1. Ano ang kinahanglan sang tawo, kag sin-o ang makaaman sina nga kinahanglanon?

KINAHANGLAN gid sang tawo nga makigsuod sa iban. Mahambal nga ang mga indibiduwal “suod kon nagustuhan gid nila kag nakilala ang isa kag isa.” Malipayon kita bangod ang aton pamilya kag mga abyan nagapalangga, nagapabalor, kag nakahangop sa aton. Pero ang Persona nga dapat naton pakigsuoran gid amo ang aton Dakung Manunuga.​—Man. 12:1.

2. Ano ang ginsaad ni Jehova sa aton, pero ngaa madamo ang wala nagapati sa sini?

² Si Jehova nagapalig-on sa aton paagi sa iya Pulong nga “magpalapit” sa iya, kag nagsaad sia nga kon himuon naton ini, “magapalapit sia” sa aton. (Sant. 4:8) Makalilipay gid ini mahibaluan! Pero madamo ang nagahunahuna nga imposible nga magpalapit ang Dios sa ila; pamatyag nila indi sila takus magpalapit sa iya ukon tama sia kalayo para palapitan. Posible gid bala makigsuod kay Jehova?

3. Ano nga kamatuoran ang dapat naton marealisar parte kay Jehova?

³ Ang matuod, si Jehova ‘indi malayo sa tagsa’ nga nagapangita sa iya, kag posible sia makilala. (Basaha ang Binuhatan 17:26, 27; Salmo 145:18.) Katuyuan sang aton Dios nga bisan ang indi himpit nga mga tawo dapat magpalapit sa iya, kag handa gid sia nga  batunon sila subong iya suod nga mga abyan. (Isa. 41:8; 55:6) Base sa personal nga eksperiensia sang salmista, nagsulat sia parte kay Jehova: “O ikaw nga nagapamati sang pangamuyo! Sa imo magakari ang tanan nga unud. Bulahan ang tawo nga imo ginapili kag ginapapalapit sa imo.” (Sal. 65:2, 4) Ang rekord sang Biblia parte kay Hari Asa sang Juda nagapakita sing halimbawa sang isa nga nagpalapit sa Dios, kag ginapakita sini kon ano ang reaksion ni Jehova. *

4. Ano nga halimbawa ang ginpahamtang ni Hari Asa sa katawhan sang Juda?

⁴ Si Hari Asa nagpakita sing dalayawon nga kakugi sa putli nga pagsimba. Gindula niya ang pagpakighilawas sa templo kag idolatriya nga lapnag gid sadto. (1 Hari 15:9-13) Gani, may kahilwayan sia sa paghambal sa mga tawo nga ‘pangitaon ang GINOO, ang Dios sang ila mga ginikanan, kag tumanon ang kasogoan kag ang sogo.’ Ginpakamaayo ni Jehova ang una nga napulo ka tuig nga paghari ni Asa sing bug-os nga paghidait. Sin-o ang ginpasalamatan ni Asa sa sini? Ginsilingan niya ang katawhan: “Ang duta yara pa sa atubangan naton, bangud nga ginpangita naton ang GINOO nga aton Dios; ginpangita naton sia, kag sia naghatag sa aton sing pahuway sa palibut.” (2 Cron. 14:1-7) Binagbinaga ang masunod nga natabo.

5. Sa ano nga kahimtangan natilawan ang pagsalig ni Asa sa Dios, kag ano ang resulta?

⁵ Ibutang ang imo kaugalingon sa sitwasyon ni Asa. Ang Etiopianhon nga si Zera nagsalakay sa Juda upod ang 1,000,000 ka lalaki kag 300 ka kangga. (2 Cron. 14:8-10) Ano ayhan ang imo reaksion kon makita mo ang tuman ka damo nga soldado nga nagamartsa padulong sa imo ginharian? Ang imo mga soldado 580,000 lang! Bangod halos doble ang ila kadamuon sa inyo, magahunahuna ka bala ngaa ginatugutan sang Dios ini nga pagsalakay? Atubangon mo bala ini nga kahimtangan base sa imo kaugalingon nga kaalam? Ang reaksion ni Asa nagapakita nga suod sia kay Jehova kag may pagsalig sia sa iya. Sia nagsiling: “Buligi kami, O GINOO nga Dios namon, kay sa imo nagasalig kami, kag sa imo ngalan nagakari kami batok sining kadam-an. O GINOO, ikaw ang amon Dios; dili pagpalandasa ang tawo batok sa imo.” Paano ginsabat ni Jehova ang sinsero nga pangabay ni Asa? “Ginsakit sang GINOO ang mga Etiopianhon.” Wala sing bisan isa sa mga kaaway ang naluwas! 2 Cron. 14:11-13.

