Pirme Magbatyag sing Pagkahilingagawon
Pirme Magbatyag sing Pagkahilingagawon
“Ibantala ang pulong, mangin masako sa sini.”—2 TIM. 4:2.
MAPAATHAG MO BALA?
Ngaa hilingagawon gid ang pagbantala sang unang siglo?
Ano ang aton himuon agod indi madula ang aton pagbatyag sing pagkahilingagawon?
Ngaa mas hilingagawon ang pagbantala sang Ginharian subong?
1, 2. Ano nga mga pamangkot ang nag-utwas parte sa sugo nga ‘mangin masako sa pagbantala’?
ANG mga tawo nga ang obra amo ang pagluwas sang kabuhi nakahibalo nga ang ila obra hilingagawon gid. Halimbawa, nagataripad ang mga bombero kon may sunog, kay nakahibalo sila nga basi may kabuhi nga yara sa katalagman.
2 Subong mga Saksi ni Jehova, nagalaum kita nga maluwas ang mga tawo nga aton ginabuligan. Gani, ginaserioso gid naton ang sugo sa aton nga ibantala ang maayong balita sang Ginharian. Pero bisan pa hilingagawon ini, wala kita nagataripad. Kon amo, ano ang buot silingon ni apostol Pablo sang nagsugo sia: “Ibantala ang pulong, mangin masako sa sini”? (2 Tim. 4:2) Paano kita makabantala nga may pagkahilingagawon? Ngaa hilingagawon gid ini?
NGAA HILINGAGAWON ANG ATON PAGBANTALA?
3. Ano ang resulta kon batunon ukon kon sikwayon sang mga tawo ang mensahe sang Ginharian?
3 Kon binagbinagon mo nga ang kaluwasan ukon kalaglagan sang mga tawo nasandig sa aton pagbantala, mahimo mabatyagan mo nga hilingagawon gid nga masugiran mo sila tuhoy sa maayong balita. (Roma 10:13, 14) Ang Pulong sang Dios nagasiling: “Bisan magsiling ako sa malauton, ‘Sa pagkamatuud, mapatay ka,’ apang kon sia magbiya sa iya sala kag maghimo sono sa kasogoan kag katadlongan, . . . sa pagkamatuud magakabuhi sia, indi sia mapatay. Wala gid sing dumdumon batok sa iya sang iya mga sala nga nahimo niya.” (Eze. 33:14-16) Sa pagkamatuod, ang Biblia nagasiling parte sa nagatudlo sang mensahe sang Ginharian: “Maluwas mo ang imo kaugalingon kag ang mga nagapamati sa imo.”—1 Tim. 4:16; Eze. 3:17-21.
4. Sang maggua ang mga apostata, ngaa nangin hilingagawon pa gid ang pagbantala sang unang siglo?
4 Agod mahangpan kon ngaa ginpalig-on ni Pablo si Timoteo nga magbantala sing may pagkahilingagawon, binagbinaga ang konteksto sang aton tema nga teksto. Mabasa naton: “Ibantala ang pulong, mangin masako sa sini sa maayo nga panag-on, sa magamo nga panag-on, magsabdong, magsaway, maglaygay, nga may bug-os nga pagkamapinasensiahon kag kalantip sa pagpanudlo. Kay magaabot ang isa ka hut-ong sang tion nga indi sila magbatas sa makapapagros nga panudlo, kundi, suno sa ila kaugalingon nga mga kailigbon, magatipon sila sang mga manunudlo para sa ila kaugalingon agod pakalamon ang ila mga dulunggan; kag ipalayo nila ang ila mga dulunggan sa kamatuoran.” (2 Tim. 4:2-4) Gintagna ni Jesus nga may magagua nga mga apostata. (Mat. 13:24, 25, 38) Samtang nagahilapit ini, hilingagawon para kay Timoteo nga “ibantala ang pulong” bisan sa sulod sang kongregasyon agod indi madaya ang mga Cristiano sang ganyat sang butig nga panudlo. Yara sa katalagman ang kabuhi. Kamusta naman subong?
