1. Ngaa ang pag-ilog kay Jesus nagapasuod sa aton kay Jehova?

GUSTO naton ilugon ang personalidad kag kinaiya sang mga tawo nga nanamian naton. Sa tanan nga tawo nga nagkabuhi sa duta, wala na sing makalabaw kay Jesucristo nga takus ilugon. Ngaa? Si Jesus mismo nagsiling: “Ang bisan sin-o nga nakakita sa akon nakakita man sa Amay.” (Juan 14:9) Pareho gid ang personalidad ni Jesus kag sang iya Amay amo nga kon makita mo ang Anak daw nakita mo man ang Amay. Gani, kon ginailog naton si Jesus, nagasuod kita kay Jehova, ang pinakamataas nga Persona sa uniberso. Daku gid nga pagpakamaayo ang pag-ilog sa personalidad kag kinaiya sang iya Anak!

2, 3. (a) Ngaa nag-aman si Jehova sing rekord para makilala naton ang iya Anak, kag ano ang ginapaabot ni Jehova nga himuon naton? (b) Ano ang binagbinagon naton sa sini nga artikulo kag sa masunod?

² Pero, paano naton makilala sing maayo si Jesus? Maayo na lang kay may rekord nga nagapakilala sa aton kay Jesus. Gin-aman ni Jehova ina nga sinulatan, nga mabasa sa Cristianong Griegong Kasulatan, bangod gusto niya nga makilala naton ang iya Anak agod mailog naton sia. (Basaha ang 1 Pedro 2:21.) Sa Biblia, ang halimbawa  nga ginbilin ni Jesus mapaanggid sa “mga tikang,” ukon mga agi sang tiil. Daw ginahambalan kita ni Jehova nga magsunod kay Jesus kag magtapak sa mga agi sang iya mga tiil. Siempre pa, nagbilin si Jesus sing himpit nga halimbawa para sa aton, pero kita indi himpit. Apang wala ginapaabot ni Jehova nga masundan naton sing himpit ang mga tikang ni Jesus. Sa baylo, ginapaabot niya nga ilugon naton ang iya Anak sa bug-os naton nga masarangan subong indi himpit nga mga tawo.

³ Gani, binagbinagon naton ang pila ka makagalanyat nga mga kinaiya ni Jesus. Sa sini nga artikulo, binagbinagon naton kon paano niya ginpakita ang pagkamapainubuson kag pagkamapinalanggaon; binagbinagon naman naton sa masunod ang iya kaisog kag pagkamahinantupon. Sa tagsa ka kinaiya, sabton naton ang tatlo ka pamangkot: Ano ang buot silingon sini? Paano ini ginpakita ni Jesus? Paano naton sia mailog?

4. Ano ang pagkamapainubuson?

⁴ Ano ang pagkamapainubuson? Sa sining bugalon nga kalibutan, mahimo hunahunaon sang iban nga ang pagkamapainubuson kaluyahon ukon kakulang sing kompiansa. Pero sa masami, indi ina matuod. Ang pagkamapainubuson nagakinahanglan sing kabakod kag kaisog. Ginhatagan ini sing kahulugan nga “ang panimuot nga kabaliskaran sang bugal kag pagkamatinaastaason.” Sa Cristianong Griegong Kasulatan, ang tinaga nga ginbadbad “mapainubuson” mahimo magakahulugan sing “may mapainubuson nga hunahuna.” (Fil. 2:3, footnote) Ang pagkamapainubuson nagasugod sa kon paano naton ginatamod ang aton kaugalingon. “Ang pagkamapainubuson amo ang paghibalo kon daw ano kita ka kubos sa atubangan sang Dios,” siling sang isa ka diksionaryo sa Biblia. Kon mapainubuson kita sa atubangan sang Dios, likawan man naton nga maghunahuna nga labaw kita sa aton isigkatawo. (Roma 12:3) Indi mahapos sa indi himpit nga mga tawo nga palambuon ang pagkamapainubuson. Pero mapalambo naton ini kon pamalandungan naton ang aton kahimtangan sa atubangan sang Dios kag sundon ang mga tikang sang iya Anak.

