Ano ang Pagtuo?

PARA sa imo, ano ang pagtuo? Ang iban nagasiling nga amo ini ang pagpati sa isa ka butang nga wala na nagapangusisa. Ang isa ka kilala nga manunulat kag dyurnalista nga Amerikano nga si H. L. Mencken nagsiling nga ang pagtuo amo ang “pagpati sa ginaduhaduhaan nga hitabo nga wala sing basihan.”

Apang indi amo sini ang pagpaathag sang Biblia. Ang Pulong sang Dios nagsiling: “Ang pagtuo amo ang masaligan nga pagpaabot sa mga butang nga ginalauman, ang maathag nga pagpasundayag sang mga katunayan bisan indi makita.”—Hebreo 11:1.

Bangod lainlain ang opinyon parte sa pagtuo, binagbinagon naton ang mga sabat sa masunod nga mga pamangkot:

• Ano ang kinalain sang pagpaathag sang Biblia sangsa pagpati sang iban parte sa pagtuo?

• Ngaa importante nga matigayon naton ang pagtuo nga ginapaathag sang Biblia?

• Paano mo mapalig-on ang imo pagtuo?

Titulo kag Mabakod nga Pamatuod

Sang ginsulat ang tulun-an sang Hebreo sa Biblia, pirme ginagamit ang Griego nga termino nga ginbadbad ukon gin-translate nga “masaligan nga pagpaabot.” Masami ini makita sa mga papeles sa negosyo kag nagagarantiya ini nga sa palaabuton panag-iyahan mo ang isa ka butang. Amo nga ang isa ka reperensia nagsiling nga ang Hebreo 11:1 mahimo hangpon: “Ang pagtuo amo ang titulo sa mga butang nga ginalauman.”

Kon may ginbakal ka nga isa ka butang sa isa ka masaligan nga kompanya kag nagapaabot ka nga idul-ong ini sa imo, nagapakita ka sang amo sina nga klase sang pagtuo. Ang resibo nga ginauyatan mo amo ang nagahatag sa imo sing rason nga magsalig ukon magtuo sa kompanya nga ginbaklan mo. Kon sa aton pa, ang resibo amo ang imo titulo, ang garantiya nga makuha mo ang imo ginbakal. Kon madula ukon mahaboy mo ang resibo, wala ka na sing pamatuod nga ikaw ang nagbakal. Sing kaanggid, ang mga nagatuo nga tumanon sang Dios ang iya mga saad, may garantiya nga matigayon nila ini. Sa pihak nga bahin, ang mga wala sing pagtuo, ukon nadulaan sing pagtuo, indi makabaton sang mga ginsaad sang Dios.—Santiago 1:5-8.

Ang ikaduha nga termino sa Hebreo 11:1 nga “maathag nga pagpasundayag,” nagapahangop sing pagpakita sing ebidensia sa kon ano ang kamatuoran. Halimbawa, kon tan-awon naton, daw ang adlaw ang nagalibot sa duta, nagabutlak ini sa sidlangan kag nagatunod sa katundan. Apang ginapamatud-an sang astronomiya kag matematika nga ang duta indi amo ang sentro sang solar system. Kon nahibaluan mo ini nga ebidensia kag nagapati sa sini, nagatuo ka nga ang duta amo ang nagalibot sa adlaw bisan ano pa ang imo makita. May basihan ang imo pagtuo. Dugang pa, nagahatag ini sa imo sing ikasarang nga makita kon ano gid ang kamatuoran, indi sa kon ano lang ang ginahaumhaum mo.

Ngaa Importante ang Malig-on nga Pagtuo?

Ang malig-on nga pagtuo amo ang ginapalig-on sang Biblia. Ini nga pagtuo nabase sa malig-on nga ebidensia, bisan pa kinahanglan naton nga bag-uhon ang aton mga ginapatihan. Importante gid ini nga pagtuo. Si apostol Pablo nagsulat: “Kon wala sing pagtuo imposible nga mapahamut-an gid sia, kay ang nagapalapit sa Dios dapat magpati nga nagaluntad sia kag ginapadyaan niya ang mga nagapangita sa iya sing hanuot.”—Hebreo 11:6.

Madamo sing mga upang sa pagpabakod sang aton pagtuo. Pero, malandas mo ini kon sundon mo ang apat ka tikang nga binagbinagon sa masunod nga mga pahina.