibutan. Kamusta kita subong? Limitado man bala ang aton nahibaluan parte sa palaabuton? Huo. Wala kita makahibalo kon san-o ipadala ni Jehova ang iya Anak sa paglaglag sining malaut nga sistema sang mga butang. Kon nahibaluan na naton, magabantay pa ayhan kita? Subong sang ginpaathag ni Jesus, ang katapusan magaabot sing hinali nga wala ginapaabot, gani dapat kita mangin mabinantayon.—Basaha ang Mateo 24:43.
5, 6. (a) Ano ang epekto sa aton pagkamabinantayon sang aton ihibalo parte sa palaabuton kag sa mga katuyuan sang Dios? (b) Ngaa ang aton ihibalo parte kay Satanas nagapahulag sa aton nga mangin determinado pa gid nga magmabinantayon?
5 Sa pihak nga bahin, madamo nga butang ang nahibaluan ni Jesus parte sa palaabuton, mga kamatuoran nga wala mahibaluan sang kalabanan sadto. Indi naton matupungan ang ihibalo ni Jesus, apang bangod sa iya, madamo kita sing nahibaluan parte sa Ginharian sang Dios kag sa himuon sini sa palaabuton. Maobserbahan naton nga ang kalabanan sa aton palibot, sa eskwelahan man, trabaho, ukon sa teritoryo, wala gid sing hinalung-ong sa sining tumalagsahon nga mga kamatuoran. Indi bala isa pa ini ka rason nga dapat kita magmabinantayon? Kaangay ni Jesus, dapat kita mangin alisto pirme, nga nagahingalit sang mga kahigayunan nga mapaambit ang aton nahibaluan parte sa Ginharian sang Dios. Hamili ang tagsa ka kahigayunan kag indi naton luyag uyangan ini kay nataya diri ang kabuhi!—1 Tim. 4:16.
6 May nahibaluan pa si Jesus nga nakabulig sa iya nga mangin mabinantayon. Nahibaluan niya nga determinado si Satanas nga sulayon, hingabuton, kag gub-on ang iya integridad. Ining mapintas nga kaaway pirme nagabantay sang “kahigayunan” nga masulay sia. (Luc. 4:13) Wala gid magkompiansa si Jesus. Luyag niya nga mangin handa sa bisan ano nga pagtilaw, pagsulay man ini, pagpamatok, ukon paghingabot. Indi bala nga amo man kita sini? Nahibaluan naton nga si Satanas kaangay “sang nagangurob nga leon, nga nagapangita sing matukob.” Gani, ang Biblia nagapalig-on sa tanan nga Cristiano: “Hupti ang inyo kaligdong, mangin mabinantayon.” (1 Ped. 5:8) Apang paano naton ini mahimo?
KON PAANO MAGMABINANTAYON PARTE SA PANGAMUYO
7, 8. Ano ang laygay ni Jesus parte sa pangamuyo, kag ano nga halimbawa ang iya ginpahamtang?
7 Ginapakita sang Biblia ang daku nga kaangtanan sang pagkaalisto ukon pagkamabinantayon kag sang pangamuyo. (Col. 4:2; 1 Ped. 4:7) Wala madugay sa tapos nga ginpangabay ni Jesus ang iya mga disipulo nga magbantay upod sa iya, sia nagsiling: “Magpadayon kamo sa pagbantay kag magpangamuyo sing padayon, agod indi kamo masulay.” (Mat. 26:41) Ini bala nga laygay para lamang sa mabudlay nga sitwasyon nga ila ginaatubang sadto? Indi. Isa ini ka prinsipio nga dapat naton sundon adlaw-adlaw.