5, 6. (a) Sin-o si Miguel nga arkanghel? (b) Paano ginpakita ni Miguel ang pagkamapainubuson?

⁵ Paano ginpakita ni Jesus ang pagkamapainubuson? Ang Anak sang Dios mapainubuson halin sang una. Ginpakita niya ini sang sia isa ka gamhanan nga espiritu sa langit kag sang sia isa ka himpit nga tawo sa duta. Binagbinaga ang pila ka halimbawa.

⁶ Sa iya panimuot. Ang manunulat sang Biblia nga si Judas nagrekord sang pagluntad ni Jesus antes sia nangin tawo. (Basaha ang Judas 9.) Subong si Miguel nga arkanghel, si Jesus “nakigsuay sa Yawa tuhoy sa lawas ni Moises.” Dumduma nga sang napatay si Moises, ginlubong sia ni Jehova sa wala mahibaluan nga lugar. (Deut. 34:5, 6) Ayhan gusto sang Yawa gamiton ang bangkay ni Moises para pasanyugon ang butig nga pagsimba. Ano man ang tuyo sang Yawa, maisugon nga ginpunggan ini ni Miguel. Ang isa ka reperensia nagsiling nga ang Griegong termino nga “nakigsuay,” “ginagamit man may kaangtanan sa kaso sa korte” kag mahimo nagapahangop nga “ginpamatukan ni Miguel ang Yawa sa pagkuha sa lawas ni Moises.” Pero nahibaluan sang Pangulo nga Anghel nga wala sia sing kinamatarong sa pagpadapat sang paghukom. Sa baylo, gintugyan niya ini sa Supremo nga Hukom nga si Jehova. Gani wala gin-agaw ni Miguel ang awtoridad sang Dios bisan pa ginpaakig sia. Mapainubuson gid sia!

7. Paano nangin mapainubuson si Jesus sa iya panghambal kag buhat?

⁷ Sa iya ministeryo sa duta, nangin mapainubuson gid si Jesus sa iya panghambal kag buhat. Sa iya panghambal. Wala sia nagpahambog.  Sa baylo, ginhatag niya ang tanan nga himaya sa iya Amay. (Mar. 10:17, 18; Juan 7:16) Wala niya ginpakanubo ang iya mga disipulo ukon ginpabatyag nga kubos sila. Sa baylo, ginhatagan niya sila sing dignidad, gindayaw sila sa maayo nga nakita niya sa ila, kag ginpabutyag ang iya pagsalig sa ila. (Luc. 22:31, 32; Juan 1:47) Sa iya buhat. Nagkabuhi si Jesus sing simple, nga wala nabug-atan sang madamo nga materyal nga butang. (Mat. 8:20) Handa sia sa paghimo sing pinakakubos nga mga hilikuton. (Juan 13:3-15) Ginpakita gid niya ang pagkamapainubuson paagi sa pagkamatinumanon. (Basaha ang Filipos 2:5-8.) Indi kaangay sang arogante nga mga tawo nga indi gusto magtuman, mapainubuson si Jesus nga nagpasakop sa kabubut-on sang Dios para sa iya, kag “nangin matinumanon tubtob sa kamatayon.” Maathag gid nga si Jesus, ang Anak sang tawo, “mapainubuson sing tagipusuon.”—Mat. 11:29.

8, 9. Paano naton mapakita ang pagkamapainubuson?

