Masaker sa Eskwelahan—Paglugpay sa mga Biktima

Itom ang una nga pahina sang pamantalaan. Sa tunga sini nasulat ang isa ka tinaga: “Ngaa?” Sulit-sulit ini nga ginpamangkot sa tapos nga nagpaniro ang 17 anyos nga bata sa Winnenden, sa bagatnan sang Germany. Ginpatay niya ang 15 ka tawo kag sang ulihi, gintiro man niya ang iya kaugalingon. Ini nga trahedya ginbalita sa bilog nga kalibutan kag ang tanan nga bandera sa Germany ginpasaka sa tungatunga sang flag pole.

 Ang Winnenden isa ka matin-ad kag malinong nga banwa nga napalibutan sang mga ulubasan kag kakahuyan. Pero sang Marso 11, 2009, alas 9:30 sang aga, hinali lang nga nagkinagual sa Albertville Secondary School kay may naghuramentado nga bata.

Ginsulod sang isa ka akig nga tin-edyer ang eskwelahan niya sang una. May dala sia nga pusil nga ginkuha niya sa kuarto sang iya mga ginikanan. Sunod-sunod sia nga nagpaniro sa tatlo ka classroom kag sa alagyan. Siam ka estudyante kag tatlo ka maestra ang napatay kag madamo pa ang napilasan. Dugaydugay, may nag-abot nga mga pulis. Nalagyo sia sa gua nayon sang malapit nga psychiatric clinic kag ginpatay ang isa nga nagaobra didto. Dayon sang may nakita sia nga awto, gintayaan niya ang drayber kag nagsakay. Mga 40 kilometros na ang ila nabiyahe, nakapalagyo ang drayber. Sang makalab-ot sia sa isa ka balaligyaan sang salakyan, ginpatay niya ang salesman kag ang isa ka kostumer. Dakpon sia tani sang mga pulis pero natiruhan niya ang duha sa ila kag napilasan. Sang naapike na sia, gintaya niya ang pusil sa iya ulo kag ginpalupok.

Suno sa mga nakakilala sa sini nga bata, ordinaryo lang sia nga tin-edyer nga nagakinahanglan sing atension kag mga amigo. Ngaa nahimo niya ini? Siguro may depresyon sia. Nagahampang man sia sing iskupita (air gun) kag bayolente nga mga hampang sa kompyuter. Madamo man nga pamatan-on ang nagahampang sini, siling sang iban. Ngaa nagpaniro gid sia? Ginpili lang bala niya ang iya tiruhon ukon ang bisan sin-o lang nga iya makita? May mga uluistorya kon ngaa, sa mga estudyante, walo ka babayi kag isa lang ka lalaki ang iya gintiro. Pero wala sing may makapat-od kon ano gid ang rason.

Mga Reaksion

“Sang gintawgan ako sang akon bata nga lalaki nga may nagpaniro sa ila eskwelahan, daw indi ako magpati,” siling ni Heike. “Pero ginnerbios ako sang mabatian ko nga nagainuwang na ang mga salakyan sang pulis kag ambulansia.” Kon wala dayon mag-abot ang mga pulis, madamo pa gid siguro ang nagkalamatay. Sang nakagua na ang tanan sa eskwelahan, nag-abot man ang mga paramedic, psychiatric counselor, kag mga pari. Kinapoy gid sila sa pagbulig kag pag-atipan sa mga estudyante.

Dayon, nagdinaguso man sa eskwelahan ang mga reporter kag nagpang-interbyu sa mga estudyante, nga ang kalabanan, daw wala pa sa ila kaugalingon. Suno sa isa ka estudyante, 28 ka salakyan sang 26 ka lainlain nga estasyon sang TV ang nagkadto sa eskwelahan. Grabe ang paindisanay nila, amo nga may naggua nga mga report nga indi matuod. Sa sina mismo nga adlaw, gintawgan pa gani sang isa ka reporter ang pamilya sang isa ka bata nga babayi nga ginpatay para mangayo lang sang mga retrato. Ginbayran naman sang iban ang pila ka estudyante para magparetrato sa ila. Daw wala sing pasunaid ang iban nga reporter. Mas importante pa sa ila nga makauna sa pagkuha sing report sangsa magpakita sing konsiderasyon kag respeto sa mga biktima.