5, 6. Anong popular nga mga panudlo ang masumalang naton sa ministeryo?
5 Ang apostasya sa matuod nga pagsimba nagtubo kag naglapnag na subong. (2 Tes. 2:3, 8) Ano nga mga panudlo ang nagapakalam sa dulunggan sang mga tawo? Sa madamo nga lugar, ang panudlo parte sa ebolusyon ginasakdag gid. Bisan pa ang ebolusyon ginapaathag paagi sa mga termino sang siensia, halos nangin relihion na ini, nga nagaapektar sa pagtamod sang mga tawo sa Dios kag sa iban. Popular man ang panudlo nga wala nagaulikid ang Dios sa aton, gani dapat balewalaon man naton sia. Ngaa minilyon gid ang naganyat sa sini nga mga panudlo amo nga nagakatulugan sila sa espirituwal? Nagapahangop ini nga, ‘Mahimo mo ang tanan nga gusto mo kay indi ka man manabat.’ Ini gid ang mensahe nga nagapakalam sang mga dulunggan sang madamo.—Basaha ang Salmo 10:4.
6 Apang may iban pa nga paagi nga nagapakalam sang mga dulunggan nila. Ang pila ka nagasimba naluyag gihapon nga silingan sila sang ila mga manunudlo, ‘Bisan ano man ang imo himuon, palangga ka gihapon sang Dios.’ Ginapakalam sang mga pari kag mga pastor ang dulunggan sang iban paagi sa pagpapati sa ila nga ang mga seremonya, Misa, piesta, kag mga imahen may pagpakamaayo sang Dios. Wala gid sila sing hinalung-ong nga yara sila sa katalagman. (Sal. 115:4-8) Pero kon mapukaw naton sila sa espirituwal paagi sa pagpaathag sa ila sang matuod nga mensahe sang Biblia, makabenepisyo sila sa Ginharian sang Dios.
ANO ANG KAHULUGAN SANG PAGKAHILINGAGAWON SA PAGBANTALA?
7. Paano naton mapakita ang pagkahilingagawon?
7 Ang isa ka maayo nga manug-opera nagapokus gid sa iya ginaoperahan bangod kabuhi ang nadalahig. Sa aton pagministeryo, mapakita man naton ang pagbatyag sing pagkahilingagawon paagi sa pagkonsentrar sa aton ginahimo, subong sang pagpamensar sa kon ano nga topiko, pamangkot, kag impormasyon ang makapainteres sa tagbalay. Mahimo man naton ma-adjust ang aton iskedyul agod makadtuan naton ang mga tawo sa mga tion nga kombeniente sila.—Roma 1:15, 16; 1 Tim. 4:16.
8. Ano sa masami ang nadalahig sa pagbatyag sing pagkahilingagawon?
8 Nadalahig man sa pagbatyag sing pagkahilingagawon ang pagpahamtang sang mga prioridad. (Basaha ang Genesis 19:15.) Halimbawa, ibutang ta nga kuhaon mo ang resulta sang imo pagpakonsulta, kag gintawag ka sang doktor sa iya klinika kag ginsilingan: “Delikado na ang imo kahimtangan. Isa ka na lang ka bulan kon indi ka magpabulong.” Ayhan indi ka man magtaripad pagua sa iya klinika pareho sa bombero kon may sunog. Pero mahimo nga pamatian mo ang iya mga panugda, mapauli, kag pamensaron kon ano ang dapat mo unahon.