⁸ Paano naton mailog ang pagkamapainubuson ni Jesus? Sa aton panimuot. Ang pagkamapainubuson nagapugong sa aton nga mag-abuso sa aton awtoridad. Kon ginakilala naton nga wala kita sing kinamatarong sa paghukom, indi naton pagpakalainon ang iban sa ila mga sayop ukon duhaduhaan ang ila mga motibo. (Luc. 6:37; Sant. 4:12) Ang pagkamapainubuson nagabulig sa aton nga indi “mangin tuman ka matarong,” nga nagapakanubo sa mga tawo nga mahimo wala sing mga ikasarang ukon mga pribilehiyo nga yara sa aton. (Man. 7:16) Ang mapainubuson nga mga gulang wala nagakabig sa ila kaugalingon nga mas labaw sangsa ila mga masigkatumuluo. Sa baylo, ini nga mga manugbantay ‘nagakabig sa iban nga labaw sa ila’ kag nagagawi subong kubos.—Fil. 2:3; Luc. 9:48.

⁹ Binagbinaga ang halimbawa ni W. J. Thorn, nga isa ka pilgrim, ukon nagalakbay nga manugtatap, sugod sang 1894. Sa tapos sang tinuig nga pagpangalagad sa sina nga hilikuton, ginpatawag sia sa Kingdom Farm sa New York para magsagod sang mga manok. Sia nagsiling: “Sa tagsa ka tion nga ginahatagan ko sing daku nga importansia ang akon kaugalingon, nagapahigad ako kag nagasiling sa akon kaugalingon: ‘Ikaw nga isa lamang ka yab-ok. Ano ang ginapabugal mo?’” (Basaha ang Isaias 40:12-15.) Mapainubuson gid nga panimuot!

10. Paano naton mapakita ang pagkamapainubuson sa aton panghambal kag buhat?

¹⁰ Sa aton panghambal. Kon mapainubuson gid kita, makita ini sa aton panghambal. (Luc. 6:45) Kon nagapakig-istorya sa iban, likawan naton nga magpabugal sang aton mga nahimuan kag mga pribilehiyo. (Hulu. 27:2) Sa baylo, tan-awon naton ang maayo sa aton mga kauturan kag komendahan sila sa ila maayo nga mga kinaiya, ikasarang, kag mga nahimuan. (Hulu. 15:23) Sa aton buhat. Ang mapainubuson nga mga Cristiano wala nagahingamo nga mangin prominente sa sini nga sistema. Gusto nila ang simple nga kabuhi, kag handa pa gani sila magtrabaho sang ginakabig sang kalibutan nga kubos nga hilikuton agod maalagad nila sing bug-os si Jehova. (1 Tim. 6:6, 8) Labaw sa tanan, mapakita naton ang pagpaubos paagi sa aton pagkamatinumanon. Kinahanglan ang pagkamapainubuson para “mangin matinumanon sa mga nagapanguna” sa kongregasyon, kag para mabaton naton kag masunod ang panuytoy sang organisasyon ni Jehova.—Heb. 13:17.

11. Ipaathag ang kahulugan sang pagkamapinalanggaon.

¹¹ Ano ang pagkamapinalanggaon? Ang tinaga nga “pagpalangga” amo ang “tanda sang, reaksion sa, ukon pagpakita sing malum-ok nga mga balatyagon.” Ang pagpalangga isa ka aspekto sang gugma kag naangot sa “malum-ok nga mga balatyagon,” subong sang kaluoy.  Ginsambit sang Kasulatan ang “mapinalanggaon nga kaluoy,” kag “pagpalangga.” (Luc. 1:78; 2 Cor. 1:3; Fil. 1:8) Parte sa pagpalig-on sang Kasulatan nga magpakita sang kaluoy, ang isa ka reperensia sa Biblia nagasiling: “Ini nga pagpalig-on indi lang isa ka pangabay sa aton nga magbatyag kita sing kaluoy sa nagakinahanglan. Ginapalig-on kita nga maghulag gid kag magbulig sa iban para makaumpisa sila liwat.” Ang pagpalangga amo ang puersa nga nagapahulag sa aton. Ang mapinalanggaon nga tawo nagatinguha gid nga magbulig sa iban.

12. Ano ang nagapakita nga si Jesus nagbatyag sing mapinalanggaon nga kaluoy sa iban, kag ano ang iya ginhimo bangod sini?