6. Ano ang dapat naton ilugon kay Asa?

⁶ Ngaa bug-os ang pagsalig ni Asa sa panuytoy kag pangamlig sang Dios? Ang Biblia nagsiling nga “si Asa naghimo sang matarung sa mga mata sang GINOO,” kag “ang tagiposoon ni Asa bug-os sa GINOO.” (1 Hari 15:11, 14) Dapat man naton alagaron ang Dios sing bug-os tagipusuon. Importante gid ini kon gusto naton makigsuod sa Dios karon kag sa palaabuton. Nagapasalamat gid kita nga si Jehova ang una nga nagabuyok sa aton sa iya kag nagabulig sa aton nga matigayon kag mahuptan ang suod nga kaangtanan sa iya! Binagbinaga ang duha ka paagi kon paano ini ginahimo sang Dios.

7. (a) Ano ang ginhimo ni Jehova para mabuyok kita sa iya? (b) Ano ang panguna nga paagi nga ginabuyok kita sang Dios sa iya?

⁷ Ginpakita ni Jehova ang iya gugma sa mga tawo paagi sa paghimo sang duta nga matahom nga puluy-an. Ginapakita niya gihapon ang iya gugma sa pagsuportar sang aton kabuhi paagi sa iya dalayawon nga pisikal nga mga aman. (Binu. 17:28; Bug. 4:11) Labaw sa tanan, ginaaman niya ang aton espirituwal nga mga kinahanglanon.  (Luc. 12:42) Nagapasalig man sia nga personal niya nga ginapamatian ang aton mga pangamuyo. (1 Juan 5:14) Pero, ang panguna nga paagi nga ginabuyok kita sang Dios kag mabuyok kita sa iya amo ang gugma nga ginpakita niya paagi sa gawad. (Basaha ang 1 Juan 4:9, 10, 19.) Ginpadala ni Jehova ang iya “bugtong nga Anak” sa duta agod mahilway kita sa sala kag kamatayon. Juan 3:16.

8, 9. Ano ang papel ni Jesus sa katuyuan ni Jehova?

⁸ Ginpaposible ni Jehova nga makabenepisyo sa gawad bisan ang mga tawo nga nagkabuhi antes pa sang tion sang Cristo. Sugod sang gintagna ni Jehova ang parte sa palaabuton nga Manluluwas sang katawhan, ang gawad natuman na sa iya pagtamod, kay nahibaluan niya nga indi mapaslawan ang iya katuyuan. (Gen. 3:15) Pagligad sang mga siglo, si apostol Pablo nagpasalamat sa Dios sa “paghilway paagi sa gawad nga ginbayad ni Cristo Jesus.” Si Pablo nagdugang: “Ginapatawad niya ang mga sala nga nahimo sang nagligad, sa tion nga ang Dios nagapaumod.” (Roma 3:21-26) Importante gid ang papel ni Jesus para mangin suod kita sa Dios!

⁹ Paagi lamang kay Jesus makilala sang mapainubuson nga mga tawo si Jehova kag makigsuod sa iya. Paano ginapadaku sang Kasulatan ini nga kamatuoran? Si Pablo nagsulat: “Ginarekomendar sang Dios ang iya mismo gugma sa aton amo nga samtang mga makasasala pa kita, si Cristo napatay para sa aton.” (Roma 5:6-8) Gin-aman ang gawad ni Jesus indi bangod takus kita sa sini, kundi bangod ginahigugma gid niya kita. “Wala sing tawo nga makakari sa akon kon indi sia pagbuyukon sang Amay nga nagpadala sa akon,” siling ni Jesus. Nagsiling man sia: “Wala sing makakadto sa Amay kon indi paagi sa akon.” (Juan 6:44; 14:6) Ginagamit ni Jehova ang balaan nga espiritu para buyukon ang mga indibiduwal sa iya paagi kay Jesus kag buligan sila nga magpabilin sa Iya gugma, nga nagalaum sa kabuhi nga walay katapusan. (Basaha ang Judas 20, 21.) Binagbinaga ang isa pa ka paagi nga ginabuyok kita ni Jehova sa iya.

