1, 2. Ipaathag kon ano ang ginhimo ni Jesus sa iya matutom nga mga apostoles sa tapos nila nasaulog ang Paskua sang 33 C.E.

SANG tungang gab-i sang Nisan 14 tuig 33 C.E., si Jesus kag ang iya mga kaupod nagsaulog sang Paskua. Nagpahanumdom ini sa ila kon paano gintubos sang Dios ang ila mga katigulangan sa pagkaulipon sa Egipto. Pero ang iya matutom nga mga disipulo makatigayon sing mas dalayawon nga “wala katapusan nga pagtubos.” Pagkasunod nga adlaw, ang ila wala sing sala nga Lider pagapatyon sang iya mga kaaway. Pero ining mapintas nga buhat mangin pagpakamaayo. Ang ginpatulo nga dugo ni Jesus mangin basihan sang kaluwasan sang katawhan sa sala kag kamatayon.—Heb. 9:12-14.

² Para masiguro nga indi kita malipat sa sining mahigugmaon nga aman, ginsugdan ni Jesus ang bag-o nga selebrasyon kada tuig nga magabulos sa Paskua. Ginhimo niya ini paagi sa pagtipiktipik sang tinapay nga wala sing lebadura, kag sang ginhatag niya ini sa iya 11 ka matutom nga apostoles, sia nagsiling: “Ini nagakahulugan sang akon lawas nga ihatag para sa inyo. Padayon ninyo nga himuon ini bilang pagdumdom sa akon.” Amo man sini ang iya ginhimo sa kopa sang mapula nga alak, nga nagasiling: “Ini nga kopa nagakahulugan sang bag-o nga katipan pasad sa akon dugo, nga ibubo para sa inyo.”—Luc. 22:19, 20.

3. (a) Ano ang daku nga pagbag-o pagkatapos sang kamatayon ni Jesus? (b) Ano nga mga pamangkot ang dapat naton binagbinagon parte sa pangamuyo ni Jesus nga narekord sa Juan kapitulo 17?

³ Sa indi madugay, matapos na ang daan nga Kasuguan nga katipan sa tunga sang Dios kag sang kinaugali nga mga Israelinhon. Pagabuslan ini sang bag-o nga katipan sa tunga ni Jehova kag sang hinaplas nga mga sumulunod ni Jesus. Nabalaka gid si Jesus sa kaayuhan sining bag-o nga espirituwal nga pungsod. Ang kinaugali nga Israel wala nahiusa kag nabahinbahin sa relihion, nga nagresulta sa daku nga kahuy-anan sa balaan nga ngalan sang Dios. (Juan 7:45-49; Binu. 23:6-9) Sa kabaliskaran, handum ni Jesus nga ang iya mga sumulunod magpabilin nga nahiusa  agod makapanghikot sila sing tingob sa paghimaya sa ngalan sang Dios. Gani ano ang ginhimo ni Jesus? Naghatag sia sing pinakamaayo nga pangamuyo nga mabasa sang bisan sin-o nga tawo. (Juan 17:1-26; tan-awa ang piktyur sa umpisa sini nga artikulo.) Mahimo naton mausisa ini nga pangamuyo kag mamangkot, “Ginsabat bala sang Dios ang pangamuyo ni Jesus?” Usisaon man naton ang aton kaugalingon kag mamangkot, “Nagapanghikot bala ako nahisuno sa sini?”

4, 5. (a) Ano ang aton matun-an sa umpisa sang pangamuyo ni Jesus? (b) Paano ginsabat ni Jehova ang personal nga pangabay ni Jesus?

⁴ Si Jesus nakighambal sa iya mga disipulo tubtob sa tungang gab-i parte sa bilidhon nga ihibalo gikan sa Dios. Dayon nagtangla sia kag nangamuyo: “Amay, nag-abot na ang tion; himayaa ang imo anak, agod ang imo anak magahimaya sa imo, kay ginhatagan mo sia sing awtoridad sa tanan nga unod, agod ang tanan nga ginhatag mo sa iya hatagan niya sing kabuhi nga walay katapusan. . . . Ginhimaya ko ikaw sa duta, kay natapos ko ang buluhaton nga ginhatag mo sa akon nga himuon. Gani karon, Amay, himayaa ako upod sa imo sang himaya nga yara sa akon sadto upod sa imo sang wala pa ang kalibutan.”—Juan 17:1-5.