¹² Paano ginpakita ni Jesus ang pagpalangga? Sa iya balatyagon kag buhat. Si Jesus nagbatyag sing mapinalanggaon nga kaluoy sa iban. Sang nakita niya ang iya abyan nga si Maria kag ang mga nagahibi sa kamatayon sang utod sini nga si Lazaro, wala gintago ni Jesus ang ‘pagtulo sang iya luha.’ (Basaha ang Juan 11:32-35.) Dayon, ginbanhaw niya si Lazaro bangod sang iya tinagipusuon nga kaluoy—pareho sang iya nabatyagan sang ginbuhi niya ang anak sang isa ka balo. (Luc. 7:11-15; Juan 11:38-44) Bangod sinang mapinalanggaon nga buhat, mahimo nga ginhatagan ni Jesus si Lazaro sing paglaum nga matigayon ang kabuhi sa langit. Antes sini nga hitabo, si Jesus “naluoy” sa kadam-an nga nagpalapit sa iya. Bangod sa kaluoy, “gintudluan niya sila sing madamo nga butang.” (Mar. 6:34) Nagbag-o gid ang kabuhi sang bisan sin-o nga nagbaton sang iya mga panudlo! Talupangda nga ang pagkamapinalanggaon ni Jesus indi lamang isa ka balatyagon; nagpahulag ini sa iya nga buligan ang iban.—Mat. 15:32-38; 20:29-34; Mar. 1:40-42.

13. Paano si Jesus naghambal sing mainayuhon sa iban? (Tan-awa ang piktyur sa umpisa sini nga artikulo.)

¹³ Sa iya panghambal. Napahulag si Jesus sa paghambal sing mainayuhon sa iban ilabi na sa mga ginapigos bangod sang iya pagkamapinalanggaon. Gin-aplikar ni apostol Mateo kay Jesus ang ginsiling ni Isaias: “Indi niya pagbalion ang tabun-ak nga nadugmok, kag indi niya pagpalungon ang pabilo nga nagapiraw.” (Isa. 42:3; Mat. 12:20) Si Jesus naghambal sing makapalig-on sa mga tawo nga ginpaanggid sa nadugmok nga tabun-ak ukon nagapirawpiraw nga pabilo. Ginbantala niya ang mensahe sang paglaum para ‘bugkusan ang pilas sang mga nagakalisod.’ (Isa. 61:1) Gin-agda niya ang mga “ginabudlayan kag ginabug-atan” nga magpalapit sa iya, nga nagapasalig sa ila nga “makakita [sila] sing kapahuwayan.” (Mat. 11:28-30) Ginpasalig ni Jesus ang iya mga sumulunod nga palangga sang Dios ang tagsa Niya ka sumilimba, lakip na ang “mga kubos”—ang mga ginakabig nga indi salapakon sa pagtamod sang kalibutan.—Mat. 18:12-14; Luc. 12:6, 7.

14. Paano naton mapalambo ang pagpalangga sa iban?

¹⁴ Paano naton mailog si Jesus sa pagpakita sing pagpalangga? Sa aton balatyagon. Mahimo nga indi natural sa aton nga magpakita sing pagpalangga, pero ginapalig-on kita sang Biblia nga palambuon ini. “Ang mapinalanggaon nga kaawa” bahin sang bag-o nga personalidad nga dapat isuksok sang tanan nga Cristiano. (Basaha ang Colosas 3:9, 10, 12.) Paano mo mapalambo ang pagpalangga sa iban? Buksi sing masangkad ang imo tagipusuon. (2 Cor. 6:11-13) Mamati sing maayo kon nagasugid ang isa sa imo sang iya mga ginabatyag kag mga ginakabalak-an. (Sant. 1:19) Gamita ang imo imahinasyon kag pamangkuta ang imo kaugalingon: ‘Kon ako ang yara sa iya sitwasyon, ano ang akon batyagon? Ano ang akon kinahanglan?’—1 Ped. 3:8.