10. Ano ang ginatudlo sang Biblia nga nagabulig sa aton nga mangin mas suod sa Dios?

¹⁰ Sa sini nga artikulo, 14 na ka lainlain nga libro sa Biblia ang aton nakutlo ukon nasitar. Kon wala ang Biblia, paano naton mahibaluan nga posible kita makigsuod sa aton Manunuga? Kon wala ini, paano naton mahibaluan ang gawad kag ang pagpalapit kay Jehova paagi kay Jesus? Paagi sa iya espiritu, gintuytuyan ni Jehova ang pagsulat sang Biblia, nga nagapahayag sa aton sang iya personalidad kag sa iya dalayawon nga mga katuyuan. Halimbawa, sa Exodo 34:6, 7, ginlaragway ni Jehova ang iya kaugalingon kay Moises subong “Dios nga maloloy-on kag mainayohon, makuli sa pagpangakig, kag bugana sa malig-on nga paghigugma kag sa pagkatutum, nga nagatipig sing malig-on nga paghigugma sa mga linibo, nga nagapatawad sang kalautan kag sang paglapas kag sang sala.” Sin-o bala ang indi mabuyok sa isa nga kaangay sina? Nahibaluan ni Jehova nga kon makilala pa gid naton sia paagi sa Biblia, mangin mas matuod sia sa aton kag mangin mas suod kita sa iya.

11. Ngaa dapat naton panikasugan nga mahibaluan ang mga kinaiya kag dalanon ni Jehova? (Tan-awa ang piktyur sa umpisa sini nga artikulo.)

¹¹ Bilang paathag kon paano kita makigsuod sa Dios, ang introduksion sang libro nga Mangin Suod kay Jehova nagasiling: “Sa bisan anong pag-abyanay nga mahimo naton, ang higot sang pag-abyanay ginapasad sa pagkilala sa isa ka tawo, pagdayaw kag pagpabalor sa iya tumalagsahon nga mga kinaiya. Gani man, kinahanglan nga tun-an naton ang mga kinaiya kag mga dalanon sang Dios nga ginapahayag  sa Biblia.” Nagapasalamat gid kita nga ginpasulat ni Jehova ang iya Pulong sa paagi nga mahangpan naton!

12. Ngaa gingamit sang Dios ang mga tawo sa pagsulat sang Biblia?

¹² Mahimo kuntani nga ginpasulat ni Jehova ang Kasulatan sa mga anghel. Kay man, interesado sila sa aton kag sa aton mga hilikuton. (1 Ped. 1:12) Pat-od gid nga masulat sang mga anghel ang mensahe sang Dios para sa katawhan. Pero makita bala nila ang mga butang suno sa pagtamod sang tawo? Mabatyagan bala nila ang aton mga kinahanglanon, mga kaluyahon, kag mga handum? Indi, nahibaluan ni Jehova ang ila limitasyon sa sini nga bahin. Bangod gingamit sang Dios ang mga tawo sa pagsulat sang Biblia, ginhimo ini ni Jehova nga para gid sa aton. Mahangpan naton ang panghunahuna kag emosyon sang mga manunulat sang Biblia kag sang iban nga ginsambit sa Kasulatan. Mabatyagan naton ang ila mga kapaslawan, pagpangduhaduha, kahadlok, kag di-kahimpitan, subong man nalipay kita sa ila kalipay kag kadalag-an. Kaangay ni manalagna Elias, ang tanan nga manunulat sang Biblia “may balatyagon kaangay sang aton.”​—Sant. 5:17.

13. Ano ang ginabatyag mo sa pangamuyo ni Jonas?

¹³ Halimbawa, binagbinaga kon mapabutyag sing bug-os sang anghel ang ginabatyag ni Jonas sang gintalikdan niya ang asaynment nga ginhatag sang Dios sa iya. Mas maayo gid nga si Jonas mismo ang ginpasulat ni Jehova sa iya kasaysayan, lakip na ang iya tinagipusuon nga pangamuyo sa Dios sang ara sia sa kadadalman sang dagat! Si Jonas nagsiling: “Sang napunaw ang akon kalag sa akon, nadumduman ko ang GINOO.”​—Jon. 1:3, 10; 2:1-9.

14. Ngaa mahangpan naton ang ginsulat ni Isaias parte sa iya kaugalingon?

¹⁴ Binagbinaga man ang ginpasulat ni Jehova kay Isaias parte sa iya mismo kaugalingon. Pagkatapos makita ang palanan-awon  sang himaya sang Dios, napahulag ang manalagna sa pagsiling parte sa iya pagkamakasasala: “Kailo ako! Kay nawala na ako; bangud nga tawo ako nga dimatinlo sing mga bibig, kag nagapuyo ako sa tunga sang katawohan nga dimatinlo sing mga bibig; kay ang akon mga mata nakakita sang Hari, ang GINOO sang mga kasoldadosan!” (Isa. 6:5) Indi gid ini masiling sang isa ka anghel. Pero nasiling ini ni Isaias, kag mahangpan gid naton ang iya ginbatyag.