Sa sini nga kahimtangan, masami nga nagapangayo sing bulig ang mga tawo sa relihion para malugpayan sila. Sadto mismo nga adlaw, nagtilipon ang lainlain nga relihion para sa isa  ka misa. Madamo ang nagpasalamat sa ila ginhimo, pero wala nila nalugpayan ang mga tagpalamati ukon nasabat ang mga pamangkot sini paagi sa Pulong sang Dios. Sang nagkumpanyar ang isa ka pamilya sa lubong sang klasmeyt sang ila bata, ang iloy nagsiling: “Ginsugid sang obispo ang mga pag-antos ni Job. Ginahulathulat ko nga ipaathag niya ang mga leksion nga matun-an sa sini ukon maghatag sia sing lugpay—pero wala gid. Wala niya ginsugid kon ngaa nag-antos si Job kag kon ano ang natabo sa iya sa ulihi.”

Ang isa naman ka tawo nainit sa iya nabatian kay daw wala man ini sing pulos. Ini nga tawo nagtuon sa Biblia upod sa mga Saksi ni Jehova mga 30 na ka tuig ang nagligad, pero nauntat ini. Subong, nagatambong na sia liwat sa ila mga miting.

Ang 14 anyos nga dalagita nga si Valisa, nga nagatuon sa Biblia upod sa mga Saksi, ara lang sa pihak nga classroom sang ginpaniro ang mga biktima. Sang mabatian niya ang linupok, nangamuyo sia kay Jehova. Sang ginpamangkot sia sang ulihi kon ano ang nakabulig sa iya, nagsiling sia nga natun-an na niya sa Biblia nga amo gid sini ang matabo sa katapusan nga mga adlaw. (2 Timoteo 3:1-5) Sang ang duha naman ka Saksi masako nga nagasugid sing makalulugpay nga mensahe sa ila mga kaingod, ginpalapitan sila sang tigulang nga babayi kag ginsilingan, “Tani amo man sina ang himuon sang iban.” Bangod sining masubo nga hitabo, namati na ang iban sa mensahe sang Pulong sang Dios nga nagahatag sing paglaum kag lugpay.

Panaysayon sang mga Biktima

Siempre, bisan ano pa nga lugpay ang ihatag sa mga biktima, indi dayon madula ang kasakit kag kahadlok nga ila nabatyagan. Wala sing mga tinaga nga makapahaganhagan sa kasakit nga nabatyagan sang isa ka ginikanan nga nadulaan sang bata, ukon sa kasubo sang isa ka pulis sang maabtan niya sa eskwelahan nga ang iya asawa isa gali sa mga ginpatay.

Ang mga estudyante nga nakaluwas kag ang ila mga pamilya ginnerbios man. Sang nagpalupok na ang kriminal, naglumpat dayon si Vassilios sa bintana. “Sang maglumpat ako, nangamuyo ako kay Jehova. Abi ko gid mapatay na ako kag amo na ini ang katapusan ko nga pangamuyo,” siling niya. Sang masunod nga mga semana, pirme niya ini ginadamgo kag indi niya gusto nga mag-istorya kay bisan sin-o. Naakig gid sia bangod daw wala sing pasunaid ang mga reporter nga nagapaunahay para lang may i-report. Sang ulihi, nabaton niya nga amo gid sini ang kamatuoran.

Si Jonas kaupod ni Vassilios sa classroom kag nakita gid niya nga ginpatay ang iya lima ka klasmeyt. Sia nagsiling: “Sa tapos sini nga hitabo, daw sa wala lang sa akon nga iistorya ini. Daw naglantaw lang ako sang horror nga pelikula. Pero subong, nabudlayan ako mag-istorya sang akon nabatyagan. Nagabag-o-bag-o pirme ang akon modo. Kon kaisa indi ko gusto istoryahan ang natabo, kon kaisa naman, grabe ako paistoryahon sini.” Pirme lang si Jonas nagadamgo kag indi sia makatulog sing maayo.