⁵ Talupangda kon ano ang importante kay Jesus sa umpisa sang iya pangamuyo. Ang panguna niya nga ginkabalak-an amo ang paghimaya sa iya Amay sa langit, kag nahisuno ini sa una niya nga ginpangabay sa modelo nga pangamuyo: “Amay, pakabalaanon ang imo ngalan.” (Luc. 11:2) Ang masunod nga ginkabalak-an ni Jesus amo ang mga kinahanglanon sang iya mga disipulo, agod ‘mahatagan niya sila sing kabuhi nga walay katapusan.’ Pagkatapos sini, ginsambit ni Jesus ang iya personal nga pangabay nga nagasiling: “Amay, himayaa ako upod sa imo sang himaya nga yara sa akon sadto upod sa imo sang wala pa ang kalibutan.” Ginpadyaan ni Jehova ang iya matutom nga Anak sing labaw pa sangsa iya ginapangabay paagi sa paghatag kay Jesus sing “ngalan nga mas maayo gid sangsa” tanan nga anghel.—Heb. 1:4.

6. Ano ang dapat himuon sang mga apostoles para matigayon ang kabuhi nga dayon, kag paano naton nahibaluan nga nagmadinalag-on sila?

⁶ Ginpangamuyo man ni Jesus kon ano ang dapat naton himuon subong mga makasasala para matigayon ang wala sing tupong nga regalo, ang kabuhi nga walay katapusan. (Basaha ang Juan 17:3.) Nagsiling sia nga dapat kita padayon nga ‘magkuha sing ihibalo’ sa Dios kag kay Cristo. Ang isa ka paagi para mahimo ini amo ang paggamit sang aton mata kag dulunggan sa pagtuon sing dugang pa parte kay Jehova kag sa iya Anak. Ang isa pa ka importante nga paagi para makakuha sing ihibalo sang Dios amo ang pagbatyag sing kalipay sa pag-aplikar sang aton natun-an parte sa iya. Ginsunod ini sang mga apostoles, kay si Jesus nangamuyo: “Ang pinamulong nga ginhatag mo sa akon ginhatag ko sa ila, kag ginbaton nila ini.” (Juan 17:8) Pero para matigayon ang kabuhi nga walay katapusan, kinahanglan padayon nila nga pamalandungan ang pinamulong sang Dios kag iaplikar ini adlaw-adlaw. Nagmadinalag-on bala ang mga apostoles sa paghimo sini tubtob sa katapusan sang ila kabuhi sa duta? Huo! Nahibaluan naton ini bangod ang ila ngalan nasulat sa 12 ka sadsaran nga bato sang Bag-ong Jerusalem sa langit.—Bug. 21:14.

7. Ano ang buot silingon sang “pagkilala” sa Dios, kag ngaa importante gid ini?

⁷ Suno sa mga iskolar sang Griego nga lenguahe, ang Griegong tinaga nga gin-translate “pagkuha . . . sing ihibalo” mahimo man i-translate nga “dapat padayon nga magkilala.” Ining duha ka kahulugan wala nagasumpakilay kag pareho nga importante. Sa footnote sang Juan 17:3 sang Reference Bible, mabasa ang translation nga “pagkilala nila sa imo.” Gani ang “pagkuha . . . sing ihibalo”  nagapahangop sing padayon nga proseso nga nagaresulta sa pribilehiyo nga ‘makilala’ ang Dios. Apang, ang pagkilala sa pinakadaku nga Persona sa uniberso nagalakip indi lang sa paghangop sa mga kinaiya kag katuyuan sang Dios. Nagalakip man ini sa pagbatyag sing tudok nga gugma sa iya kag sa aton mga masigkatumuluo. “Sia nga wala nagahigugma” paathag sang Biblia, “wala makakilala sa Dios.” (1 Juan 4:8) Gani ang pagkilala sa Dios nagalakip sang pagkamatinumanon sa iya. (Basaha ang 1 Juan 2:3-5.) Daku gid nga pribilehiyo nga makilala naton si Jehova! Pero pareho sa natabo kay Judas Iscariote, ining bilidhon nga kaangtanan mahimo madula. Gani, panikasugan naton nga mahuptan ini. Sa amo, mangin kalipikado kita sa iya wala tupong nga regalo nga kabuhi nga walay katapusan.—Mat. 24:13.

8, 9. Ano ang panguna nga ginakabalak-an ni Jesus sa iya pagministeryo sa duta, kag ano nga tradisyon sang relihion ang mahimo nga ginsikway niya?

⁸ Sa tapos mabasa ang pangamuyo ni Jesus nga narekord sa Juan kapitulo 17, makasiguro gid kita nga tudok ang gugma ni Jesus sa iya mga apostoles kag sa iya palaabuton nga mga disipulo. (Juan 17:20) Pero kinahanglan naton mahangpan nga ang aton kaluwasan indi amo ang panguna nga ginakabalak-an ni Jesus. Ang panguna niya nga katuyuan sa umpisa tubtob sa katapusan sang iya ministeryo amo ang pagpakabalaan kag paghimaya sa ngalan sang iya Amay. Halimbawa, sang ginpahibalo niya ang iya hilikuton sa sinagoga sa Nazaret, ginbasa ni Jesus ang linukot sang tulun-an ni Isaias: “Ang espiritu ni Jehova yari sa akon, bangod ginhaplas niya ako sa pagpahayag sing maayong balita sa mga imol.” Pat-od gid nga ginsambit ni Jesus sing maathag ang ngalan sang Dios sang ginbasa niya ini.—Luc. 4:16-21.