8 Si Jesus isa gid ka himpit nga halimbawa parte sa pangamuyo. Mahimo madumduman mo nga may bes nga nangamuyo sia sing bug-os nga gab-i sa iya Amay. Handurawon naton ang kahimtangan. (Basaha ang Lucas 6:12, 13.) Natabo ini sang tigpamulak, mahimo malapit sa siudad sang Capernaum. Sang manugsirom na, nagtaklad sia sa isa sa mga bukid diin lantawon ang Dagat sang Galilea. Samtang ginatan-aw niya ang nagadulom nga palibot, mahimo nga nakita niya ang nagaigpat-igpat nga mga suga sa Capernaum kag sa kaingod nga mga lugar. Apang sang nagapangamuyo na sia kay Jehova, nagpokus gid sia sa iya pangamuyo. Nagligad ang mga minutos kag inoras. Wala niya matalupangdi ang amat-amat nga pagkapalong sang mga suga sa ubos ukon ang pagdilag sang bulan sa kahawaan ukon ang kalas sang mga sapat. Mahimo nga ginapangamuyo niya ang daku nga desisyon nga iya himuon, ang pagpili sang iya 12 ka apostoles. Mahanduraw naton sia nga nagasugid sa iya Amay sang iya mga panghunahuna kag mga kabalaka parte sa tagsa niya ka disipulo samtang hanuot sia nga nagapangabay sang panuytoy kag kaalam.
9. Ano ang aton matun-an sa pagpangamuyo ni Jesus sing bug-os nga gab-i?
9 Ano ang matun-an naton kay Jesus? Mangamuyo man bala kita sing inoras? Indi, kay nagsiling sia parte sa iya mga sumulunod: “Sa pagkamatuod, ang espiritu handa, apang ang unod maluya.” (Mat. 26:41) Pero, mailog naton si Jesus. Halimbawa, nagapalapit bala kita anay sa aton langitnon nga Amay antes kita maghimo sang desisyon nga makaapektar sa espirituwalidad sang aton pamilya, sang mga kauturan, kag naton mismo? Ginalakip bala naton sa pangamuyo ang aton mga kauturan? Nagapangamuyo bala kita sing tinagipusuon ukon ginasulitsulit lang ini? Talupangda nga importante gid kay Jesus ang pagpakighambal sing pribado sa iya Amay. Apang, bangod sang aton kasakuon subong, mahimo nga nagakalipatan na naton ang mas importante nga mga butang. Kon hatagan naton sing bastante nga tion ang aton pribado nga pangamuyo mangin mas alisto kita sa espirituwal. (Mat. 6:6, 7) Mangin suod kita kay Jehova, kay luyag naton pabakuron ang aton kaangtanan sa iya kag likawan ang bisan ano nga makapaluya sini.—Sal. 25:14.
KON PAANO MAGMABINANTAYON SA PAGBANTALA
10. Ano nga halimbawa ang nagapakita nga alisto si Jesus sa mga kahigayunan nga makapanaksi?
10 Mabinantayon si Jesus sa hilikuton nga ginhatag ni Jehova sa iya. Ayhan may mga obra nga puede mo himuon bisan nagalagaw ang imo pensar. Pero may obra nga nagakinahanglan sing pagkaalisto kag pagkonsentrar kag nalakip sa sini ang pagbantala. Alisto si Jesus sa iya hilikuton kay mabinantayon sia sa mga kahigayunan nga mapaambit ang maayong balita. Halimbawa, pag-abot nila sa Sicar pagkatapos sang taguri nga paglakbay, nagbakal sing pagkaon ang iya mga disipulo. Nagpahuway si Jesus sa tupad sang bubon, apang alisto gihapon sia kag nakakita sia sing kahigayunan nga makapanaksi. May Samaritana nga nagsag-ub. Mahimo kuntani nga nagpiyongpiyong na lang si Jesus. Puede gid nga indi niya pag-istoryahon ang babayi pero ginpanaksihan niya ini kag daku ang epekto sini sa mga tawo sa sina nga siudad. (Juan 4:4-26, 39-42) Mailog bala naton ang pagkamabinantayon ni Jesus, ayhan paagi sa pagtinguha nga mangin alisto pa gid sa kahigayunan nga makapanaksi sa mga tawo nga masumalang naton sa adlaw-adlaw?