9. Ngaa makasiling kita nga nangin hilingagawon para kay Pablo ang iya pagbantala sa Efeso?
9 May matun-an kita sa pagbatyag ni Pablo sang pagkahilingagawon kon talupangdon naton ang iya ginsiling sa mga gulang sa Efeso parte sa iya pagbantala sang maayong balita sa distrito sang Asia. (Basaha ang Binuhatan 20:18-21.) Mahimo nga sugod sang nag-abot sia, nangin masako sia sa pagpamalaybalay sang maayong balita. Dugang pa, sa sulod sang duha ka tuig, regular nga “nagpamulongpulong sia adlaw-adlaw sa awditoryum sang eskwelahan ni Tirano.” (Binu. 19:1, 8-10) Maathag nga makita sa iya rutina ang iya pagbatyag sing pagkahilingagawon. Ang laygay nga ‘mangin masako sa aton pagbantala’ wala nagakahulugan nga mangin kabug-atan ini sa aton. Kundi, ginapakita sini nga dapat naton ini unahon.
10. Ngaa nagapasalamat kita nga sang nagligad nga 100 ka tuig, nagbatyag sing pagkahilingagawon ang mga Cristiano?
10 Ang halimbawa sang diutay nga grupo sang Estudyante sang Biblia nga nagtinguha nga mabantala ang maayong balita antes sang 1914, nagpakita sang kahulugan sang pagbatyag sing pagkahilingagawon. Bisan pa nga pila lang sila ka libo, narealisar nila ang pagkahilingagawon sang tion kag mapagsik nga nagbantala. Ginbalhag nila ang ila mga sermon sa masobra 2,000 ka pamantalaan kag nagpagua sang de-kolor nga mga slide show kag pelikula nga “Photo-Drama of Creation.” Gani, minilyon ang napalab-utan sang maayong balita. Kon wala sila nagbatyag sing pagkahilingagawon, mahimo nga ang iban sa aton wala makabati sang mensahe sang Ginharian.—Basaha ang Salmo 119:60.
MAG-ANDAM NGA INDI MO MADULA ANG PAGBATYAG SING PAGKAHILINGAGAWON
11. Ngaa nadula sang iban ang ila pagbatyag sing pagkahilingagawon?
11 Bangod sa mga tublag, mahimo nga mabalewala sang isa ang pagkaimportante sang pagbantala. Ang sistema ni Satanas gindesinyo para mangin masako kita sa paghimakas kag sa witiwiti nga mga butang. (1 Ped. 5:8; 1 Juan 2:15-17) Nadula sang iban nga nag-una sadto sang pag-alagad kay Jehova ang ila pagbatyag sing pagkahilingagawon. Halimbawa, ang Cristiano sang unang siglo nga si Demas isa ka “masigkamanugpangabudlay” ni Pablo, apang nawili si Demas sa di-diosnon nga sistema sang mga butang. Sa baylo nga padayon nga unahon ang pagpalig-on sa mga kauturan sa tion sang kabudlayan, ginbiyaan niya si Pablo.—Filem. 23, 24; 2 Tim. 4:10.
12. Ano nga kahigayunan ang bukas sa aton subong, kag ano naman nga kahigayunan ang matigayon naton tubtob san-o?
12 Para indi madula ang aton pagbatyag sing pagkahilingagawon, dapat naton batuan ang huyog nga himuslan ang tanan nga kahigayunan sa pagpangalipay. Tinguhaan naton nga ‘makapanguyapot sing malig-on sa matuod nga kabuhi.’ (1 Tim. 6:18, 19) Ayhan kumbinsido ka gid nga sa paggahom sang Ginharian sang Dios, ang tanan nga makalilipay nga hilikuton nga mapensaran mo, mahimo mo na didto tubtob san-o. Apang subong, kahigayunan naton nga buligan ang iban nga makaluwas sa Armagedon.
