1, 2. (a) Kay sin-o kasal ang magaresulta sing kalipay sa langit? (b) Ano nga mga pamangkot ang aton binagbinagon?

SA MASAMI, daku nga tion ang ginagamit sa paghanda sa kasal. Pero, magakonsentrar kita sa isa ka espesyal gid nga kasal—ang harianon nga kasal. Hunahunaa, mga 2,000 ka tuig ang paghanda sa sini! Madasig nga nagahilapit ang tion nga ang nobyo mahiusa sa iya nobya. Sa indi madugay, mabatian ang malipayon nga musika sa palasyo sang Hari, kag ang langitnon nga panong magaamba: “Dayawa ninyo si Jah, bangod si Jehova nga aton Dios, ang Labing Gamhanan, nagsugod sa paggahom subong hari. Magkasadya kita kag magkalipay sing daku, kag maghimaya sa iya, bangod nag-abot na ang kasal sang Kordero kag nakahanda na ang iya asawa.”—Bug. 19:6, 7.

² “Ang Kordero,” nga ang iya kasal magaresulta sing kalipay sa langit, wala sing liwan kundi si Jesucristo. (Juan 1:29) Ano ang iya bayo para sa kasal? Sin-o ang iya nobya? Paano ang nobya ginhanda para sa kasal? San-o ang ila kasal? Ini nga kasal mangin makalilipay sa langit, pero ang mga nagalaum bala nga mabuhi sing dayon sa duta magakasadya man? Nalangkag gid kita sa pagbinagbinag sini nga mga pamangkot paagi sa padayon naton nga pag-usisa sa Salmo 45.

3, 4. (a) Ano ang mga panapton sang Nobyo para sa kasal, kag ano ang nagapadugang sang iya kalipay? (b) Sin-o “ang babaying mga anak sang mga hari” nga nagabuylog sa kalipay sang Nobyo?

³ Basaha ang Salmo 45:8, 9. Ang Nobyo, nga si Jesucristo, nagsuksok sang iya mahimayaon kag harianon nga mga panapton para sa kasal. Nagakaigo gid nga ang iya isuksok nagapangamyon “sang pili nga mga pahumut,” subong sang mira kag casia, nga nalakip sa mga ingrediente sang balaan nga lana nga panghaplas nga ginagamit sa Israel.—Ex. 30:23-25.

⁴ Ang langitnon nga musika nga mabatian sa iya palasyo nagapadugang sa kasadya sang Nobyo samtang nagahilapit ang iya kasal. Nagabuylog sa iya kalipay ang “dungganon nga mga babayi,” ang langitnon nga bahin sang organisasyon sang Dios, nga nagalakip sang “babaying mga anak sang mga hari,” nga amo ang balaan nga mga anghel. Makalilipay gid mabatian ang mga tingog sa langit nga nagasiling: “Magkasadya kita kag magkalipay sing daku . . . bangod nag-abot na ang kasal sang Kordero”!

5. Sin-o “ang asawa sang Kordero”?

⁵ Basaha ang Salmo 45:10, 11. Nakilala na naton ang Nobyo, pero sin-o ang nobya? Ang nobya ginatapuan sang mga miembro sang kongregasyon nga ang ulo amo si Jesucristo. (Basaha ang Efeso 5:23, 24.) Mangin bahin sila sang Mesianikong Ginharian sang Cristo. (Luc. 12:32) Ining 144,000 nga hinaplas nga mga Cristiano “padayon nga nagasunod sa Kordero bisan diin sia magkadto.” (Bug. 14:1-4) Mangin “asawa [sila] sang Kordero” kag magaistar sila upod sa iya sa langit.—Bug. 21:9; Juan 14:2, 3.

6. Ngaa ang mga hinaplas ginapatuhuyan subong “babaying anak sang hari,” kag ngaa ginsugo sila nga ‘kalimtan ang ila katawohan’?

⁶ Ang palaabuton nga nobya gintawag indi lang subong “O anak nga babayi” kundi “babaying anak sang hari” man. (Sal. 45:13) Sin-o ang “hari”? Ang hinaplas nga mga Cristiano gin-adoptar subong “mga anak” ni Jehova. (Roma 8:15-17) Bangod mangin langitnon sila nga nobya, ginsugo ang hinaplas: “Kalimti ang imo kaugalingon nga katawohan kag ang imo kabaranggayan.” Kinahanglan nila ‘ituon ang ila hunahuna sa mga butang sa ibabaw, indi sa mga butang sa duta.’—Col. 3:1-4.

