Sang unang siglo C.E., ginsilingan ni apostol Pablo ang mga gulang sa kongregasyon sang Efeso: “Hatagi sang igtalupangod ang inyo kaugalingon kag ang bug-os nga panong, nga sa ila gintangdo kamo sang balaan nga espiritu subong mga manugtatap, agod bantayan ang kongregasyon sang Dios, nga ginbakal niya paagi sa dugo sang iya Anak.” (Binu. 20:28) Ano ang papel sang balaan nga espiritu sa pagtangdo sing mga gulang kag mga ministeryal nga alagad karon?

Una, ang balaan nga espiritu nagpahulag sa mga manunulat sang Biblia sa pagsulat sang mga kalipikasyon para sa mga gulang kag mga ministeryal nga alagad. Ang 16 ka kinahanglanon para sa mga gulang mabasa sa 1 Timoteo 3:1-7. Ang iban pa nga kalipikasyon makita sa kasulatan pareho sang Tito 1:5-9 kag Santiago 3:17, 18. Ang mga kalipikasyon para sa mga ministeryal nga alagad mabasa sa 1 Timoteo 3:8-10, 12, 13. Ikaduha, ang mga nagarekomendar kag nagatangdo espesipiko nga nagapangamuyo nga giyahan sila sang espiritu ni Jehova samtang ginabinagbinag nila kon bala nalab-ot sang utod ang mga kalipikasyon sa Kasulatan sa makatarunganon nga kasangkaron. Ikatlo, kinahanglan mapakita sang ginrekomendar ang bunga sang balaan nga espiritu sang Dios. (Gal. 5:22, 23) Gani nadalahig ang espiritu sang Dios sa tanan nga bahin sang pagtangdo.

Apang sin-o gid ang nagatangdo sa sina nga mga utod? Sang una, ang tanan nga rekomendasyon sa pagtangdo sing mga gulang kag mga ministeryal nga alagad ginapadala sa lokal nga sanga talatapan. Ang mga utod sa sanga talatapan gintangdo sang Nagadumala nga Hubon sa pagbinagbinag sini nga mga rekomendasyon kag sa paghimo sing nagakaigo nga pagtangdo. Dayon, pahibaluon sang sanga talatapan ang hubon sang mga gulang. Ang mga gulang naman magapahibalo sa bag-o gintangdo nga mga utod nga natangdo na sila, nga nagapamangkot kon bala handa sila sa pagbaton sang asaynment kag kon kalipikado gid sila sa sini. Dayon, ipahibalo ini sa kongregasyon.

Pero paano ginahimo ang pagtangdo sang unang siglo? Kon kaisa, ang mga apostoles naghimo sing espesipiko nga mga pagtangdo, pareho sang pagtangdo sa pito ka lalaki sa pagtatap sang inadlaw nga pagpanagtag sing pagkaon sa mga balo. (Binu. 6:1-6) Pero ina nga mga lalaki mahimo nga mga gulang na antes pa sila ginhatagan sing dugang nga asaynment.

Bisan pa wala ginapaathag sing detalyado sang Kasulatan kon paano ginahimo sadto ang pagtangdo, may pila ka indikasyon kon paano ini ginhimo. Ginsugiran kita nga sang nagpauli na sanday Pablo kag Bernabe gikan sa ila una nga paglakbay subong misyonero, “nagtangdo sila sang mga gulang nga lalaki para  sa ila sa tagsa ka kongregasyon, kag sang nakapangamuyo upod ang pagpuasa, gintugyan nila sila kay Jehova nga ila gintuuhan.” (Binu. 14:23) Pagligad sang mga tuig, si Pablo nagsulat sa iya kaupod sa paglakbay nga si Tito: “Bangod sini ginbilin ko ikaw sa Creta, agod matadlong mo ang mga butang nga may depekto kag magtangdo sang mga gulang nga lalaki sa tagsa ka siudad, suno sa ginsugo ko sa imo.” (Tito 1:5) Daw ginhatagan man sing amo sini nga awtoridad si Timoteo, nga pirme kaupod ni apostol Pablo sa paglakbay. (1 Tim. 5:22) Gani maathag nga ini nga mga pagtangdo ginhimo sang mga nagalakbay nga manugtatap, indi sang mga apostoles kag mga gulang nga lalaki sa Jerusalem.

Base sa sini nga sulundan sa Biblia, ginbag-o sang Nagadumala nga Hubon sang mga Saksi ni Jehova ang pamaagi sa pagtangdo sing mga gulang kag mga ministeryal nga alagad. Sugod sang Septiembre 1, 2014, ang pagtangdo ginahimo suno sa mga masunod: Binagbinagon sing maayo sang kada manugtatap sang sirkito ang mga rekomendasyon sa iya sirkito. Sa tion sang iya pagbisita, tinguhaan niya nga makilala ang mga ginarekomendar, nga nagaupod sa ila sa ministeryo kon posible. Sa tapos mabinagbinag ang mga rekomendasyon upod sa lokal nga hubon sang mga gulang, responsibilidad sang manugtatap sang sirkito ang pagtangdo sing mga gulang kag mga ministeryal nga alagad sa mga kongregasyon sa iya sirkito. Sa sini nga paagi, halos pareho ini nga kahimusan sa unang siglo.

