1. Sa ano nga tion kita nagakabuhi karon?

NAGAKABUHI kita sa mabudlay nga mga tion. Gintawag sang Biblia ang tion nga nagsugod sang 1914 nga “katapusan nga mga adlaw.” Ining “makahalanguyos nga mga tion nga mabudlay atubangon” gintandaan sang mga kahimtangan nga wala pa gid maeksperiensiahan sang mga tawo antes ang 1914. (2 Tim. 3:1-5) Dugang pa, padayon nga magalala ini nga kahimtangan, kay nagtagna ang Biblia nga “ang malaut nga mga tawo kag mga impostor magalain pa gid.”—2 Tim. 3:13.

2. Ano ang makita sa kalingawan karon sang kalibutan? (Tan-awa ang piktyur sa umpisa sini nga artikulo.)

² Agod malingaw, madamo karon ang nagatan-aw ukon nagahimo sang mga butang nga ginasiling sang Biblia nga masingki, imoral, espiritistiko, ukon indi diosnon sa pila ka paagi. Halimbawa, ginapagua sang Internet, mga programa sa telebisyon, mga pelikula, mga nobela, kag mga artikulo sa magasin ang kasingki kag imoralidad nga daw maayo man. Ang wala ginabaton sadto nga mga buhat karon legal na sa pila ka lugar. Apang wala sina ginahimo nga mangin kalahamut-an ini sa Dios.—Basaha ang Roma 1:28-32.

3. Paano sa masami ginatamod ang mga nagasunod sa mga talaksan sang Dios?

 ³ Ginakangil-aran sang unang siglo nga mga sumulunod ni Jesus ang mahigko nga kalingawan. Bangod sini kag sang ila diosnon nga paggawi, ginapakahuy-an sila kag ginahingabot sang iban. “Natingala sila nga wala kamo [mga Cristiano] nagapadayon sa pagdalagan upod sa ila padulong sa amo man nga lamawan sang pagpatuyang,” sulat ni apostol Pedro, “gani ginapakalain nila kamo.” (1 Ped. 4:4) Karon, ginatamod man sang kalibutan nga “daw sa iban” ang mga nagasunod sa mga talaksan sang Dios. Dugang pa, “ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.”—2 Tim. 3:12.

4. Ano ang laygay sa aton sang Kasulatan tuhoy sa sini nga kalibutan?

⁴ Ang Kasulatan naglaygay sa mga luyag maghimo sang kabubut-on sang Dios nga indi paghigugmaon ini nga kalibutan kag ang mga ginahimo sini. (Basaha ang 1 Juan 2:15, 16.) Ang relihioso, pulitikal, kag komersial nga mga elemento sining kalibutan—lakip ang mga nagapasayod sa sini—yara sa impluwensia sang “dios sini nga sistema sang mga butang,” si Satanas nga Yawa. (2 Cor. 4:4; 1 Juan 5:19) Gani, subong mga Cristiano dapat pilion naton ang aton kaupdanan. Ang Pulong sang Dios nagpahayag sining sadsaran nga kamatuoran: “Indi kamo magpadaya. Ang pagpakig-upod sa malain nga mga tawo nagapalain sang mapuslanon nga mga batasan.”—1 Cor. 15:33.

5, 6. Sin-o ang dapat naton likawan nga pakig-updan, kag ngaa?

⁵ Agod malikawan nga mapalain ang aton maayong pamatasan, indi kita makigsuod sa mga nagahimo sang malain. Naaplikar ini indi lang sa mga di-tumuluo nga nagahimo sang mabug-at nga mga sala kundi nagalakip man sa mga nagapangangkon nga nagasimba kay Jehova apang hungod nga nagalapas sang iya mga kasuguan. Kon ina nga mga Cristiano nagahimo sang serioso nga mga sala kag wala nagahinulsol, wala kita nagapadayon sa pagpakig-upod sa ila.—Roma 16:17, 18.

⁶ Kon makig-upod kita sa wala nagasunod sa kasuguan sang Dios, mahimo nga himuon man naton ang ila ginahimo agod batunon nila kita. Halimbawa, kon nagapakigsuod kita sa imoral nga mga tawo, mahimo nga masulay man kita nga maghimo sang imoralidad. Amo ina ang natabo sa pila ka bawtismado nga Cristiano, kag ang pila sa ila gin-disfellowship bangod wala sila maghinulsol. (1 Cor. 5:11-13) Magluwas lang kon maghinulsol sila, ang ila kahimtangan mangin pareho gid sa ginlaragway ni Pedro.—Basaha ang 2 Pedro 2:20-22.

