1-3. Ano nga mga kabudlayan ang ginaatubang sang mga mag-asawa? (Tan-awa ang piktyur sa umpisa sini nga artikulo.)

“KON panikasugan mo kag ipakita nga gusto mo gid magmadinalag-on ang inyo pag-asawahay, mabaton mo ang mga pagpakamaayo ni Jehova,” siling sang bana nga malipayon sa ila pag-asawahay sa sulod na sang 38 ka tuig. Huo, may ikasarang ang bana kag asawa nga magmalipayon ang ila pag-asawahay kag magbuligay sa mabudlay nga tion.—Hulu. 18:22.

² Pero, natural man nga makaeksperiensia ang mga mag-asawa sang pila ka “kapipit-an sa ila unod.” (1 Cor. 7:28) Ngaa? Ang adlaw-adlaw nga mga problema mahimo magpabudlay sa pag-asawahay. Ang kalain sing buot, indi pag-intiendihanay kag indi maayo nga komunikasyon bangod sang di-himpit nga dila makaapektar man sa malipayon nga mga pag-asawahay. (Sant. 3:2, 5, 8) Madamo man nga mag-asawa ang nabudlayan sa pagtrabaho samtang nagaatipan sa ila kabataan. Ang stress kag sobra nga kakapoy mahimo magapabudlay sa pila ka mag-asawa nga maghatag sing tion sa pagpabakod sang ila pag-asawahay. Mahimo amat-amat nga mabuhinan ang ila gugma kag pagtahod sa isa kag isa bangod sa problema sa pinansial, pagbalatian, kag iban pa nga kabudlayan. Dugang pa, ang pundasyon sang malig-on nga pag-asawahay mahimo marumpag bangod sang “mga buhat sang unod,” pareho sang seksuwal nga imoralidad, matampalason nga paggawi, pag-ilinaway, kinagamo, kaimon, pagsilabo sang kaakig, kag pagbinaisay.—Gal. 5:19-21.

³ Dugang pa, ang mga tawo sa “katapusan nga mga adlaw” mga maiyaiyahon kag indi diosnon, kag nagapabudlay pa gid ini sa pag-asawahay. (2 Tim. 3:1-4) Labaw sa tanan, kinahanglan mangin malig-on ang mga mag-asawa sa pag-atubang sa mga pag-atake sang tuso nga kaaway. Si apostol Pedro nagpaandam: “Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.”—1 Ped. 5:8; Bug. 12:12.

4. Paano makatukod sing mabakod kag malipayon nga pag-asawahay?

⁴ Ang isa ka bana sa Japan nagsiling: “Madamo gid ako sing problema sa pinansial. Kag bangod wala ako nagakomunikar sa akon asawa, nabudlayan man sia. Isa pa, may malubha sia nga balatian sining karon lang. Kon kaisa, amo ini ang rason nga nagabaisay kami.” Ang pila ka kabudlayan sang mag-asawa indi malikawan, pero masarangan ini. Sa bulig ni Jehova, matigayon sang mag-asawa ang mabakod kag malipayon nga pag-updanay. (Basaha ang Salmo 127:1.) Binagbinagon naton ang lima ka espirituwal nga butang para makatukod sing mabakod kag nagadugay nga pag-asawahay. Dayon binagbinagon naton kon paano ini palig-unon sang gugma.

5, 6. Ano ang himuon sang mag-asawa para malakip nila si Jehova sa ila pag-asawahay?

⁵ Ang sadsaran sang malig-on nga pag-asawahay amo ang pagkamainunungon kag pagpasakop sa Isa nga nag-umpisa sang pag-asawahay. (Basaha ang Manugwali 4:12.) Malakip sang mag-asawa si Jehova sa ila pag-asawahay paagi sa pagsunod sa iya mahigugmaon nga giya. Ang Biblia nagasiling parte sa katawhan sang Dios sang una: “Ang imo mga idulungug magapamati sang polong sa likod nimo, nga nagasiling, ‘Ini amo ang dalan, lakat kamo sa sini,’ kon magliso kamo sa too nga kamut ukon magliso kamo sa wala.” (Isa. 30:20, 21) Sa karon, ang mag-asawa ‘makapamati’ sa pulong ni Jehova paagi sa pagbasa sang Pulong sang Dios nga magkaupod. (Sal. 1:1-3) Mapabakod pa gid nila ang ila pag-asawahay paagi sa makalilipay kag makapaumpaw nga Pangpamilya nga Pagsimba. Ang pagpangamuyo nga magkaupod kada adlaw importante man sa pagpabakod sang pag-asawahay para mapamatukan ang mga pagsalakay sang kalibutan ni Satanas.