15, 16. (a) Ngaa makahangop kita sa ginabatyag sang aton mga isigkatawo? Maghatag sing mga halimbawa. (b) Ano ang makabulig sa aton agod mangin suod pa gid kay Jehova?

¹⁵ Makasiling bala ang mga anghel nga “indi ako takus,” subong sang ginsiling ni Jacob, ukon magbatyag nga “makasasala” kaangay sang nabatyagan ni Pedro? (Gen. 32:10; Luc. 5:8) “Hinadlukan” man ayhan sila kaangay sang mga disipulo ni Jesus, ukon kinahanglan bala sang matarong nga mga anghel ‘nga magtipon sing kaisog’ sa pag-atubang sang mga pagpamatok sa pagsugid sang maayong balita, kaangay ni Pablo kag sang iban? (Juan 6:19; 1 Tes. 2:2) Indi, himpit ang mga anghel sa tagsa ka aspekto kag labaw gid sila sangsa mga tawo. Kon ipabutyag sang indi himpit nga mga tawo ang ila nabatyagan, mahangpan naton ini bangod kita mismo mga tawo man. Kon nagabasa sang Pulong sang Dios, kita man ‘nagakasadya upod sa mga tawo nga nagakasadya; nagahibi upod sa mga tawo nga nagahibi.’​—Roma 12:15.

¹⁶ Kon pamalandungan naton ang ginasiling sang Biblia parte sa pagpakig-angot ni Jehova sang una sa iya matutom nga mga alagad, madamo gid kita sing mahibaluan parte sa aton Dios, nga mapailubon kag mahigugmaon nga nagapalapit sa indi himpit nga mga tawo. Gani makilala gid naton si Jehova kag mahigugma sia sing tudok. Bilang resulta, magasuod pa gid kita sa iya.​—Basaha ang Salmo 25:14.

17. (a) Ano ang laygay ni Azarias kay Asa? (b) Paano ginsupak ni Asa ang laygay ni Azarias, kag ano ang resulta?

¹⁷ Pagkatapos magdaug si Hari Asa batok sa Etiopianhon nga mga soldado, may ginlaygay ang manalagna sang Dios nga si Azarias sa iya kag sa iya katawhan. Si Azarias nagsiling: “Ang GINOO nagaupud sa inyo, samtang kamo nagaupud sa iya. Kon pangitaon ninyo sia, makita sia ninyo, apang kon bayaan ninyo sia, sia magabiya sa inyo.” (2 Cron. 15:1, 2) Pero sang ulihi, napaslawan si Asa sa pagtuman sini nga laygay. Sang nakig-away sa ila ang naaminhan nga ginharian sang Israel, nangayo si Asa sing bulig sa mga Sirianhon. Imbes nga mangayo sing bulig kay Jehova, nakig-alyansa sia sa mga pagano. Gani, ginsilingan si Asa: “Sa sini nakahimo ka sing binuang; kay kutub karon may mga inaway ka.” Nagpadayon ang mga inaway sa nabilin nga mga tuig sang paggahom ni Asa. (2 Cron. 16:1-9) Ano ang aton matun-an sa sini?

18, 19. (a) Ano ang dapat naton himuon kon nagapahilayo na kita kay Jehova? (b) Paano pa gid kita mangin suod kay Jehova?

¹⁸ Indi gid kita dapat magpalayo kay Jehova. Kon nagapahilayo na kita sa iya, dapat kita maghulag suno sa narekord sa Oseas 12:6, nga nagasiling: “Balik ka sa imo Dios, hupti ang kalolo kag ang katarungan, kag hulat sa imo Dios sing dalayon.” Gani padayon naton nga panikasugan nga mangin mas suod pa gid kay Jehova paagi sa pag-apresyar sa gawad kag maukod nga pagtuon sa iya Pulong, ang Biblia.​—Basaha ang Deuteronomio 13:4.

¹⁹ “Maayo sa akon nga magpalapit sa Dios,” siling sang salmista. (Sal. 73:28) Kabay nga padayon kita nga magtuon sing bag-o nga mga butang parte kay Jehova kag apresyahon pa gid ang madamo nga rason sa paghigugma sa iya. Kag kabay nga magapalapit si Jehova sa aton karon kag tubtob sa walay katubtuban!