Ang mga tawo nga alerdyi sa mga pahumot nagaatubang gid sing kabudlayan. Mahimo nga makahaklo sila sing mga pahumot sa ila pagpakig-angot sa iban kada adlaw. Gani, may mga nagapamangkot kon puede bala pangabayon ang mga kauturan nga indi maggamit sing mga pahumot sa Cristianong mga miting, asembleya, kag mga kombension.

Pat-od nga wala sing Cristiano nga hungod nga magapabudlay sa pagtambong sang iban sa Cristianong mga pagtilipon. Tanan kita nagakinahanglan sing pagpalig-on gikan sa aton mga miting. (Heb. 10:24, 25) Gani ang bisan sin-o nga may grabe nga alerdyi sa pahumot kag nabudlayan sa pagtambong sa mga miting mahimo nga makig-istorya sa mga gulang parte sini. Bisan pa indi Makasulatanhon ukon indi nagakaigo nga maghimo sing mga pagsulundan parte sa paggamit sing mga pahumot para sa mga nagatambong sa mga miting, mahimo nga maghatag sing impormasyon ang mga gulang para mapahangop ang mga miembro sang kongregasyon parte sa sini nga problema. Depende sa mga kahimtangan, mahimo nga binagbinagon sang mga gulang sa lokal nga mga kinahanglanon nga bahin sa Miting sa Serbisyo ang mga nabalhag sang una nga impormasyon, ukon maghimo sila sing mataktikanhon nga pahibalo parte sa sini nga problema. * Pero indi maayo nga pirme ini ilakip sang mga gulang sa mga pahibalo. May mga interesado kag mga bisita nga nagatambong sa aton mga miting kag wala sila nakahibalo sini nga problema, kag gusto naton nga mangin komportable sila sa ila pagtambong. Wala sing dapat magbatyag nga indi mapahamtang bangod lang haganhagan sila nga nagagamit sing mga pahumot.

Kon may amo sini nga problema kag kon ginatugot sang mga kahimtangan, makahimo sing kahimusan ang hubon sang mga gulang para sa mga may alerdyi sa mga pahumot nga magpungko sila sa bahin sang Kingdom Hall nga medyo malayo sa mga kauturan. Halimbawa, mahimo sila magpungko sa isa ka hulot sa diin mabatian nila ang mga miting. Kon indi ini masolbar, kag grabe gihapon ang pag-antos sang pila, mahimo nga irekord sang kongregasyon ang mga miting para sa ila ukon maghimo sing kahimusan para mabatian nila ini sa ila balay paagi sa telepono, pareho sang ginahimo sa iban nga indi makahalin sa ila balay.

Tuhoy sa sini nga butang, dapat man kita magpakita sing pasunaid kon nagatambong kita sa rehiyonal nga kombension. Bangod ang kalabanan nga kombension ginahiwat sa sirado nga mga tilipunan, kag wala sing lugar nga mapapungkuan sa mga may alerdyi sa mga pahumot, pagpakita gid sing gugma kon limitahan naton ang paggamit sing maisog nga mga pahumot sa sini nga mga pagtilipon. Pero, indi ini dapat paghimuon ukon pagkabigon nga isa ka pagsulundan sa mga miting sang kongregasyon.

Samtang nagakabuhi kita sa sining sistema sang mga butang, tanan kita nagaantos sa mga resulta sang aton napanubli nga di-kahimpitan. Ginaapresyar gid naton ang panikasog sang iban nga mapahaganhagan ang aton pag-antos! Mahimo nga sakripisyo para sa iban nga indi maggamit sing mga pahumot agod indi mabudlayan ang mga kauturan sa pagtambong sa Cristianong mga miting. Pero mahimo kita pahulagon sang gugma nga himuon ini.

Kilala sang mga nagabasa sing Biblia si Poncio Pilato bangod sang iya papel sa pagbista kag pagpapatay kay Jesus. (Mat. 27:1, 2, 24-26) Apang ang iya ngalan makita man sing pila ka beses sa iban nga rekord sang kasaysayan nga kadungan sang Biblia. Suno sa The Anchor Bible Dictionary, ang mga rekord sa sekular nga kasaysayan nga nagapatuhoy sa iya “mas madamo kag mas detalyado sangsa kay bisan sin-o nga Romano nga gobernador sang Judea.”

Ang ngalan ni Pilato pirme makita sa mga sinulatan sang istoryador nga Judiyo nga si Josephus, nga nagrekord sang tatlo ka espesipiko nga hitabo may kaangtanan sa mga problema ni Pilato samtang sia ang gobernador sa Judea. Ang ikap-at nga hitabo gindugang sang istoryador nga Judiyo nga si Philo. Ang Romano nga manunulat nga si Tacitus, nga nagrekord sang kasaysayan sang mga emperador sang Roma, nagkompirmar nga si Poncio Pilato ang nagsugo nga patyon si Jesus sa tion sang paggahom ni Tiberio.

Sang 1961, ang mga arkeologo nga nagapangutkot sa dumaan nga teatro sang Roma sa Cesarea, Israel, nakasapo sing tapitapi nga bato diin maathag nga mabasa ang Latin nga ngalan ni Pilato. Indi kompleto ang inskripsion (nga makita diri), pero ginapatihan nga amo ini ang mabasa: “Para sa dungganon nga mga dios (ini nga) Tiberieum gindedikar ni Poncio Pilato, ang Prepekto sang Judea.” Ang tinukod nga ginpatuhuyan mahimo nga isa ka templo nga nagapadungog kay Emperador Tiberio sang Roma.

Ang “Mga Pamangkot Gikan sa mga Bumalasa” sa Hulyo 15, 2002 nga Ang Lalantawan, nagsiling nga dapat magtakdong ang utod nga babayi kon nagadumala sing pagtuon sa Biblia upod ang lalaki nga manugbantala, bawtismado man ukon indi. Ang dugang nga pagbinagbinag sini nagapakita nga kinahanglan bag-­uhon ini nga panuytoy.

Kon bawtismado na ang lalaki nga manugbantala nga nagaupod sa utod nga babayi sa pagdumala sang regular nga pagtuon sa Biblia, dapat sia magtakdong. Ginatahod niya ang kahimusan ni Jehova sa pagkaulo sa sulod sang Cristianong kongregasyon bangod sia ang nagahimo sang katungdanan nga kinaandan na nga ginahimo sang mga utod nga lalaki. (1 Cor. 11:5, 6, 10) Pero mahimo niya pangabayon ang utod nga lalaki nga mangamuyo kon makasarang sia kag kalipikado.

Sa pihak nga bahin, kon ang upod sang utod nga babayi indi bawtismado nga manugbantala nga lalaki kag indi niya ini bana, wala na ginapatuman sang Kasulatan nga magtakdong sia. Pero, bangod sa konsiensia sang iban nga utod nga babayi, mahimo sila magtakdong sa sini nga kahimtangan.