7. (a) Paano ginahanda ni Cristo ang iya palaabuton nga nobya? (b) Ano ang pagtamod sang nobya sa iya palaabuton nga Nobyo?

⁷ Sa sulod sang mga siglo, ginahanda ni Cristo ang iya palaabuton nga nobya para sa kasal sa langit. Si apostol Pablo nagpaathag nga “si Cristo naghigugma man sang kongregasyon kag nagtugyan sang iya kaugalingon tungod sa sini, agod mapakabalaan niya ini, nga nagatinlo sa sini paagi sa paghugas sa tubig paagi sa pulong, agod mapaatubang niya sa iya kaugalingon ang kongregasyon nga may katahom, nga wala sing higko ukon kurinot ukon bisan anong butang nga kaangay sini, kundi agod mangin balaan ini kag wala sing depekto.” (Efe. 5:25-27) Ginsilingan ni Pablo ang mga hinaplas sa Corinto sadto: “Nagapangimon ako tungod sa inyo nga may diosnon nga kaimon, kay ginpangako ko nga ipakasal kamo sa isa ka bana agod mapresentar ko kamo subong isa ka putli nga ulay kay Cristo.” (2 Cor. 11:2) Ginaapresyar sang Nobyo nga Hari, nga si Jesucristo, ang espirituwal nga “katahum” sang iya palaabuton nga nobya. Kag ginakilala sia sang nobya subong iya “ginoo” kag ‘tahoron niya sia’ subong iya palaabuton nga bana.

8. Ngaa nagakaigo ang paglaragway sa nobya subong “mahimayaon sing bug-os”?

⁸ Basaha ang Salmo 45:13, 14a. Ang nobya “mahimayaon sing bug-os” para sa harianon nga kasal. Sa Bugna 21:2, ang nobya  ginpaanggid sa isa ka siudad, ang Bag-o nga Jerusalem, nga “napunihan para sa iya bana.” Ining langitnon nga siudad “may himaya sang Dios” kag nagasilak, “kaangay sa malahalon gid nga bato, subong sang nagainggat nga bato nga jaspe nga masinaw kaangay sang kristal.” (Bug. 21:10, 11) Ang katahom sang Bag-o nga Jerusalem ginlaragway sa tulun-an sang Bugna. (Bug. 21:18-21) Indi katingalahan nga ginlaragway sang salmista ang nobya subong “mahimayaon sing bug-os”! Kay man, ang harianon nga kasal hiwaton sa langit.

9. Sin-o ang “hari” nga gindalhan sang nobya, kag ano ang panapton sang nobya?

⁹ Ang Isa nga pagadalhan sang nobya amo ang Nobyo—ang Mesianikong Hari. Ginhanda niya ang iya nobya, “nga nagatinlo sa sini paagi sa paghugas sa tubig paagi sa pulong.” ‘Balaan sia kag wala sing depekto.’ (Efe. 5:26, 27) Ang iya nobya kinahanglan man panaptan sing nagakaigo para sa sina nga okasyon. Kag matuod gid ini, kay “ang iya panapton napugtakan sing bulawan,” kag “dalhon sia sa hari nga napanaptan sing mga binordahan.” Sa tion sang kasal sang Kordero, “gintugutan sia nga mapanaptan sang masilaw, matinlo kag pino nga lino, kay ginalaragway sang pino nga lino ang matarong nga mga binuhatan sang mga balaan.”—Bug. 19:8.

10. San-o matabo ang kasal sang Kordero?

¹⁰ Basaha ang Bugna 19:7. San-o matabo ang kasal sang Kordero? Bisan pa “nakahanda na ang iya asawa” para sa kasal, ang masunod nga ginsiling wala nagalaragway sa aktual nga kasal. Kundi, maathag ini nga nagalaragway sa katapusan nga bahin sang dakung kapipit-an. (Bug. 19:11-21) Nagakahulugan bala ini nga ang kasal hiwaton antes matapos sang Nobyo nga Hari ang iya pagpangdaug? Indi. Ang palanan-awon sa tulun-an sang Bugna wala ginrekord sing pasunod. Sa ika-45 sang Salmo, ang harianon nga kasal matabo sa tapos mataklus sang Hari, si Jesucristo, ang iya espada kag ‘magsalakay nga madinalag-on’ batok sa iya mga kaaway.—Sal. 45:3, 4, APD.