7. Sin-o ang dapat pilion naton nga mangin suod nga kaupod?

⁷ Bisan pa luyag naton nga magpakita sing kaayo sa mga wala nagasunod sa kasuguan sang Dios, indi kita dapat mangin suod nila nga kaupod ukon abyan. Gani, sala nga ang isa ka Saksi ni Jehova nga indi minyo makig-deyt sa indibiduwal nga indi dedikado kag matutom sa Dios kag wala nagatahod sa Iya mataas nga talaksan. Ang paghupot sang Cristianong integridad mas importante sangsa mangin kilala upod sa mga wala nagakabuhi suno sa kasuguan ni Jehova. Dapat nga ang aton suod nga kaupdanan amo lamang ang nagahimo sang kabubut-on sang Dios. Si Jesus nagsiling: “Ang nagatuman sang kabubut-on sang Dios amo ang akon utod nga lalaki, utod nga babayi kag iloy.”—Mar. 3:35.

8. Paano naapektuhan sang malain nga kaupdanan ang katawhan sang Israel sadto?

⁸ Naeksperiensiahan sang mga Israelinhon ang makahalalit nga epekto sang malain nga kaupdanan. Sang ginluwas sila ni Jehova sa pagkaulipon sa Egipto kag gintuytuyan padulong sa Ginsaad nga Duta, ginsilingan niya sila kon paano makig-angot sa mga nagapuyo didto: “Indi kamo dapat magyaub sa ila mga dios  ukon mag-alagad sa ila, kag indi ninyo dapat pag-ilugon ang ila ginahimo. Sa baylo, dapat ninyo sila laglagon kag dugmukon ang ila sagrado nga mga haligi. Dapat kamo mag-alagad kay Jehova nga inyo Dios.” (Ex. 23:24, 25) Apang ang kalabanan sa mga Israelinhon wala nagpamati sa Dios. (Sal. 106:35-39) Bangod indi sila matutom sa Dios, ginsilingan sila ni Jesus sang ulihi: “Ang inyo balay pabay-an sa inyo.” (Mat. 23:38) Ginsikway ni Jehova ang Israel, kag ginsaylo ang iya pagpakamaayo sa bag-o lang maporma nga Cristianong kongregasyon.—Binu. 2:1-4.

9. Ngaa makahalalit ang kalabanan nga ginapagua sa media sang kalibutan?

⁹ Kalabanan sa ginapagua sa media sang kalibutan makahalalit sa espirituwalidad sang mga Cristiano. Ini nga mga materyal wala gindesinyo agod palig-unon ang pagtuo kay Jehova kag sa iya mga saad. Sa baylo, ginapabanaag sini ang malaut nga kalibutan ni Satanas kag ang mga tulumuron sini. Gani kinahanglan maghalong gid kita agod indi kita magpili sang mga materyal nga makapukaw sang “kalibutanon nga mga kailigbon.”—Tito 2:12.

10. Ano ang matabo sa makahalalit nga balasahon kag talan-awon sang kalibutan?

¹⁰ Sa indi madugay, ang makahalalit nga balasahon kag talan-awon wala na. Ini tanan pagadulaon kon ang kalibutan nga ginarepresentar sini—ang kalibutan ni Satanas—laglagon na. Ang Pulong sang Dios nagsiling: “Ang kalibutan nagataliwan kag amo man ang kailigbon sini, apang ang isa nga nagahimo sang kabubut-on sang Dios nagapabilin sing dayon.” (1 Juan 2:17) Sa amo man ang salmista nag-amba: “Ang mga malauton laglagon, apang ang mga nagalaum kay Jehova magapanubli sang duta. Apang ang mga mahagop magapanubli sang duta, kag mangin malipayon gid sila sa bugana nga paghidait.” Tubtob san-o? “Ang mga matarong magapanubli sang duta, kag magapuyo sila sa sini sa wala sing katubtuban.”—Sal. 37:9, 11, 29.

11. Paano ginaamanan sang Dios sing espirituwal nga pagkaon ang iya katawhan?

¹¹ Kabaliskaran sa ginapagua sang kalibutan, ang ginapagua nga mga materyal sang organisasyon ni Jehova sa sining katapusan nga mga adlaw nagapalig-on sang paggawi nga nagadul-ong sa kabuhi nga dayon. Sa iya pangamuyo kay Jehova, si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Paagi sa iya organisasyon, ang aton langitnon nga Amay nagaaman sing bugana nga makapalig-on nga espirituwal nga pagkaon. Ginpakamaayo gid kita tungod sa mga magasin, brosyur, libro, video, kag mga artikulo sa Internet nga nagapasanyog sang matuod nga pagsimba! Nag-aman man ang organisasyon sang Dios sang mga miting sa kapin sa 110,000 ka kongregasyon sa bug-os nga kalibutan. Sa sini nga mga miting, asembleya, kag kombension ginabinagbinag naton ang mga materyal nga napasad sa Biblia nga nagapalig-on sang aton pagtuo sa Dios kag sa iya mga saad.—Heb. 10:24, 25.

