Pagpuasa—Nagapasuod Bala Ini sa Imo sa Dios?

‘Ang pagpuasa makabulig para mapamensaran mo gid ang imo relasyon sa Dios kag magapahanumdom sa imo nga ang materyal nga mga butang indi gid amo ang pinakaimportante sa kabuhi.’—KATOLIKO NGA BABAYI.

‘Ang pagpuasa makabulig sa imo para magsuod sa Dios.’—JUDIYO NGA RABBI.

‘Sa akon relihion, ang pagpuasa isa ka obligasyon para ipakita ang akon debosyon kag pagpasalamat sa Dios. Nagapuasa ako bangod ginahigugma ko ang Dios.’ —SUMULUNOD SANG BAHA’I NGA PAGTULUUHAN.

ANG pagpuasa ginahimo sang madamo nga relihion sa kalibutan, subong sang Budhismo, Hinduismo, Islam, Jainismo, kag Judaismo. Madamo ang nagapati nga ang pagpuasa nagapasuod sa isa ka tawo sa Dios.

Ano sa banta mo? Dapat ka bala magpuasa? Ano ang ginasiling sang Pulong sang Dios, ang Biblia, parte sini?

Mga Pagpuasa sang Panahon sang Biblia

Sang panahon sang Biblia, may lainlain nga rason kon ngaa nagapuasa ang mga tawo, kag ginabaton ini sang Dios. Ang iban nagapuasa para sa pagpakita sang sobra nga kalisod ukon paghinulsol sa mga sala (1 Samuel 7:4-6), pagpangabay sang kahamuot ukon panuytoy sang Dios (Hukom 20:26-28; Lucas 2:36, 37), ukon pagpatanlas sang konsentrasyon samtang nagapamalandong.—Mateo 4:1, 2.

Sa pihak nga bahin, may ginsambit man ang Biblia nga mga pagpuasa nga wala ginabaton sang Dios. Halimbawa, si Hari Saul nagpuasa antes sia nagkadto sa isa ka espiritista. (Levitico 20:6; 1 Samuel 28:20) Ang malain nga mga tawo, pareho ni Jezebel subong man ang mga panatiko nga nagplano nga patyon si apostol Pablo, nagpuasa man. (1 Hari 21:7-12; Binuhatan 23:12-14) Ang mga Fariseo kilala man nga nagapuasa pirme. (Marcos 2:18) Pero, ginpakamalaut sila ni Jesus, kag wala nila napahamut-an ang Dios. (Mateo 6:16; Lucas 18:12) Wala man ginbaton ni Jehova ang pagpuasa sang pila ka Israelinhon bangod sang ila malain nga buhat kag motibo.—Jeremias 14:12.

 Ini nga mga halimbawa nagapakita nga indi ang pagpuasa ang nagapahamuot sa Dios. Pero madamo sang matutom nga mga alagad sang Dios ang nagpuasa kag ginkahamut-an niya sila. Kon amo, dapat gid bala magpuasa ang mga Cristiano?

Obligado Bala ang mga Cristiano nga Magpuasa?

Ang Kasuguan ni Moises nagsiling nga dapat ‘pit-an sang mga Judiyo ang ila mga kalag,’ buot silingon magpuasa sila kada tuig kon Adlaw sang Katumbasan. (Levitico 16:29-31; Salmo 35:13) Amo lamang ini ang pagpuasa nga ginsugo ni Jehova sa iya katawhan. * Gintuman gid sang mga Judiyo nga napaidalom sa Kasuguan ni Moises ini nga sugo. Pero wala na nagasunod ang mga Cristiano sa Kasuguan ni Moises.—Roma 10:4; Colosas 2:14.

Nagpuasa man si Jesus bilang pagsunod sa Kasuguan. Pero, wala sia makilal-an nga pirme nagapuasa. Ginsilingan niya ang iya mga disipulo sang ila himuon kon magpuasa gid man sila, pero wala sia magsugo nga magpuasa sila. (Mateo 6:16-18; 9:14) Kon amo, ngaa ginhambalan niya ang iya mga disipulo nga magpuasa kon mapatay sia? (Mateo 9:15) Indi ini sugo. Buot lang silingon ni Jesus nga kon mapatay sia, magakasubo gid ang iya mga disipulo kag madulaan sing gana sa pagkaon.

May duha ka hitabo sa Biblia parte sa mga Cristiano sang una nga nagpuasa. Ginapakita sini nga kon maayo ang motibo sang isa sa pagpuasa, ginabaton ini sang Dios. (Binuhatan 13:2, 3; 14:23) * Kon amo, ang mga Cristiano indi obligado nga magpuasa. Pero kon gusto sang isa nga himuon ini, dapat sia mag-andam sa pila ka katalagman.

Mag-andam sa mga Katalagman

Ang isa ka katalagman sa pagpuasa nga dapat likawan amo nga kabigon sang isa ang iya kaugalingon nga matarong. Ang Biblia nagapaandam batok sa “di-matuod nga pagpaubos.” (Colosas 2:20-23, Biblia sang Katilingban sang mga Kristiano) Ang ilustrasyon ni Jesus parte sa bugalon nga Fariseo nga nagakabig sang iya kaugalingon nga mas matarong sa iban bangod sang iya pirme nga pagpuasa, nagapakita nga ginakaugtan sang Dios kon kabigon sang isa ang iya kaugalingon nga matarong.—Lucas 18:9-14.