11. Ano ang pasunod nga hitabo sang pagpangdaug ni Cristo?

¹¹ Gani makahinakop kita nga amo ini ang pasunod nga hitabo: Una, hukman ang “dakung makihilawason nga babayi,” ang Babilonia nga daku, ang emperyo sang butig nga relihion. (Bug. 17:1, 5, 16, 17; 19:1, 2) Dayon, ipadapat ni Cristo ang paghukom sang Dios sa nabilin nga bahin sang malaut nga sistema ni Satanas sa duta paagi sa paglaglag sini sa Armagedon, ang “inaway sang daku nga adlaw sang Dios nga Labing Gamhanan.” (Bug. 16:14-16; 19:19-21) Sa katapusan, ang Mangangaway nga Hari magatapos sang iya pagpangdaug paagi sa pagtagbong kay Satanas kag sa iya mga demonyo sa kadadalman, sa amo ang ila kahimtangan mangin daw patay nga wala na sing mahimo.—Bug. 20:1-3.

12, 13. (a) San-o ang kasal sang Kordero? (b) Sin-o ang magakasadya sa langit sa kasal sang Kordero?

¹² Kon matapos na sang mga hinaplas ang ila kabuhi sa duta sa tion sang presensia ni Cristo, banhawon sila sa langit. Sa tapos malaglag ang Babilonia nga Daku, tipunon ni Jesus ang tanan nga nabilin nga miembro sang nobya nga klase. (1 Tes. 4:16, 17) Gani, antes sang inaway sa Armagedon, ang tanan nga miembro sang “nobya” ara na sa langit. Sa tapos sina nga inaway, hiwaton na ang kasal sang Kordero. Mangin makalilipay gid ini nga kasal! “Malipayon ang mga gin-agda sa panihapon sang kasal sang Kordero,” siling sang Bugna 19:9. Mangin malipayon gid ang 144,000 nga miembro sang nobya nga klase. Kag ang Nobyo nga Hari mangin malipayon gid kay ang tanan niya nga kaupod nga hari simbuliko nga ‘nagakaon kag nagainom sa iya lamesa sa iya Ginharian.’ (Luc. 22:18, 28-30) Pero  indi lang ang Nobyo kag ang nobya ang malipayon sa kasal sang Kordero.

¹³ Subong sang aton natalupangdan kaina, ang panong sa langit nahiusa nga nag-amba: “Magkasadya kita kag magkalipay sing daku, kag maghimaya [kay Jehova], bangod nag-abot na ang kasal sang Kordero kag nakahanda na ang iya asawa.” (Bug. 19:6, 7) Apang, kamusta ang mga alagad ni Jehova sa duta? Mangin malipayon man bala sila tungod sini?

14. Suno sa Salmo 45, sin-o ang ‘mga ulay nga kaupdanan’ sang nobya?

¹⁴ Basaha ang Salmo 45:12, 14b, 15. Si manalagna Zacarias nagtagna nga sa katapusan nga tion, ang katawhan sang mga pungsod malipayon nga magapakig-upod sa nabilin nga espirituwal nga Israel. Sia nagsulat: “Sa sadtong mga adlaw ang napulo ka tawo gikan sa tanan nga hambal sang mga pungsud magabuyot sang sidsid sang isa ka Judio, nga nagasiling, ‘Magaupud kami sa inyo, kay nabatian namon nga ang Dios nagaupud sa inyo.’” (Zac. 8:23) Sa Salmo 45:12, ining simbuliko nga “napulo ka tawo” ginapatuhuyan subong “babaying anak sang Tiro” kag “manggaranon sa katawohan.” Nagpalapit sila sa hinaplas nga nagkalabilin nga may dala nga mga regalo, nga ‘nagapakilooy sang ila kahamuut’ kag espirituwal nga bulig. Sugod sang 1935, gintugutan sang minilyon ang mga nagkalabilin nga ‘lisuon sila sa pagkamatarung.’ (Dan. 12:3) Ining mainunungon nga kaupod sang mga hinaplas nagtinlo sang ila kabuhi, kag nangin ulay sa espirituwal. Ining ‘mga ulay nga kaupdanan’ sang nobya nagdedikar sang ila kaugalingon kay Jehova kag nagpamatuod nga matutom sila nga sakop sang Nobyo nga Hari.