12. Ipaathag ang laygay sang Biblia nga magminyo “sa sumulunod lamang sang Ginuo.”

¹² Ang pagpili sang kaupdanan ilabi na nga importante sa mga indi minyo nga Cristiano nga luyag magminyo. Maathag ang laygay sang Pulong sang Dios sa ila: “Indi kamo magpagota sing sampihakan upod sa mga indi tumuluo. Kay paano mag-updanay ang pagkamatarong kag pagkamalinapason? Ukon paano mag-ambitanay ang kapawa kag kadudulman?” (2 Cor. 6:14) Ang Biblia nagalaygay sa mga alagad sang Dios nga luyag magminyo nga magminyo “sa sumulunod lamang sang Ginuo,” buot silingon, magminyo lamang sang dedikado kag bawtismado nga sumilimba ni  Jehova nga nagakabuhi suno sa mga panudlo sang Kasulatan. (1 Cor. 7:39) Paagi sa pagminyo sang masigkatumuluo, ang isa ka Cristiano makatigayon sang isa ka kaupod nga dedikado kay Jehova kag magabulig sa ila nga mahuptan ang ila integridad sa iya.

13. Ano nga sugo tuhoy sa pagminyo ang ginhatag sang Dios sa mga Israelinhon?

¹³ Nakahibalo si Jehova kon ano ang pinakamaayo para sa iya mga alagad, kag wala gid nagabag-o ang iya pagtamod tuhoy sa pagminyo. Talupangda ang iya simple kag maathag nga sugo sa mga Israelinhon paagi kay Moises. Tuhoy sa mga nagaistar sa kaingod nga mga pungsod—mga katawhan nga wala nagaalagad kay Jehova—ginhambalan ang mga Israelinhon: “Indi kamo magpamana ukon magpangasawa sa ila. Indi ninyo pag-ihatag ang inyo anak nga babayi sa ila anak nga lalaki. Indi ninyo pagkuhaon ang ila anak nga babayi para sa inyo anak nga lalaki. Kay patalikdon nila ang inyo anak sa pagsunod sa akon agod mag-alagad sa iban nga mga dios; dayon magadabdab ang kaakig ni Jehova batok sa inyo, kag laglagon niya kamo dayon.”—Deut. 7:3, 4.

14, 15. Ano ang epekto sang pagbalewala ni Solomon sa sugo ni Jehova?

¹⁴ Sa umpisa sang paghari ni Solomon nga anak ni David, nangamuyo sia sing kaalam, kag ginhatag ini sang Dios sa iya. Gani nangin bantog si Hari Solomon nga maalam nga hari sang isa ka mahamungaya nga pungsod. Sang nagbisita ang rayna sang Seba kay Solomon, nagsiling sia: “Wala ako magpati sa akon nabalitaan tubtob nga nakita ko ini mismo. Wala pa gali sa katunga ang nasugid sa akon. Ang imo kaalam kag kahamungayaan labaw pa sangsa akon nabalitaan.” (1 Hari 10:7) Apang si Solomon nangin halimbawa sa kon ano ang malain nga matabo sa isa nga wala nagatuman sa sugo nga indi magminyo sa indi sumulunod sang Dios.—Man. 4:13.

¹⁵ Bisan sa tanan nga ginhimo sa iya sang Dios, ginbalewala ni Solomon ang sugo sang Dios nga indi magpangasawa sang mga babayi sa palibot nga pungsod, mga babayi nga wala nagasimba kay Jehova. “Naghigugma si Solomon sa madamo pa nga dumuluong nga mga babayi” kag sang ulihi may 700 sia ka asawa kag 300 ka babayi. Ano ang resulta? Sang tigulang na si Solomon, “ginbuyok sang iya mga asawa ang iya tagipusuon nga magsunod sa iban nga mga dios, . . . kag ginhimo ni Solomon ang malain sa panulok ni Jehova.” (1 Hari 11:1-6) Ang malain nga kaupdanan ni Solomon nagdaug sang iya kaalam kag naghimo sa iya nga mapahilayo sa matuod nga pagsimba. Paandam gid ini sa mga Cristiano nga nagahunahuna nga magminyo sa isa nga wala nagahigugma kay Jehova!