13. Bangod mga Cristiano na kita, ano ang aton himuon agod indi madula ang aton pagbatyag sing pagkahilingagawon?
13 Ibutang ta nga ang kalabanan sa kalibutan nagakatulog sa espirituwal, gani ano ang makabulig sa aton nga indi madula ang aton pagbatyag sing pagkahilingagawon? Dumdumon naton nga sadto daw nagatulog man kita sa kadudulman. Pero, ginpabugtaw kita, kag si Cristo nagsilak sa aton, subong sang ginsiling ni Pablo. Gani, may pribilehiyo na kita nga magdala sing kapawa. (Basaha ang Efeso 5:14.) Nagsulat pa gid si Pablo: “Padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo, nga ginabakal ang nagakaigo nga tion para sa inyo kaugalingon, bangod ang mga adlaw malaut.” (Efe. 5:15, 16) Sa tunga sining kalautan, ‘baklon naton ang tion’ para sa mga hilikuton nga makabulig sa aton nga magpabilin nga nagabugtaw.
NAGAKABUHI KITA SA IMPORTANTE GID NGA MGA ADLAW
14-16. Ngaa mas hilingagawon ang pagbantala sang Ginharian subong?
14 Halin sadto, hilingagawon gid ang aton pagministeryo, apang mas hilingagawon ini subong. Sugod sang 1914, ang kabilugan nga tanda nga ginsambit sa Biblia nangin maathag. (Mat. 24:3-51) Ang kaluwasan sang katawhan yara gid sa katalagman. Sa pihak sang mga kasugtanan, ang dalagku nga mga pungsod may nahanda gihapon nga mga 2,000 ka nuklear nga hinganiban. May ginareport pa gani nga ginatos ka nuklear nga mga materyal ang “nadula.” Yara ayhan ini sa mga terorista? Ang mga manugpanilag nagasiling nga mahapos malaglag ang katawhan paagi sa inaway nga tuga sang mga terorista. Apang indi lang inaway ang makadula sang pagluntad sang tawo.
15 “Ang pagbag-o sang klima amo ang labing daku nga katalagman sa kapagros sang katawhan sa bug-os nga kalibutan sa ika-21 nga siglo,” siling sang 2009 nga report sang The Lancet kag University College London. Ini nagsiling: “Sa masunod nga mga dekada, ang kalabanan maapektuhan sang pagbag-o sang klima, kag mabutang sa mas daku nga katalagman ang kabuhi kag ikaayong lawas sang binilyon ka tawo.” Mahimo ini tunaan sang pagtaas sang nibel sang dagat, tigpalamangag, baha, epidemia, bagyo, kag sang inaway bangod sang kakulangan sa dunang manggad. Huo, ang mga inaway kag kalamidad posible nga makapapas sang sibilisasyon.
16 Abi sang iban ang katalagman parte sa nuklear nga mga inaway amo ang tunaan sang mga hitabo nga magadul-ong sa katumanan sang “tanda.” Apang madamo ang wala makahangop kon ano gid ang tanda. Sa sulod sang mga dekada, nakita naton ang mga hitabo nga nagapamatuod sang presensia ni Cristo kag nga nagahilapit na gid ang katapusan sini nga sistema. (Mat. 24:3) Tuman gid kadamo nga bahin sang tanda ang nagakatuman subong. Dapat na magbugtaw ang mga tawo sa espirituwal kag ang aton ministeryo makabulig sa ila.
17, 18. (a) Paano makaapektar sa aton “ang panag-on”? (b) Ano ang makapabag-o sa pagtamod sang mga tawo sa mensahe sang Ginharian?
17 Malip-ot na lang nga tion ang nabilin agod mapamatud-an naton ang aton gugma kay Jehova kag tapuson ang pagbantala nga ginsugo niya sa aton sa sining katapusan nga mga adlaw. Labi na gid nga importante subong ang ginsiling ni Pablo sa unang siglo nga mga Cristiano sa Roma: “Nahibaluan ninyo ang panag-on, nga oras na nga magbugtaw kamo gikan sa katulugon, kay ang aton kaluwasan mas malapit na karon sangsa tion nga kita nangin mga tumuluo.”—Roma 13:11.