Sin-o ang may lainlain nga katungdanan sa sini nga pagtangdo? Ang “matutom kag mainandamon nga ulipon” ang may panguna nga responsibilidad sa pagpakaon sa panimalay. (Mat. 24:45-47) Nagalakip ini sang pagpangusisa sa Kasulatan, sa bulig sang balaan nga espiritu, agod makahatag sing giya parte sa praktikal nga aplikasyon sang mga prinsipio sang Biblia nga may kaangtanan sa kon paano gin-organisar ang kongregasyon sa bilog nga kalibutan. Ang matutom nga ulipon man ang nagatangdo sang tanan nga manugtatap sang sirkito kag mga katapo sang Komite sang Sanga. Ang tagsa ka sanga talatapan nagahatag man sing praktikal nga bulig sa pagpatuman sang ginhatag nga panuytoy. Ang tagsa ka hubon sang mga gulang may serioso nga katungdanan sa pagbinagbinag sing maayo sa Makasulatanhon nga mga kalipikasyon sang utod nga ila ginarekomendar para sa katungdanan sa kongregasyon sang Dios. Ang kada manugtatap sang sirkito may serioso nga responsibilidad sa pagbinagbinag sing maayo kag sa pagpangamuyo sa mga rekomendasyon sang mga gulang kag dayon magtangdo sa mga utod nga kalipikado.

Kon mahangpan naton kon paano ginahimo ang pagtangdo, mas maapresyar naton sing maayo ang papel sang balaan nga espiritu sa sini nga proseso. Dayon, mapalambo naton ang daku nga pagsalig kag pagtahod sa mga gintangdo sa Cristianong kongregasyon.—Heb. 13:7, 17.

Ginsambit sa Bugna 11:3 ang duha ka saksi nga magapanagna sa sulod sang 1,260 ka adlaw. Nagsiling pa ang rekord nga ang mabangis nga sapat “magadaug sa ila kag magapatay sa ila.” Pero pagkatapos sang “tatlo ka adlaw kag tunga,” ining duha ka saksi pagabuhion liwat, kag hinadlukan gid ang mga nagatan-aw.—Bug. 11:7, 11.

Sin-o ining duha ka saksi? Ang mga detalye sini nga rekord makabulig para makilala naton sila. Una, nagsiling ini nga “nagasimbulo sa ila ang duha ka kahoy nga olibo kag ang duha ka kandelero.” (Binu. 11:4) Ginapahanumdom sini sa aton ang kandelero kag duha ka olibo nga kahoy sa tagna ni Zacarias. Ang kahoy nga olibo ginlaragway subong “ang duha ka hinaplas,” nga amo sanday Gobernador Zerubabel kag ang mataas nga saserdote nga si Josue, nga “nagatindug sa luyo sang GINOO sang bug-os nga duta.” (Zac. 4:1-3, 14) Ikaduha, ang duha ka saksi nagapakita sing mga tanda kaangay sang ginhimo nanday Moises kag Elias.—Ipaanggid ang Bugna 11:5, 6 sa Numeros 16:1-7, 28-35 kag 1 Hari 17:1; 18:41-45.

Ano ang magkaanggid sa sining duha ka reperensia? Ang tagsa ka rekord nagapatuhoy sa mga hinaplas sang Dios nga nanguna sa mabudlay nga tion sang pagtilaw. Gani subong katumanan sang Bugna kapitulo 11, ang hinaplas nga mga utod nga nanguna sa tion sang pagtukod sang Ginharian sang Dios sa langit sang 1914 nagbantala nga nagasuksok sing “sako nga panapton” sa sulod sang tatlo ka tuig kag tunga.

Sa tapos sang ila pagbantala nga nagasuksok sang sako, ining mga hinaplas simbuliko nga ginpatay sang ginbilanggo sila sa malip-ot nga tion, ang simbuliko nga tatlo ka adlaw kag tunga. Para sa mga kaaway sang katawhan sang Dios, ang ila hilikuton napatay, nga nagpahalipay gid sa mga manugpamatok.—Bug. 11:8-10.

Pero, kaangay sang ginsiling sang tagna, pagkatapos sang tatlo ka adlaw kag tunga, ang duha ka saksi pagabuhion liwat. Wala lamang ginpagua sa bilangguan ang mga hinaplas kundi ang mga nagpabilin nga matutom nakabaton man sang pinasahi nga pagtangdo sang Dios paagi sa ila Ginuo, nga si Jesucristo. Sang 1919, lakip sila sa gintangdo nga mag-alagad subong “matutom kag mainandamon nga ulipon” agod mag-aman sang espirituwal nga kinahanglanon sang katawhan sang Dios sa katapusan nga mga adlaw.—Mat. 24:45-47; Bug. 11:11, 12.

Talalupangdon nga gin-angot sang Bugna 11:1, 2 ini nga mga hitabo sa tion nga gintakus ang espirituwal nga templo. Ginsambit man sa Malaquias kapitulo 3 ang kaangay sini nga pag-usisa sa espirituwal nga templo, nga ginsundan sang tion sang pagtinlo. (Mal. 3:1-4) Daw ano kadugay ining pag-usisa kag pagtinlo? Nagsugod ini sang 1914 asta sa maaga nga bahin sang 1919. Ini nga tion nagapatuhoy sa 1,260 ka adlaw (42 ka bulan) kag sa simbuliko nga tatlo ka adlaw kag tunga nga ginsambit sa Bugna kapitulo 11.

Nalipay gid kita sa kahimusan ni Jehova sa sining espirituwal nga pag-ulay agod tinluan ang pinasahi nga katawhan para sa maayong mga buhat! (Tito 2:14) Dugang pa, ginaapresyar man naton ang halimbawa sang matutom nga mga hinaplas nga nanguna sinang tion sang pagtilaw kag nag-alagad subong simbuliko nga duha ka saksi. *