11, 12. (a) Ano ang reaksion ni Jesus sa mga nagapugong sa iya sa pagtuman sang iya hilikuton? (b) Paano ginpakita ni Jesus ang pagkabalanse sa iya hilikuton?
11 Kon kaisa maayo man ang motibo sang mga tawo nga nagapugong kay Jesus sa pagtuman sang iya hilikuton. Sa Capernaum, nanamian gid ang mga tawo sa pagpang-ayo ni Jesus gani luyag nila nga didto na lang sia. Maintiendihan naton sila. Pero, ang misyon ni Jesus amo ang pagbantala sa tanan nga “nadula nga mga karnero sang panimalay sang Israel,” kag indi lamang sa isa ka siudad. (Mat. 15:24) Gani, nagsiling sia: “Sa iban man nga mga siudad dapat ko ibantala ang maayong balita sang ginharian sang Dios, kay tungod sini ginpadala ako.” (Luc. 4:40-44) Maathag nga nakapokus si Jesus sa iya ministeryo. Wala niya gintugutan nga may makaupang sa iya.
12 Buot bala silingon nga panatiko ukon ermitanyo si Jesus? Puro na lang bala sia bantala amo nga wala na niya matalupangdan ang praktikal nga kinahanglanon sang mga tawo? Indi. Si Jesus himpit gid nga halimbawa sang pagkabalanse. Nanamian sia makig-upod sa iya mga abyan. Importante sa iya ang mga pamilya kag nagapakita sia sang matuod nga empatiya sa ila kinahanglanon kag mga problema. Palangga man niya ang mga bata.—Basaha ang Marcos 10:13-16.
13. Paano naton mailog ang pagkamabinantayon kag pagkabalanse ni Jesus kon parte sa aton pagbantala?
13 Samtang ginailog naton ang pagkamabinantayon ni Jesus, mailog man bala naton ang iya pagkabalanse? Wala naton ginatugutan nga upangan kita sang kalibutan sa aton hilikuton. Mahimo nga maayo man ang motibo sang aton mga abyan kag mga paryente nga nagasiling nga magpangabuhi kita sing normal ukon haganhaganon lang ang pagbantala. Apang, kon ginailog naton si Jesus, kabigon naton subong sang pagkaon ang aton ministeryo. (Juan 4:34) Ang aton hilikuton nagapahalipay kag nagapabakod sa aton sa espirituwal. Pero, indi kita mga panatiko ukon ermitanyo kag wala man kita nagapakamatarong sang aton kaugalingon. Pareho ni Jesus, gusto naton nga mangin malipayon kag balanse nga mga alagad sang “malipayon nga Dios.”—1 Tim. 1:11.
KON PAANO MAGMABINANTAYON SA TION SANG MGA PAGTILAW
14. Kon may mga pagtilaw, ano nga huyog ang dapat naton likawan, kag ngaa?
14 Ang pila sa sugo ni Jesus nga dapat magpadayon gid sa pagbantay ginhambal niya sang ara sia sa pinakamabudlay nga pagtilaw. (Basaha ang Marcos 14:37.) Kon may kabudlayan, dapat gid naton dumdumon ang iya halimbawa. Kon may pagtilaw, nagakalipatan sang madamo ang isa ka importante nga kamatuoran nga kaduha ginsambit sa Hulubaton: “May dalanon nga daw matarung sa tawo, apang ang iya katapusan mga dalanon sang kamatayon.” (Hulu. 14:12; 16:25) Kon magsandig lang kita sa aton kaugalingon, labi na kon may mabug-at nga mga problema, mahimo mabutang gid kita kag ang aton mga hinigugma sa katalagman.