⁹ Suno sa tradisyon sang mga Judiyo, ginpauntat sang ang mga lider sang relihion ang katawhan sa paggamit sang ngalan sang Dios. Natabo ini sang wala pa magkari si Jesus sa duta. Makapat-od kita nga ginsikway ni Jesus ining indi Makasulatanhon nga tradisyon. Ginsilingan niya ang iya mga manugpamatok: “Nagkari ako sa ngalan sang akon Amay, apang wala kamo magbaton sa akon; kon may iban nga magkari sa iya kaugalingon nga ngalan, batunon ninyo sia.” (Juan 5:43) Dayon pila ka  adlaw antes sang iya kamatayon, ginpabutyag ni Jesus ang iya panguna nga ginakabalak-an paagi sa pangamuyo: “Amay, himayaa ang imo ngalan.” (Juan 12:28) Gani indi kita dapat matingala nga ginlakip ni Jesus ang iya kabalaka parte sa ngalan sang iya Amay sa pangamuyo nga aton ginabinagbinag karon.

10, 11. (a) Ano ang nalakip sa pagpakilala ni Jesus sang ngalan sang iya Amay? (b) Ano nga tulumuron ang dapat panikasugan sang mga disipulo ni Jesus?

¹⁰ “Ginpakilala ko ang imo ngalan,” pangamuyo ni Jesus, “sa mga tawo nga ginhatag mo sa akon gikan sa kalibutan. Imo sila, kag ginhatag mo sila sa akon, kag gintuman nila ang imo pulong. Subong man, wala na ako sa kalibutan, apang sila yara sa kalibutan kag magakadto ako sa imo. Balaan nga Amay, bantayi sila tungod sa imo ngalan nga ginhatag mo sa akon, agod mangin isa sila subong nga kita isa.”—Juan 17:6, 11.

¹¹ Indi lamang pagsambit sa ngalan sang Amay ang nalakip sa iya pagpakilala sini nga ngalan sa iya mga disipulo. Gintudlo man ni Jesus sa ila kon ano ang ginarepresentar sang ngalan sang Dios, nga amo ang Iya dalayawon nga mga kinaiya kag ang Iya paagi sang pagpakig-angot sa aton. (Ex. 34:5-7) Isa pa, sa ginhimaya nga posisyon ni Jesus sa langit, padayon niya nga ginabuligan ang iya mga disipulo sa pagpakilala sang ngalan ni Jehova sa bilog nga duta. Ano ang tulumuron sini? Para mas madamo pa nga disipulo ang mahimo matipon antes mag-abot ang katapusan sining malaut nga sistema sang mga butang. Dayon, magahimo si Jehova sing dalayawon nga ngalan paagi sa pagluwas sa iya mainunungon nga mga saksi!—Ezeq. 36:23.

12. Ano ang tatlo ka importante nga butang para magmadinalag-on kita sa aton nagaluwas-kabuhi nga hilikuton?

¹² Sang yari si Jesus sa duta, nanikasog sia nga mabuligan ang iya mga disipulo nga madaug ang ila mga kaluyahon. Importante gid ini para matapos nila ang hilikuton nga ginsugdan ni Jesus. “Subong nga ginpadala mo ako sa kalibutan,” pangamuyo ni Jesus, “ginpadala ko man sila sa kalibutan.” Para magmadinalag-on sila sa sining nagaluwas-kabuhi nga hilikuton, ginpadaku ni Jesus ang tatlo ka importante nga kinahanglanon. Una, nangamuyo sia nga ang iya mga disipulo indi mangin bahin sang indi balaan nga kalibutan ni Satanas. Ikaduha, nangamuyo sia para mahimaya sila, ukon magpabilin nga balaan, paagi sa pag-aplikar sang kamatuoran sang Pulong sang Dios. Ikatlo, sulitsulit nga nagpangabay si Jesus nga ang iya mga disipulo mahiusa sa gugma nga pareho sang gugma nila sang iya Amay. Nagapahangop ini nga dapat naton usisaon ang aton kaugalingon. Dapat naton pamangkuton ang aton kaugalingon, ‘Nagapanghikot bala ako nahisuno sa tatlo ka pangabay ni Jesus?’ Paagi sa paghatag sing igtalupangod sa sini nga mga butang, ginpabutyag ni Jesus ang iya pagsalig nga ‘ang kalibutan magpati nga ginpadala’ sia sang Dios.—Basaha ang Juan 17:15-21.