15. Paano naton mabuligan ang mga tawo nga daw pareho sa nadugmok nga tabun-ak ukon nagapirawpiraw nga pabilo?

 ¹⁵ Sa aton buhat. Ang pagkamapinalanggaon nagapahulag sa aton nga buligan ang iban, ilabi na ang mga tawo nga daw pareho sa nadugmok nga tabun-ak ukon nagapirawpiraw nga pabilo. Paano? “Maghibi upod sa mga tawo nga nagahibi,” siling sang Roma 12:15. Ang mga napung-awan mahimo nga mas nagakinahanglan sing empatiya sangsa mga solusyon. Ang isa ka utod nga babayi nga nalugpayan sang mga masigkatumuluo sang napatay ang iya bata nga babayi nagsiling: “Naapresyar ko gid sang nagbisita ang akon mga abyan kag naghibi upod sa akon.” Mapakita man naton ang pagpalangga paagi sa mainayuhon nga mga buhat. May kilala ka bala nga balo nga nagakinahanglan sing bulig sa mga kalay-uhon sa ila balay? May tigulang bala nga Cristiano nga nagakinahanglan sing masakyan pakadto sa mga miting, sa latagon, ukon sa doktor? Bisan ang gamay nga buhat sang kaayo may daku nga epekto sa utod nga nagakinahanglan sing bulig. (1 Juan 3:17, 18) Labaw sa tanan, mapakita naton ang mapinalanggaon nga pag-ulikid sa iban paagi sa aton pagpakigbahin sing bug-os sa ministeryo. Amo ini ang pinakamaayo nga paagi para mabuligan ang mga interesado!

16. Ano ang aton mahimo isiling para mapalig-on ang mga napung-awan?

¹⁶ Sa aton panghambal. Ang aton pagpalangga sa iban nagapahulag sa aton nga maghambal sing ‘makapalugpay sa mga ginapung-awan.’ (1 Tes. 5:14) Ano ang aton isiling para mapalig-on sila? Mapalig-on naton sila paagi sa pagpabutyag sang aton matuod nga pag-ulikid kag pagkabalaka sa ila. Makahatag man kita sing sinsero nga komendasyon para mabuligan sila nga makita ang ila positibo nga mga kinaiya kag mga ikasarang. Mapahanumdom naton sa ila nga ginbuyok sila ni Jehova sa iya Anak, gani hamili sila para sa Iya. (Juan 6:44) Mapasalig naton sila nga nagaulikid gid si Jehova sa iya mga alagad nga “nagaantos” ukon “nalisdan.” (Sal. 34:18) Ang aton mainayuhon nga panghambal makapaayo sa mga nagakinahanglan sing lugpay.—Hulu. 16:24.

17, 18. (a) Ano ang ginapaabot ni Jehova sa mga gulang sa ila pagpakig-angot sa iya mga karnero? (b) Ano ang binagbinagon naton sa masunod nga artikulo?

¹⁷ Mga gulang, ginapaabot ni Jehova nga palanggaon ninyo ang iya mga karnero. (Binu. 20:28, 29) Dumduma, responsibilidad ninyo nga pakaunon, palig-unon, kag paumpawan ang iya mga karnero. (Isa. 32:1, 2; 1 Ped. 5:2-4) Gani ang isa ka gulang nga mapinalanggaon wala nagatinguha sa pagdominar sa mga karnero paagi sa paghimo sing mga pagsulundan ukon pagpakonsiensia sa ila para mapilitan sila nga maghimo sang indi na nila masarangan. Sa baylo, ginatinguhaan niya nga mapahalipay sila, kag nagasalig nga ang ila gugma kay Jehova amo ang magapahulag sa ila nga alagaron sia sa ila bug-os nga masarangan.—Mat. 22:37.

¹⁸ Kon pamalandungan naton ang pagkamapainubuson kag pagkamapinalanggaon ni Jesus, mapahulag gid kita nga magpadayon sa pagsunod sa iya mga tikang. Binagbinagon naton sa masunod nga artikulo ang duha pa ka makagalanyat nga kinaiya ni Jesus—ang iya kaisog kag pagkamahinantupon.