⁶ “Kon daw matabunan na gani sang personal nga mga kabudlayan ukon mga indi paghangpanay ang amon kalipay,” siling ni Gerhard sang Germany, “ang laygay sa Pulong sang Dios nagbulig sa amon nga mapalambo ang pagpailob kag pagpatawad. Ini nga mga kinaiya importante sa madinalag-on nga pag-asawahay.” Kon panikasugan gid sang mga mag-asawa nga magpabilin ang Dios sa ila pag-asawahay paagi sa paghimo sang espirituwal nga mga hilikuton nga magkaupod, nahiusa sila sa Dios kag sa isa kag isa sa suod kag malipayon nga pag-updanay.

7. Paano dapat ipakita sang mga bana ang ila pagkaulo?

⁷ Ang paggamit sang bana sang iya pagkaulo may daku nga epekto para mangin malig-on kag malipayon ang pag-asawahay. Ang Biblia nagsiling: “Ang ulo sang tagsa ka lalaki amo ang Cristo; ang ulo naman sang babayi amo ang lalaki.” (1 Cor. 11:3) Ang konteksto sini nagasugo sa mga bana kon paano nila dapat ipakita ang ila pagkaulo—sa paagi nga ginpakita sang Cristo ang iya awtoridad sa lalaki. Si Jesus indi gid diktador ukon mapintas kundi pirme sia mahigugmaon, mainayuhon, makatarunganon, malulo, kag mapainubuson.—Mat. 11:28-30.

8. Paano matigayon sang bana ang gugma kag pagtahod sang asawa?

⁸ Indi kinahanglan nga pirme hambalan sang Cristiano nga mga bana ang ila mga asawa nga dapat sila tahuron. Sa baylo, ‘padayon sila nga magpuyo kaupod nila sa kaanggid nga paagi suno sa ihibalo.’ ‘Nagahatag sila sa ila sang dungog subong nga sa isa ka mas maluya nga suludlan, ang isa nga babayi.’ (1 Ped. 3:7) Sa publiko kag sa pribado, ginapakita sang mga bana paagi sa ila matinahuron nga tinaga kag pagpalangga nga hamili para sa ila ang ila mga asawa. (Hulu. 31:28) Bangod sinang mahigugmaon nga pagkaulo, matigayon sang bana ang gugma kag pagtahod sang asawa kag pakamaayuhon sang Dios ang ila pag-asawahay.

9. Paano mapakita sang asawa ang mapainubuson nga pagpasakop?

⁹ Ang indi maiyaiyahon kag nabase sa prinsipio nga gugma kay Jehova nagabulig sa aton tanan nga magpaubos sa idalom sang iya gamhanan nga kamot. (1 Ped. 5:6) Ang isa ka importante nga paagi nga mapakita sang mapainubuson nga asawa ang pagtahod sa awtoridad ni Jehova amo ang pagkooperar kag pagsuporta sa sulod sang pamilya. Ang Biblia nagasiling: “Kamo nga mga asawa, magpasakop kamo sa inyo bana, kay nagakaigo ini sa Ginuo.” (Col. 3:18) Ang matuod, indi tanan nga desisyon sang bana nagustuhan sang iya asawa. Pero, kon ang desisyon sang bana wala nagasumpakil sa mga kasuguan sang Dios, handa sa pagsunod ang mapinasakupon nga asawa.—1 Ped. 3:1.

10. Ngaa importante ang mahigugmaon nga pagpasakop?

¹⁰ Ang asawa may dungganon nga papel subong “kaupod” sang iya bana. (Mal. 2:14) Kon may kinahanglan desisyunan ang pamilya, matinahuron niya nga ginapabutyag ang iya hunahuna kag balatyagon, pero mapinasakupon gihapon. Ang maalam nga bana nagapamati sing maayo sa ginasiling sang iya asawa. (Hulu. 31:10-31) Ang mahigugmaon nga pagpasakop nagapasanyog sing kalipay, paghidait, kag paghilisugot sa sulod sang pamilya. Gani, mangin malipayon ang mag-asawa bangod nahibaluan nila nga ginakahamut-an sila sang Dios.—Efe. 5:22.