18 Ang mga hitabo nga gintagna para sa katapusan nga mga adlaw makabulig sa mga tawo nga mahibaluan ang ila mga kinahanglanon sa espirituwal. Ang iban nangin interesado sa mensahe sang Ginharian sang ginbinagbinag nila ang kapaslawan sang gobierno sa pagsolbar sang mga problema sa ekonomiya, nuklear nga hinganiban, masingki nga krimen, ukon pagkalaglag sang palibot. Ang iban naman nangin interesado bangod sang mga hitabo sa ila pamilya, subong sang problema sa panglawas, diborsio, ukon kamatayon sang ila pinalangga. Samtang nagapakigbahin kita sa ministeryo, dapat buligan naton ini nga sahi sang mga tawo.
ANG PAGBATYAG SING PAGKAHILINGAGAWON NAGPAHULAG SA ILA
19, 20. Paano ang pagbatyag sing pagkahilingagawon nagpabag-o sang pagkabuhi sang madamo nga Cristiano?
19 Ang pagbatyag sing pagkahilingagawon nagpahulag sa madamo nga Cristiano nga dugangan ang ila tion sa ministeryo. Halimbawa, ang isa ka mag-asawa sa Ecuador nagdesisyon nga pasimplehon ang ila kabuhi sang makatambong sila sa “Hupti nga Simple ang Imo Mata” nga espesyal nga asembleya sang 2006. Ginlista nila ang mga indi nila kinahanglan, kag sa tapos sang tatlo ka bulan naghalin sila sa ila tatlo sing kuarto nga apartment kag nagsaylo sa lain nga apartment nga isa lang ang kuarto, ginbaligya ang iban nila nga gamit, kag ginbayaran ang ila mga utang. Dayon, nag-auxiliary payunir sila kag ginbaton ang panugda sang ila C.O. nga mag-alagad sa kongregasyon nga nagakinahanglan sing dugang nga manugbantala.
20 Ang isa ka brother sa Aminhan nga Amerika nagsulat: “Sang nangasembly kami nga mag-asawa sang 2006, 30 ka tuig na kami nga bawtismado. Sang nagapauli kami, gin-istoryahan namon kon paano namon maaplikar ang laygay nga pasimplehon ang kabuhi. (Mat. 6:19-22) Tatlo ang amon balay, may duta kami, mga malahalon nga salakyan, motorboat, kag salakyan nga puede maistaran. Bangod daw indi gid praktikal ang amon pagkabuhi subong mga Cristiano, namat-od kami nga himuon nga tulumuron ang bug-os tion nga pag-alagad. Gani sang 2008, nagregular payunir man kami pareho sa amon bata nga babayi. Nalipay gid kami sa pagpakig-upod sing suod sa mga kauturan. Nakaalagad man kami sa mga lugar nga nagakinahanglan sang dugang nga manugbantala. Dugang pa, nangin suod pa gid kami kay Jehova bangod mas masako kami sa hilikuton para sa iya. Makapaladya gid nga makita ang kalipay sang mga tawo kon mabatian nila kag mahangpan ang kamatuoran sang Pulong sang Dios.”
21. Ano nga ihibalo ang nagapahulag sa aton nga magbantala?
21 Nakahibalo kita nga malapit na lang matapos ining malaut nga sistema sang mga butang—ang “adlaw sang paghukom kag sang paglaglag sa di-diosnon nga mga tawo.” (2 Ped. 3:7) Ang aton ihibalo sa Pulong sang Dios nagapahulag sa aton nga magmakugi sa pagpahayag sang nagahilapit nga dakung kapipit-an kag sang bag-ong kalibutan. Kabay pa nga padayon nga mangin hilingagawon para sa aton ang pagpahayag sang matuod nga paglaum sa mga tawo. Ginapakita naton ang matuod nga gugma sa Dios kag sa aton isigkatawo kon nagapakigbahin kita sa sini sing bug-os.
[Mga Pamangkot sa Pagtinuon]