13. Paano ginsabat ang pangamuyo ni Jesus sang unang siglo C.E.?

¹³ Mahibaluan naton nga ginsabat ang pangamuyo ni Jesus paagi sa pagtuon sa tulun-an sang Binuhatan sa Biblia, ang tulun-an pagkatapos sang apat ka Ebanghelyo. Hunahunaa nga posible nga magbahinbahin ang mga Cristiano sadto, nga ginatapuan sang mga Judiyo kag Gentil, manggaranon kag imol, ulipon kag agalon. Pero sila tanan suod nga nahiusa, amo nga mapaanggid sila sa lainlain nga bahin sang lawas, nga ang ulo amo si Jesus. (Efe. 4:15, 16) Isa gid ini ka milagruso nga kadalag-an sa tunga sang nabahinbahin nga kalibutan ni Satanas! Tanan ini para sa kadayawan ni Jehova, kay nahimo ini paagi sa giya sang iya gamhanan nga balaan nga espiritu.—1 Cor. 3:5-7.

14. Paano nasabat sa moderno nga tion ang pangamuyo ni Jesus?

¹⁴ Makapasubo nga wala nagpadayon ining milagruso nga paghiusa sang napatay ang mga apostoles. Sa baylo, suno sa  tagna, ang daku nga apostasya magaluntad, nga nagresulta sa nabahinbahin nga sekta sang Cristiandad. (Binu. 20:29, 30) Pero sang 1919, ginhilway ni Jesus ang iya hinaplas nga mga sumulunod gikan sa butig nga relihion kag gintipon sila sing tingob sa “himpit nga higot sang paghiusa.” (Col. 3:14) Ano ang epekto sang ila pagbantala sa mga tawo sa bilog nga kalibutan? Sobra sa pito ka milyon sang “iban nga mga karnero” nga naghalin “sa tanan nga pungsod kag tribo kag katawhan kag hambal” ang nag-upod sa nahiusa nga panong sang hinaplas sang Dios. (Juan 10:16; Bug. 7:9) Talalupangdon gid ini nga sabat sa pangamuyo ni Jesus, nga ‘mahibaluan sang kalibutan nga ginpadala sia ni Jehova kag ginhigugma niya sila subong nga ginhigugma niya sia’!—Juan 17:23.

15. Ano ang pinasahi nga pangabay ni Jesus para sa iya hinaplas nga mga disipulo?

¹⁵ Sang temprano pa sang gab-i sang Nisan 14, ginhimaya ukon ginpadunggan ni Jesus ang iya mga apostoles paagi sa paghimo sing katipan sa ila nga maggahom kaupod niya sa iya Ginharian. (Luc. 22:28-30; Juan 17:22) Gani tuhoy sa iya mangin hinaplas nga mga sumulunod, si Jesus nangamuyo: “Amay, tuhoy sa ila nga ginhatag mo sa akon, luyag ko nga kon diin ako, didto man sila kaupod ko, agod makita nila ang akon himaya nga ginhatag mo sa akon, bangod ginhigugma mo ako sa wala pa matukod ang kalibutan.” (Juan 17:24) Sa baylo nga mahisa, nalipay gid sa sini ang iban nga karnero ni Jesus kag pamatuod pa gid ini nga may paghiusa ang tanan nga matuod nga Cristiano subong.

16, 17. (a) Ano ang determinasyon ni Jesus sa katapusan sang iya pangamuyo? (b) Ano dapat ang determinado naton nga himuon?

¹⁶ Bangod sa impluwensia sang mga lider sang relihion, ginsikway sang kalabanan nga tawo sa kalibutan ang maathag nga pamatuod nga may nahiusa nga katawhan si Jehova nga nakakilala gid sa iya. Amo man sini ang natabo sang panahon ni Jesus. Gani gintapos niya ang iya pangamuyo sa sining makatalandog nga mga pinamulong: “Matarong nga Amay, ang kalibutan wala gid makakilala sa imo; apang ako nakakilala sa imo, kag sila nakahibalo nga ginpadala mo ako. Kag ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.”—Juan 17:25, 26.

¹⁷ Indi gid maduhaduhaan nga nagpanghikot si Jesus nahisuno sa iya pangamuyo! Subong Ulo sang kongregasyon, padayon niya kita nga ginabuligan sa pagpakilala sa ngalan kag katuyuan sang iya Amay. Kabay pa nga padayon kita nga magpasakop sa iya pagkaulo paagi sa makugi nga pagtuman sa iya sugo nga magbantala kag maghimo sing mga disipulo. (Mat. 28:19, 20; Binu. 10:42) Panikasugan man naton nga mahuptan ang aton bilidhon nga paghiusa. Paagi sini, makapanghikot kita nahisuno sa pangamuyo ni Jesus, para sa kahimayaan sang ngalan ni Jehova kag para sa aton dayon nga kalipay.