11. Ngaa importante ang pagpatawad?

¹¹ Ang isa sa importante nga butang para matukod sing madinalag-on ang pag-asawahay amo ang pagpatawad. Nagabakod ang pag-updanay kon ang mag-asawa ‘padayon nga nagabatas sa isa kag isa kag nagapatawad sing kinabubut-on sa isa kag isa.’ (Col. 3:13) Sa pihak nga bahin, nagaluya ang relasyon kon ginatandaan sang mag-asawa ang ila mga sala sang una kag masami nga ginagamit ini para suknaan ang isa kag isa. Subong nga ang mga litik makapaluya sa isa ka bilding, ang aligutgot kag kaugot mahimo magtubo sa aton tagipusuon, amo nga mangin mabudlay para sa aton ang pagpatawad. Sa kabaliskaran, mangin mabakod ang pag-asawahay kon ang mag-asawa mangin mapinatawaron sa isa kag isa, kaangay sang pagpatawad ni Jehova sa ila.—Miq. 7:18, 19.

12. Paano matabunan sang gugma ang “madamo nga sala”?

¹² Ang matuod nga gugma “wala . . . nagaisip sang kahalitan.” “Ang gugma nagatabon sang madamo nga sala.” (1 Cor. 13:4, 5; basaha ang 1 Pedro 4:8.) Buot silingon, ang gugma wala nagaisip kon pila lang ka sala ang aton puede patawaron. Sang namangkot si apostol Pedro kon pila ka beses dapat patawaron ang isa, si Jesus nagsabat: “Tubtob sa kapituan kag pito ka beses.” (Mat. 18:21, 22) Ginapakita niya nga wala sing limitasyon kon pila ka beses dapat patawaron sang Cristiano ang iban.—Hulu. 10:12. *

13. Paano naton mabatuan ang huyog nga mangin indi mapinatawaron?

¹³ “Kon wala nagapatawaray ang mag-asawa,” siling ni Annette, “ang kaakig kag indi pagsalig nagatubo, kag hilo ini sa pag-asawahay. Ang pagkamapinatawaron nagapabakod sang pag-asawahay kag nagapasuod sa inyo.” Para mabatuan ang huyog nga indi magpatawad, tinguhai nga mangin mapinasalamaton kag mainapresyahon. Pirme hatagi sing sinsero nga komendasyon ang imo tiayon. (Col. 3:15) Matigayon ninyo ang kalinong sa hunahuna, paghiusa, kag mga pagpakamaayo sang Dios bangod sa pagkamapinatawaron.—Roma 14:19.

14, 15. Ano ang Bulawanon nga Pagsulundan, kag ano ang praktikal nga kapuslanan sini sa pag-asawahay?

¹⁴ Pat-od gid nga gusto mo nga padunggan ka kag tahuron. Ginaapresyar mo kon ginapamatian ang imo ginasiling kag ginahatagan sing konsiderasyon ang imo mga balatyagon. Pero nabatian mo na bala nga nagsiling ang isa, “Himuon ko man sa iya ang ginhimo niya sa akon”? Bisan pa nga mahimo mahangpan naton ina nga reaksion kon kaisa, ang Biblia nagasiling sa aton: “Dili ka magsiling, ‘Himoon ko sa iya ang subong sang ginhimo niya sa akon.’” (Hulu. 24:29) Ang matuod, si Jesus nagrekomendar sang mas maayo nga paagi sa pag-atubang sang mabudlay nga mga kahimtangan. Madamo ang nakahibalo sini nga pamatasan nga sa masami ginatawag nga Bulawanon nga Pagsulundan: “Ang luyag ninyo nga himuon sang mga tawo sa inyo, himua man ninyo ini sa ila.” (Luc. 6:31) Ginapahangop ni Jesus nga dapat naton pakig-angutan ang mga tawo suno sa gusto naton nga pagpakig-angot nila sa aton kag indi magbalos sing indi maayo sa indi maayo. Buot silingon, kon ano ang ginapaabot mo sa pag-asawahay dapat may himuon ka para matigayon ini.

¹⁵ Mapabakod sang mag-asawa ang ila relasyon kon sensitibo sila sa balatyagon sang isa kag isa. “Gintinguhaan namon nga iaplikar ang Bulawanon nga Pagsulundan,” siling sang isa ka bana sa Bagatnan nga Aprika. “Matuod, may mga tion nga nagalain ang buot namon, pero ginpanikasugan namon nga pakig-angutan ang isa kag isa sa paagi nga gusto namon nga pakig-angutan—may pagtahod kag dignidad.”

