“SA DIIN ina gamiton?” pamangkot ni George Naish, nga nagatudlo sang nahantal nga 18 metros nga mga troso sa talaguan sang mga armas sa Saskatoon, Saskatchewan, Canada. Ginsilingan sia nga ang mga troso gingamit sa pagtukod sang transmitter sa tion sang Bug-os Kalibutan nga Inaway I. “Napensaran ko dayon nga puede namon gamiton ini nga mga troso sa pagpatindog sing mga radio tower,” siling ni Brother Naish sang ulihi, “gani ang ideya parte sa pagtukod sang theocratic radio station nasugdan.” Pagligad lang sang isa ka tuig, sang 1924, nagwaragwag na sa kahanginan ang CHUC. Amo ini ang pinakauna nga estasyon sang radyo sa Canada nga nagawaragwag sang mga topiko parte sa relihion.

Ang Canada halos pareho kalapad sa Europa, gani maayo gid ini nga lugar para magpanaksi paagi sa radyo. “Bangod sa amon pagwaragwag sa radyo, ang kamatuoran nabatian sang madamo nga tawo nga indi namon masugilanon sing personal,” siling ni Florence Johnson, nga nagaobra sa estasyon sa Saskatoon. “Bangod bag-o pa lang sadto ang radyo, nanamian ang mga tawo mamati sa bisan ano nga ginawaragwag.” Sang 1926, ang mga Estudyante sang Biblia (ang pagtawag sadto sa mga Saksi ni Jehova) may ara na kaugalingon nga estasyon sang radyo sa apat ka siudad sa Canada. *

Ano ang imo mabatian kon mamati ka sa isa sa sini nga mga estasyon? Masami nga mabatian mo ang mga manug-amba halin sa lokal nga kongregasyon upod sa mga nagatokar sang mga instrumento, kag may gamay pa gani nga mga orkestra. Siempre, nagahatag man ang utod nga mga lalaki sing mga sermon kag nagadumala sing mga paghinun-anon sa Biblia. Si Amy Jones, nga nagapartisipar sa mga paghinun-anon, nagsiling: “Samtang nagabantala, nagapakilala ako sa tagbalay kag kon kaisa nagasiling sila, ‘A, huo, ikaw ’to ang nabatian ko sa radyo.’”

Ang mga Estudyante sang Biblia sa Halifax, Nova Scotia, nagdugang sang isa ka talk show diin ang mga tagpalamati makatawag sa telepono kag makapamangkot parte sa Biblia. “Epektibo gid ini nga programa,” sulat sang isa ka utod nga lalaki. “Indi namon  maarapalan sabat ang mga nagapamangkot kay tuman kadamo.”

Kaangay ni apostol Pablo, lainlain ang reaksion sa mensahe sang mga Estudyante sang Biblia. (Binu. 17:1-5) Ang iban nanamian sini. Halimbawa, sang nabatian ni Hector Marshall sa radyo ang ginsiling sang mga Estudyante sang Biblia parte sa Studies in the Scriptures, nag-order sia sing anom ka volume. “Abi ko ang mga libro makabulig sa akon pagtudlo sa Sunday school,” sulat niya sang ulihi. Pero sang natapos niya basa ang Volume I, nagdesisyon si Hector nga mahalin sa iya relihion. Nangin mapisan sia nga ebanghelisador kag nag-alagad sing matutom kay Jehova tubtob sa iya kamatayon sang 1998. Sa nasidlangan nga Nova Scotia, ginwaragwag ang pamulongpulong nga “The Kingdom, the Hope of the World.” Pagkadason nga adlaw, ginsilingan ni Koronel J. A. MacDonald ang isa ka utod nga lalaki: “Ang mga pumuluyo sang Cape Breton Island nakabati sang mensahe kahapon nga amo ang pinakamaayo nga nabatian sa sini nga bahin sang kalibutan.”

Sa pihak nga bahin, naakig gid ang mga klero. Ang pila ka Katoliko sa Halifax namahog nga palukpon ang mga estasyon nga nagawaragwag sang mga programa sang mga Estudyante sang Biblia. Sang 1928, bangod sa pagpamilit sang mga lider sang relihion, gulpi lang nga gin-anunsio sang gobierno nga indi na nila pag-aprobahan liwat ang mga lisensia sang mga estasyunan sang mga Estudyante sang Biblia. Gani, nagpanagtag ang mga utod sing naimprinta nga balasahon nga Who Owns the Air? subong protesta sa ila indi makatarunganon nga ginhimo. Bisan pa sa sini, wala gid nagpasugot ang mga opisyal sang gobierno nga aprobahan liwat ang lisensia sang mga Estudyante sang Biblia.

Nagpaluya bala ini sa gamay nga grupo sang mga alagad ni Jehova sa Canada? “Sang primero, daw pareho lang nga nagdaug ang mga kaaway,” siling ni Isabel Wainwright. “Pero nakahibalo ako nga punggan ini ni Jehova kon amo gid sini ang iya katuyuan. Ginapakita lang sini nga dapat kami mangita sing iban kag mas maayo nga pamaagi sa pagwali sang maayong balita sang Ginharian.” Sa baylo nga radyo gid lang ang saligan para makapanaksi, ang mga Estudyante sang Biblia sa Canada nagkonsentrar sa pagduaw sa mga pamalay. Pero sadto nga tion, daku gid ang nabulig sang radyo sa pagwaragwag sang ‘pinakamaayo nga balita nga nabatian.’—Halin sa amon archive sa Canada.