Makahatag Bala sing Matuod nga Kalipay ang Kuarta?

SI Sonia natawo sa Espanya. Sang bata pa sia, nagatambong sia sa mga pagtilipon sang mga Saksi ni Jehova upod sa iya iloy. Pero pagdaku niya, nagsaylo sia sa London, England, kag nag-obra sa isa ka kompanya subong isa ka bond broker.

Nanamian gid si Sonia sa iya trabaho. Daku ang iya kita kag sia ang nagapalakat sang dalagku nga kapital sang iya mga kliyente. Nalipay gid sia sa iya obra kag nangin madinalag-on. Nagatrabaho sia sing 18 ka oras kada adlaw, kag kon kaisa duha ukon tatlo lang ka oras ang iya tulog. Ang iya kabuhi nasentro sa iya trabaho. Pero, gulpi lang nagbag-o ang iya kabuhi. Na-stroke si Sonia nga mahimo resulta sang iya makakalapoy nga pagkabuhi. Treinta anyos pa lang sia.

Ang pihak nga lawas ni Sonia nangin paralisado, kag indi sigurado ang mga doktor kon makahambal pa sia liwat. Nagkadto dayon ang iya iloy sa England para atipanon sia. Sang makalakat na liwat si Sonia, ginhambalan sia sang iya iloy, “Matambong ako sa pagtilipon sang kongregasyon, kag dapat maupod ka sa akon kay indi ko ikaw puede bayaan.” Nagpasugot si Sonia. Ano ang resulta?

“Matuod gid ang tanan ko nga nabatian didto. Nanamian gid ako,” siling ni Sonia. “Ginbaton ko ang pagtuon sa Biblia sang isa sa mga nagtamyaw sa akon sang una ko nga pagkadto sa Kingdom Hall. Ang mga kaupdanan ko sang una wala na nagabisita sa akon, pero gin-atipan ako kag ginpalangga sang akon bag-o nga mga abyan.”

Amat-amat nga nakahambal liwat si Sonia, kag madasig man nga nag-uswag ang iya ihibalo sa Biblia. Wala pa isa ka tuig, nabawtismuhan na sia. Madamo sa iya bag-o nga mga abyan ang nagagamit sang ila daku nga oras subong Cristiano nga mga ministro kag nakita niya nga malipayon gid sila. ‘Gusto ko man nga sundon sila,’ sa pensar ni Sonia. ‘Gusto ko ihatag kay Jehova nga Dios ang bug-os ko nga masarangan!’ Ginagamit man karon ni Sonia ang iya daku nga oras subong ministro.

Ano ang natun-an ni Sonia sa iya eksperiensia? “Bisan pa daku ang akon ginakita sang una, makakalapoy kag wala sing kasiguruhan ang akon trabaho amo nga nabalaka ako pirme kag indi malipayon. Narealisar ko nga ang pinakaimportante nga butang sa kabuhi amo ang maayo nga relasyon sa akon langitnon nga Amay nga si Jehova. Malipayon gid ako subong.”

“Ang gugma sa kuarta amo ang gamot sang tanan nga sahi sang makahalalit nga mga butang,” siling ni apostol Pablo. “Paagi sa paghingamo sini nga gugma ang iban nagtalang gikan sa pagtuo kag nagbuno sang ila kaugalingon sang madamo nga kasakit.” (1 Timoteo 6:10) Napamatud-an gid ini ni Sonia.