16. Ano ang indi dapat himuon sang mag-asawa sa isa kag isa?

¹⁶ Indi pag-ibulgar ang mga kaluyahon sang imo tiayon ukon tandaan ang iya indi maayo nga mga batasan—bisan sa lahog. Dumduma nga indi kompetisyon ang pag-asawahay para mahibaluan kon sin-o ang mas makusog, sin-o ang may mas mabaskog nga singgit, ukon kon sin-o ang mas madamo sing madumduman nga makapasakit nga mga tinaga. Matuod, tanan kita may mga kasawayan, kag kon kaisa mapaakig naton ang iban. Pero indi ini rason para maghambal ang mag-asawa sing makapasakit kag makapanubo nga mga tinaga batok sa isa, ukon mas malain pa, nga itiklod ukon sakiton ang isa kag isa.—Basaha ang Hulubaton 17:27; 31:26.

17. Paano maaplikar sang mga bana ang Bulawanon nga Pagsulundan?

¹⁷ Bisan pa sa pila ka kultura, ang mga lalaki nga nagadaugdaug ukon nagasakit sa ila asawa ginakabig nga matuod nga lalaki, ang Biblia nagasiling: “Ang makuli sa pagpangakig maayo pa sa gamhanan, kag ang nagagahum sang iya espiritu sang sa nagaagaw sing banwa.” (Hulu. 16:32) Nagakinahanglan sing kabakod para mailog ang pinakabantog nga tawo nga nagkabuhi, si Jesucristo, kag para makontrol ang balatyagon. Ang bana nga nagaabuso sa berbal kag pisikal sa iya asawa indi gid matuod nga lalaki, kag madula niya ang iya kaangtanan kay Jehova. Si salmista David, nga isa ka makusog kag maisog nga lalaki, nagsiling: “Magtindug nga may kahangawa, kag indi magpakasala; magpamalandong kamo sa inyo kaugalingon nga tagiposoon sa inyo higdaan, kag magpahimonong.”—Sal. 4:4.

18. Ngaa importante nga padayon nga palambuon ang gugma?

¹⁸ Basaha ang 1 Corinto 13:4-7. Ang gugma amo ang pinakaimportante nga kinaiya sa pag-asawahay. “Panapti ang inyo kaugalingon sang mapinalanggaon nga balatyagon nga may kaawa, kaayo, pagpaubos sang hunahuna, kalulo, kag pagkamapinasensiahon. Apang, dugang pa sa sining tanan nga butang, panapti ninyo ang inyo kaugalingon sang gugma, kay amo ini ang himpit nga higot sang paghiusa.” (Col. 3:12, 14) Ang masinakripisyuhon kag tulad-Cristo nga gugma amo ang nagapabakod sa relasyon sang mag-asawa. Bangod sini, indi maguba ang pag-asawahay bisan pa sang makaulugot nga mga batasan, malala nga balatian, problema sa pinansial, kag problema sa mga ugangan ukon bayaw.

19, 20. (a) Paano mangin madinalag-on ang mag-asawa sa pagtukod sang mabakod kag malipayon nga pag-asawahay? (b) Ano ang binagbinagon naton sa masunod nga artikulo?

¹⁹ Matuod nga nagakinahanglan sing mahigugmaon nga debosyon, pagkamainunungon, kag hanuot nga panikasog agod magmadinalag-on ang pag-asawahay. Imbes nga magbulagay sa tion sang mga kabudlayan, dapat determinado ang mag-asawa sa pagpabakod sang ila relasyon—indi lang para maamligan ini. Ang Cristiano nga mga mag-asawa nga debotado kay Jehova kag sa isa kag isa ginapahulag sang ila gugma sa Dios kag sa isa kag isa para masolbar ang ila mga problema, kay “ang gugma wala gid nagauntat.”—1 Cor. 13:8; Mat. 19:5, 6; Heb. 13:4.

²⁰ Ang pagtukod sing mabakod kag malipayon nga pag-asawahay ilabi na nga mabudlay sa sining “makahalanguyos nga mga tion.” (2 Tim. 3:1) Pero sa bulig ni Jehova, posible nga magmadinalag-on ini. Pero, kinahanglan gihapon pakigbatuan sang mag-asawa ang lapnag nga kaduluntan sa moral sining kalibutan. Binagbinagon sa masunod nga artikulo kon ano ang himuon sang mag-asawa para mapabakod ang espirituwal nga pangamlig sa ila pag-asawahay.