Sayop man kon ipakitakita mo ang pagpuasa ukon nagapuasa ka lang bangod may naghambal sa imo nga himuon ini. Sa Mateo 6:16-18, nagsiling si Jesus nga ang pagpuasa isa ka pribado nga butang sa tunga mo kag sa Dios, kag indi mo ini dapat pag-ipakitakita.

Indi man pagpensaron sang isa nga ang pagpuasa makatabon sang mga sala. Para batunon sang Dios, dapat tumanon sang nagapuasa ang iya mga sugo. (Isaias 58:3-7) Ang mga sala patawaron lang kon ang isa sinsero nga naghinulsol, kag indi bangod sang iya pagpuasa. (Joel 2:12,  13) Ginapadaku sang Biblia nga ginapatawad ni Jehova ang aton mga sala bangod sa iya wala tupong nga kaayo paagi sa halad ni Cristo. Gani, ginapatawad kita indi tungod sa aton mga buhat, kag lakip diri ang pagpuasa.—Roma 3:24, 27, 28; Galacia 2:16; Efeso 2:8, 9.

Ginapakita man sang Isaias 58:3 ang isa pa ka sala nga pagpati. Ginapagua sang mga Israelinhon nga may utang si Jehova sa ila bangod sa ila pagpuasa, nga daw subong bala nagahimo sila sing pabor sa Dios. Namangkot sila: “Ngaa bala nagpuasa kami, kag wala ka makakita? Ngaa bala nga ginpiotan namon ang amon kalag, kag wala ka nagasapak?” Sa karon, madamo man ang nagapati nga paboran sila sang Dios bangod nagapuasa sila. Kabay pa nga indi naton pagsundon ining panimuot nga wala sing katahuran kag wala ginatudlo sang Biblia!

Ang iban nagapati man nga mahamuot ang Dios kon magpenitensia sila paagi sa pagpuasa, pagpalatigo, ukon iban pa. Ginapakamalaut ini sang Pulong sang Dios, kay nagsiling ini nga ang “tuman nga pagdingot sa lawas” indi makapugong sang malain nga mga buhat.—Colosas 2:20-23.

Isa ka Balanse nga Pagtamod

Indi sala ang pagpuasa, pero indi man kita obligado nga himuon ini. May kaayuhan ini kon likawan ang mga katalagman nga ginsambit. Ang pagpuasa indi man ang pinakaimportante para batunon ang aton pagsimba. Si Jehova “malipayon nga Dios,” kag gusto niya nga magmalipayon man ang iya mga alagad. (1 Timoteo 1:11) Ang iya Pulong nagasiling: “Wala na sing maayo pa sa ila sang sa . . . ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.”—Manugwali 3:12, 13.

Dapat makalilipay ang aton pagsimba, pero wala nagsiling ang Biblia nga magpuasa para magmalipayon. Dugang pa, may makalilipay nga hilikuton nga ginsugo ang aton Manunuga sa matuod nga mga Cristiano. Amo ini ang pagbantala sang maayong balita sang Ginharian. Kon maapektuhan sang pagpuasa ang aton kapagros ukon madula sini ang aton kusog nga para kuntani sa pagbantala nga hilikuton, maathag nga wala ini sing pulos.

Kon nagapuasa man kita ukon wala, indi gid naton paghukman ang iban. Indi dapat pagbaisan sang matuod nga mga Cristiano ang pagpuasa kay “ang ginharian sang Dios wala nagakahulugan sang pagkaon kag pag-inom, kundi nagakahulugan sang pagkamatarong kag paghidait kag kalipay paagi sa balaan nga espiritu.”—Roma 14:17.

[Mga Nota]

[Blurb sa pahina 28]

Ang mga Fariseo nagpakita sing di-matuod nga pagpaubos sa ila pagpuasa

[Blurb sa pahina 29]

“Ang ginharian sang Dios wala nagakahulugan sang pagkaon kag pag-inom, kundi nagakahulugan sang pagkamatarong kag paghidait kag kalipay”

[Kahon sa pahina 29]

Kamusta ang Kuaresma?

Ang 40 ka adlaw nga pagpuasa kon Kuaresma ginasiling nga pagsaulog sang 40 ka adlaw nga pagpuasa ni Cristo. Pero, wala ginsugo ni Jesus ang iya mga disipulo nga saulugon ang iya pagpuasa, kag wala man sing pamatuod nga ginhimo nila ini. Ginapatihan nga una nga ginsambit ang 40 ka adlaw nga pagpuasa antes sang Easter ukon Pagkabanhaw sa mga sulat ni Athanasius sang 330 C.E.

Nagpuasa si Jesus pagkatapos sia ginbawtismuhan kag indi antes sang iya kamatayon. Gani, katingalahan nga ang iban nga relihion nagasaulog sang Kuaresma pila ka semana antes sang Pagkabanhaw. Sa pihak nga bahin, ang 40 ka adlaw nga pagpuasa sa una nga mga binulan kada tuig pirme na nga ginahimo sang mga Babilonianhon, Egiptohanon, kag mga Griego sadto. Diri naghalin ining selebrasyon nga abi sang iban iya sang mga “Cristiano.”