15. Ano nga pagsulay ang mahimo maatubang sang ulo sang pamilya kon pigado ang ila kahimtangan?
15 Halimbawa, ang ulo sang pamilya mahimo mabudlayan sa pagsagod “sa mga natungod sa iya.” (1 Tim. 5:8) Mahimo masulay sia nga batunon ang trabaho bisan indi sia pirme makatambong sa Cristianong mga miting, makapanguna sa pangpamilya nga pagsimba, ukon makabantala. Sa pagtamod sang tawo, daw wala man sing malain sa sini. Apang mahimo ini magresulta sa pagbalatian ukon kamatayon sa espirituwal. Maayo gid nga sundon ang laygay sang Hulubaton 3:5, 6! Si Solomon nagsiling: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.”
16. (a) Ano nga halimbawa ang ginpahamtang ni Jesus sa pagsalig sa kaalam ni Jehova sangsa iya kaugalingon? (b) Paano ginailog sang mga ulo sang pamilya ang halimbawa ni Jesus sa pagsalig kay Jehova sa tion sang mga kabudlayan?
16 Sang ginatilawan si Jesus, wala gid sia magsalig sa iya kaugalingon nga paghangop. Hunahunaa ini! Ang pinakamaalam nga tawo nga nagkabuhi sa duta wala magsabat suno sa iya lang kaalam. Halimbawa, sang ginsulay sia ni Satanas, sulitsulit sia nga nagsabat: “Nasulat na.” (Mat. 4:4, 7, 10) Nagsalig sia sa kaalam sang iya Amay agod sikwayon ang pagsulay. Ginpakita niya ang pagkamapainubuson. Ini nga kinaiya ginakaugtan ni Satanas kag wala sa iya. Sundon man bala naton si Jesus? Ang ulo sang pamilya nga nagailog sa pagkamabinantayon ni Jesus nagapatuytoy sa Pulong sang Dios, ilabi na kon may mga pagtilaw. Ginahimo ini sang linibo ka ulo sang pamilya sa bug-os nga kalibutan. Matutom nila nga ginauna ang Ginharian sang Dios kag ang putli nga pagsimba, sangsa mga kabalaka sa materyal. Pero ginahimo nila ang ila bug-os nga masarangan agod atipanon ang ila pamilya. Ginapakamaayo gid ni Jehova ang ila mga panikasog nga maaman ang materyal nga mga kinahanglanon sang ila pamilya, subong sang Iya ginsaad.—Mat. 6:33.
17. Ano ang nagapahulag sa imo nga ilugon ang pagkamabinantayon ni Jesus?
17 Wala sing duhaduha nga si Jesus amo ang pinakamaayo nga halimbawa sa pagkamabinantayon. Ang iya halimbawa praktikal, mapuslanon, kag makaluwas sang kabuhi. Dumduma, nagaharahara gid si Satanas nga patulugon ka sa espirituwal—paluyahon ang imo pagtuo, pabuyanbuyanan mo ang imo pagsimba, kag ikompromiso ang imo integridad. (1 Tes. 5:6) Indi gid magpadaug sa iya! Magpabilin nga mabinantayon pareho ni Jesus. Magmabinantayon sa pangamuyo, sa pagbantala, kag sa pag-atubang sang mga pagtilaw. Kon himuon mo ini, mangin mapuslanon kag malipayon ang imo kabuhi bisan subong nga ara na kita sa bibi sang nagatagumatayon nga sistema sang mga butang. Ang pagkamabinantayon magapasalig man sa imo nga kon mag-abot ang imo Agalon para tapuson ining sistema, masapwan ka niya nga alisto kag nagahimo sang kabubut-on sang iya Amay. Malipay gid si Jehova sa pagpadya sa imo bangod sang imo katutom!—Bug. 16:15.
[Mga Pamangkot sa Pagtinuon]
[Retrato sa pahina 6]
Si Jesus nagpanaksi sa babayi sa bubon. Ano nga mga kahigayunan ang imo ginahingalitan para makapanaksi kada adlaw?
[Retrato sa pahina 7]
Ang pag-atipan sang espirituwalidad sang imo pamilya nagapakita nga mabinantayon ka