Pagligad sang pila ka adlaw, ginbalik sa mga estudyante ang ila mga gamit nga nabilin sa eskwelahan. Suno sa mga eksperto sa trauma, kon makita ini sang mga biktima, madumduman nila ang natabo. Sang primero, wala gid gintandog ni Jonas ang iya dyaket, bag, kag helmet. Ginanerbios man sia kon makakita sia sing  tawo nga pareho hitsura sa kriminal ukon nagadala sing napsak nga pareho sa napsak sang kriminal. Ginabuligan sang mga therapist ang mga biktima nga madula ang ila trauma.

Ang amay ni Jonas nga si Jürgen, nagaobra sa klinika diin ang isa ka biktima didto gintiro. Nagsiling sia nga madamo nga ginikanan kag mga katrabaho niya ang nagapamangkot sing, Ngaa? kag Ano na lang abi kon . . . ? Halimbawa, ang isa ka empleyada sa sini nga klinika dapat man magpabulong sa psychiatrist. Ngaa? Kay ginanerbios sia kon pamensaron niya nga natiruhan man sia kuntani bangod nakita gid niya halin sa balkonahe nga naglabay ang kriminal.

Kon Paano Nabuligan ang Iban

Ano ang nakabulig sa iban nga maatubang ining makasiligni nga hitabo? Nagsiling si Jürgen: “Bisan pa ginabudlayan ako kon kaisa, kanami sang akon pamatyag kon may upod ako nga nagapalangga kag nagapabatyag sa akon nga wala ako nagaisahanon.”

Nagapasalamat gid si Jonas sa mga nagadumdom sa iya: “Madamo ang nagpadala sa akon sing mga kard kag mga mensahe. Ang iban may mga teksto sa Biblia kag ginabasa ko dayon. Nanamian gid ako sa sini.” Ano pa gid ang nakabulig sa iya? “Kon makabugtaw ako kon gab-i nga nagalalain, nagapangamuyo ako. Nagapamati man ako kon kaisa sa mga musika ukon sa mga rekording sang Awake!” * Nagsiling pa sia nga ginasugid sa aton sang Biblia kon ngaa nagakatabo ini tanan: Si Satanas amo ang nagagahom sa kalibutan kag ari na kita sa tion sang katapusan. Nagsiling ang amay ni Jonas nga daku ang nabulig sa ila nga nahibaluan nila ini.

Malapit Na Madula ang Pag-antos

Sa sulod sang pila ka adlaw, ang atubang sang eskwelahan napuno sing mga kandila, bulak, kag mga sulat. Nakita ni Kerstin nga may mga tawo nga nagahimo sang sulat nga nagapamangkot kon ngaa natabo ini kag kon ngaa gintugutan ini sang Dios. Bangod gusto niya nga sabton ini nga pamangkot, nagsulat sia upod sa duha pa ka Saksi para masabat ini.

Sa isa ka opisyal nga misa, ginpakita sa TV ang iya sulat kag ginsambit ang una nga linya: “Ngaa? Sa sining katapusan nga mga adlaw, madamo ang nagapamangkot sini, pati na ang mga pamangkot nga: Diin ang Dios? Kag ngaa gintugutan niya ini?” Kanugon nga wala gintapos basa ang iya sulat.

Ngaa kanugon? Kay ang sulat nagapaathag kon ano ang ginhalinan sang pag-antos kag nagasiling nga “siguraduhon sang Dios nga madula na ang tanan nga halit nga ginhimo sang mga tawo.” Kag nagsiling pa gid ini: “Sa katapusan nga libro sang Biblia, ang Dios nagsiling nga pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” Bisan ang mga patay banhawon ni Jehova nga Dios. Dali na lang dulaon sang iya Ginharian ang mga trahedya, masaker, ukon pag-antos. Nagsaad ang Dios: “Yari karon! Ginahimo ko nga bag-o ang tanan nga butang.”—Bugna 21:4, 5.

[Nota]

[Retrato sa pahina 12]

Nakabaton si Jonas sang kard nga nagasiling, “Ginadumdom ka gid namon”

[Picture Credit Line sa pahina 9]

Focus Agency/WPN

[Picture Credit Line sa pahina 9]

© imagebroker/Alamy

[Picture Credit Line sa pahina 10]

Foto: picture alliance

[Picture Credit Line sa pahina 11]

Foto: picture alliance