Pamangkot sang mga Bumalasa

Natalana na Bala ang Aton Kabuhi?

May nagasiling nga natalana na kon san-o kita mapatay. Ang iban naman nagainsister nga ang Dios ang nagapat-od kon san-o kita mapatay. Dugang pa, nagasiling sila nga ang importante nga mga hitabo sa aton kabuhi indi na mabag-o. Amo man bala sini ang imo pagpati?

Mahimo mo pamangkuton ang imo kaugalingon: ‘Kon matuod nga wala na kita sing mahimo para bag-uhon ang aton madangatan kag kon gintalana na sang Dios ukon sang kapalaran ang matabo sa aton, ano pa ang pulos sang pagpangamuyo? Kag kon gintalana na ang aton madangatan, ngaa nagahalong pa kita? Ngaa nagasuksok pa kita sing seat belt kon nagasakay sa salakyan? Kag ngaa ginalikawan naton nga magmaneho kon nakainom kita?’

Wala ginakunsinti sang Biblia ang mga wala nagahalong. Sa baylo nga magtudlo nga ang tanan natalana na, ginsugo sang Biblia ang mga Israelinhon nga magmahinalungon. Halimbawa, ginsugo sila nga butangan sing barandilya ang palibot sang ila matapan nga atop, para wala sing may mahulog sa sini. Kon amo, ngaa isugo pa ini sang Dios kon gintalana na nga mahulog sa atop ang isa ka tawo kag mapatay?—Deuteronomio 22:8.

Kamusta naman ang mga napatay sa kalamidad ukon mga aksidente? May natalana bala sila nga “petsa sang kamatayon”? Wala. Ang manunulat sang Biblia nga si Solomon nagsiling nga ang “tion kag ang kahigayonan nagakahanabu sa [aton] tanan.” (Manugwali 9:11) Gani, bisan pa daw indi mapatihan ukon daw wala ginapaabot ang malain nga mga hitabo, wala ini gintalana.

Pero, ang iban nagasiling nga wala ini nagahisanto sa una nga ginsiling ni Solomon: “Sa tagsa ka butang may panag-on, kag tion sa tagsa ka katuyoan sa idalum sang langit: tion sa pagkatawo, kag tion sa pagkapatay.” (Manugwali 3:1, 2) Buot bala silingon ni Solomon nga natalana na ang tanan? Usisaon naton sing maayo ang iya ginsiling.

Indi buot silingon ni Solomon nga ang pagkatawo kag kamatayon natalana na. Sa baylo, ginapatalupangod niya nga ang pagkatawo kag kamatayon kaangay sang pila ka butang, padayon nga nagakatabo. Matuod, may maayo kag malain nga hitabo sa kabuhi. May “tion sa paghibi, kag tion sa pagkadlaw,” siling ni Solomon. Ining sulitsulit kag wala ginapaabot nga mga hitabo, subong sang ginsiling ni Solomon, natural lang sa kabuhi, sa “tagsa ka katuyoan sa idalum sang langit.” (Manugwali 3:1-8; 9:11, 12) Gani, ang iya konklusion amo nga likawan naton nga mangin tuman kasako sa adlaw-adlaw nga hilikuton nga malipatan na naton ang aton Manunuga.—Manugwali 12:1, 13.

Bisan pa nahibaluan gid sang Manunuga ang parte sa kabuhi kag kamatayon, wala gid niya gintalana ang aton kabuhi. Ginatudlo sang Biblia nga tanan kita puede mabuhi sing walay katapusan. Wala kita ginapilit sang Dios nga batunon ini. Sa baylo, ang iya Pulong nagasiling: “Ang bisan sin-o nga luyag magkuha sang tubig sang kabuhi nga wala sing bayad.”—Bugna 22:17.

Huo, dapat luyag gid naton “magkuha sang tubig sang kabuhi.” Gani, ang aton kabuhi wala nasandig sa kapalaran. Ang aton palaabuton nagadepende sa aton desisyon, panimuot, kag ginahimo karon.