15. Paano ang ‘mga ulay nga kaupdanan’ nagapanghikot upod sa mga miembro sang nobya nga ari pa sa duta?

 ¹⁵ Ang nagkalabilin sa nobya nga klase nagapasalamat gid sa ila ‘mga ulay nga kaupdanan’ bangod sa ila makugi nga pagbulig sa pagbantala sang “maayong balita sang ginharian” sa bug-os napuy-an nga duta. (Mat. 24:14) Wala lamang “ang espiritu kag ang nobya padayon nga nagasiling: ‘Kari!’” kundi ang nagapamati magasiling man sing “Kari!” (Bug. 22:17) Huo, ang “iban nga mga karnero” nakabati sa mga miembro sang hinaplas nga nobya nga nagasiling “Kari!” kag nagbuylog sila sa nobya sa pagsiling sing “Kari!” sa mga pumuluyo sang duta.—Juan 10:16.

16. Ano nga pribilehiyo ang ginhatag ni Jehova sa iban nga mga karnero?

¹⁶ Ginahigugma sang mga hinaplas nga nagkalabilin ang ila kaupod kag nalipay sila nga mahibaluan nga ang Amay sang Nobyo, si Jehova, nagahatag sa sining iban nga mga karnero sa duta sing pribilehiyo nga makabuylog sa kalipay sa kasal sang Kordero sa langit. Suno sa tagna, ining ‘mga ulay nga kaupdanan’ ‘dalhon nga may kasadya kag kalipay.’ Ang iban nga mga karnero, nga nagalaum nga mabuhi sing dayon sa duta, magabuylog sa bug-os uniberso nga kasadya sa tion sang kasal sang Kordero sa langit. Nagakaigo lang nga ginlaragway sa tulun-an sang Bugna ang miembro sang “dakung kadam-an” nga “nagatindog sa atubangan sang trono kag sa atubangan sang Kordero.” Nagahimo sila sing sagrado nga pag-alagad kay Jehova sa dutan-on nga luwang sang iya espirituwal nga templo.—Bug. 7:9, 15.

17, 18. Paano mangin mabungahon ang pagpakasal sang Kordero, kag kay sin-o mangin amay si Cristo sa iya Isa ka Libo ka Tuig nga Paggahom?

¹⁷ Basaha ang Salmo 45:16. ‘Ang mga ulay nga kaupdanan’ sang langitnon nga nobya ni Cristo magakasadya pa gid kon makita nila nga ang pagpakasal mangin mabungahon sa bag-o nga kalibutan. Ang Nobyo nga Hari magahatag sing atension sa duta kag magabanhaw sang iya dutan-on nga “mga ginikanan,” nga mangin “mga anak” niya sa duta. (Juan 5:25-29; Heb. 11:35) Gikan sa ila, magatangdo sia sing “mga principe sa bug-os nga duta.” Pat-od gid nga magatangdo si Cristo halin sa matutom nga mga gulang karon para magdumala sa bag-o nga kalibutan.—Isa. 32:1.

¹⁸ Sa tion sang iya Isa ka Libo ka Tuig nga Paggahom, si Cristo mangin amay man para sa iban. Ang matuod, mangin Amay sia sang tanan nga pumuluyo sang duta nga makatigayon sing kabuhi nga wala sing katapusan bangod nagtuo sila sa halad-gawad ni Jesus. (Juan 3:16) Gani, sia mangin ila “Amay nga Nagapadayon.”—Isa. 9:6, 7.

19, 20. Paano ang mga hitabo sa Salmo 45 makaapektar sa tanan nga matuod nga Cristiano karon?

¹⁹ Basaha ang Salmo 45:1, 17. Dapat mangin interesado ang tanan nga Cristiano sa mga hitabo nga narekord sa Salmo 45. Ang hinaplas nga nagkalabilin sa duta nalipay gid sa pagpaabot nga sa indi madugay makaupod nila sa langit ang ila mga kauturan kag ang ila Nobyo. Ang iban nga mga karnero napahulag nga magpasakop pa gid sa ila mahimayaon nga Hari kag nagapasalamat sa ila pribilehiyo nga makaupod ang nagkalabilin nga miembro sang nobya sa duta. Sa tapos sang ila kasal, si Cristo kag ang iya kaupod nga mga hari magahatag sing indi maisip nga pagpakamaayo sa mga nagapuyo sa duta.—Bug. 7:17; 21:1-4.

²⁰ Samtang ginapaabot naton ang katumanan sang “matahum nga butang” parte sa Mesianiko nga Hari, indi bala napahulag kita nga ‘ipadumdum ang iya ngalan’ sa iban? Kabay pa nga isa man kita sa mga ‘magapasalamat sa Hari sa gihapon.’