Ang Pinakadaku nga Pamatuod sang Gugma sang Dios
Mangin Suod sa Dios
Ang Pinakadaku nga Pamatuod sang Gugma sang Dios
GINHIGUGMA ni Abraham ang Dios. Ginhigugma man niya si Isaac, nga iya anak sa iya katigulangon. Apang sang mga 25 anyos na si Isaac, nag-atubang si Abraham sa isa ka pagtilaw nga supak sa iya balatyagon subong isa ka amay. Ginsugo sia sang Dios nga ihalad ang iya anak. Apang, ang istorya wala natapos sa kamatayon ni Isaac. Sang ginhana na ni Abraham ang sundang agod patyon si Isaac, nagpasilabot ang Dios paagi sa isa ka anghel. Ining kasaysayan sang Biblia sa Genesis 22:1-18, nagahatag sa aton sing ideya kon daw ano kadaku ang gugma sang Dios sa aton.
“Ang Dios nagtilaw kay Abraham,” siling sang bersikulo 1. Si Abraham isa ka tawo nga may pagtuo, apang matilawan gid karon kon daw ano kabakod ang iya pagtuo. Ang Dios nagsiling: “Kuhaa ang imo anak, ang imo bugtong nga anak si Isaac, nga ginahigugma mo, kag . . . ihalad mo sia didto subong nga halad-nga-sinonog sa isa sang mga bukid nga akon isiling sa imo.” ((Bersikulo 2) Dumduma nga wala ginatugutan sang Dios nga matilawan ang iya mga alagad sing labaw sa ila masarangan. Gani, ginapakita sini nga daku gid ang pagsalig sang Dios kay Abraham.—1 Corinto 10:13.
Nagtuman gilayon si Abraham. Aton mabasa: “Si Abraham nagbangon sing aga pa, nagsiya sang iya asno, kag nagdala upod sa iya sang duha sang iya mga pamatan-on nga lalaki, kag kay Isaac nga iya anak; kag nagbis-ak sia sang gatong sa halad-nga-sinonog, kag nagtindug kag nagkadto sa duug.” (Bersikulo 3) Maathag nga wala sing may ginsugiran nga iban nga tawo si Abraham tuhoy sini nga pagtilaw.
Tatlo ka adlaw nga naglakbay si Abraham amo nga mahimo nakapamalandong sia sing maayo. Apang wala nagluya ang iya determinasyon. Ang iya masunod nga ginhambal nagapakita sang iya pagtuo. Sang nakita niya ang bukid nga ginsiling sang Dios, ginsilingan niya ang iya mga alagad: “Pabilin kamo diri . . . , ako kag ang bata makadto sa unhan kag masimba kami, kag mabalik sa inyo.” Sang namangkot si Isaac kon diin na ang inughalad nga karnero, si Abraham nagsiling: ‘Ang Dios magaaman sang cordero.’ (Bersikulo 5, 8) Ginapaabot ni Abraham nga kaupod niya gihapon ang iya anak sa pagbalik niya. Ngaa? Bangod “ginkabig niya nga ang Dios makasarang sa pagbanhaw [kay Isaac] bisan gikan sa mga patay.”—Hebreo 11:19.
Sang didto na sila sa bukid, sang ginhana na ni Abraham ang “sundang sa pagpatay sang iya anak,” ginpunggan sang anghel ang iya kamot. Dayon nag-aman ang Dios sing isa ka lalaki nga karnero nga nasangit sa kasiutan, kag amo ini ang ginhalad ni Abraham “sa baylo sang iya anak.” (Bersikulo 10-13) Sa pagtamod sang Dios, daw kaangay lang nga nahalad na si Isaac. (Hebreo 11:17) “Para sa Dios,” siling sang isa ka iskolar, “ang ginpakita nga kahanda daw pareho lang nga ang buhat gindayón gid.”
Wala napaslawan si Jehova sa pagsalig kay Abraham. Kag ang pagsalig ni Abraham kay Jehova ginpadyaan, kay ginsulit kag ginpasangkad ni Jehova ang iya katipan kay Abraham, ang katipan nga nagasaad sing pagpakamaayo sa katawhan sang tanan nga pungsod.—Bersikulo 15-18.
Ginpunggan ni Jehova ang paghalad ni Abraham kay Isaac apang sang ulihi, wala niya ginpunggan ang iya kaugalingon sa paghalad kay Jesus. Ang kahanda ni Abraham nga ihalad si Isaac nagapakita sa balatyagon sang Dios sang ginhalad niya ang iya bugtong nga Anak nga si Jesus para sa aton mga sala. (Juan 3:16) Ang halad ni Cristo amo ang pinakadaku nga pamatuod sang gugma ni Jehova sa aton. Bangod ginhimo sang Dios ang amo sina kadaku nga sakripisyo para sa aton, maayo nga pamangkuton naton ang aton kaugalingon, ‘Ano nga mga sakripisyo ang handa ko himuon agod mapahalipay ang Dios?’