16. Ano nga laygay sang Kasulatan ang naaplikar sa alagad sang Dios nga minyo sa indi tumuluo?

¹⁶ Ano abi kon ang isa nangin sumilimba sang Dios samtang minyo sia sa isa nga indi tumuluo? Ang Biblia nagsiling: “Kamo nga mga asawa, magpasakop kamo sa inyo bana, agod ang bisan sin-o sa ila nga wala nagatuman sa pulong, madaug nga wala sang pulong paagi sa paggawi sang ila asawa.” (1 Ped. 3:1) Ini ginpatalupangod sa mga Cristiano nga asawa, apang naaplikar man sa mga bana nga nangin sumilimba ni Jehova samtang kasado sa isa ka indi tumuluo. Maathag ang laygay sang Biblia: Mangin maayo nga tiayon, kag magkabuhi sa mataas nga talaksan sang Dios sa pag-asawahay. Madamo sang indi tumuluo nga mga tiayon ang nagbaton sang kamatuoran bangod sa nakita nila nga pagbag-o sang ila tiayon sang ginsunod nila ang mga talaksan ni Jehova.

17, 18. Ngaa nakaluwas si Noe kag ang unang siglo nga mga Cristiano sa katapusan sang sistema nga ginkabuhian nila?

¹⁷ Kon ang malain nga kaupdanan nagapalain sang maayo nga batasan, ang maayo naman nga kaupdanan may maayo nga resulta. Binagbinaga si Noe, nga nagkabuhi sa malauton nga kalibutan apang wala nagahandum nga makig-abyan sa mga pumuluyo sini. Sa sina nga tion,  “nakita ni Jehova nga tuman gid ang kalautan sang tawo sa duta kag ang tagsa ka huyog sang iya hunahuna kag tagipusuon malain sa tanan nga tion.” (Gen. 6:5) Gani namat-od ang Dios nga papason ang malauton nga sistema sadto kalakip sang mga sumalakdag sini paagi sa Baha. Apang, “si Noe matarong nga tawo. Wala sia sing kasawayan sa tunga sang iya mga kadungan. Si Noe naglakat upod ang matuod nga Dios.”—Gen. 6:7-9.

¹⁸ Pat-od gid nga wala nagpakig-upod si Noe sa indi diosnon nga katawhan. Upod sa pito ka miembro sang iya pamilya nangin masako sia sa paghimo sang buluhaton nga ginhatag sang Dios sa ila, lakip ang paghimo sang arka. Sa amo man nga tion si Noe “isa ka manugbantala sang pagkamatarong.” (2 Ped. 2:5) Ang pagbantala ni Noe, ang iya paghimo sang arka, kag ang iya pagpakig-upod sa iya pamilya naghimo sa iya nga masako sa paghimo sang maayong mga butang nga nagpahamuot sa Dios. Subong resulta, si Noe kag ang iya pamilya nakalampuwas sa Baha. Dapat nga magpasalamat kita sa ila kay tanan kita karon mga kaliwatan sang mga nag-alagad kay Jehova—sang matutom nga si Noe, sang asawa ni Noe, sang iya mga anak, kag sang ila mga asawa. Sing kaanggid, ang mainunungon kag matinumanon nga unang siglo nga mga Cristiano padayon nga nagpain sa indi diosnon nga katawhan kag nakaluwas sang nalaglag ang Jerusalem kag ang Judiyo nga sistema sang mga butang sang 70 C.E.—Luc. 21:20-22.

19. Ano ang aton himuon agod kahamut-an sang Dios?

¹⁹ Subong sumilimba ni Jehova, kinahanglan ilugon naton si Noe kag ang iya pamilya kag ang matinumanon nga mga Cristiano sang unang siglo. Dapat padayon kita nga magpain sa malauton nga sistema sang mga butang sa palibot naton kag makig-upod sa minilyon sang aton matutom nga kauturan. Ang pagpakigsuod sa mga ginagiyahan sang kaalam nga halin sa Dios magabulig sa aton nga ‘magtindog sing malig-on sa pagtuo’ sa sining mabudlay nga mga tion. (1 Cor. 16:13; Hulu. 13:20) Kag hunahunaa lamang ining matahom naton nga kahigayunan! Kon pilion naton ang aton kaupdanan sa sining katapusan nga mga adlaw may posibilidad nga makalampuwas kita nga buhi sa katapusan sang malauton nga sistema kag makasulod sa matarong nga bag-o nga kalibutan ni Jehova nga tuman na gid kalapit karon!