Mangin Suod sa Dios

Nagahinulsol Bala ang Dios?

HUKOM 2:11-18

BANGOD indi kita perpekto, kon kaisa nagahinulsol kita. Halimbawa, mahimo magahinulsol kita pagkatapos nga makahimo kita sing sala. Ang Biblia nagsiling nga si Jehova naghinulsol man. Pero mahimo magsiling ka, ‘perpekto ang Dios kag wala gid sia nagasala!’ Kon amo, ngaa nagahinulsol sia? Ang sabat sa sini makabulig sa aton nga maintiendihan ang isa ka importante nga butang: Si Jehova may balatyagon, kag ang aton mga ginahimo may epekto sa iya. Binagbinaga ang ginasiling sang Hukom 2:11-18.

Sa Biblia, ang tulun-an sang Hukom nagasugid sa aton parte sa magamo nga tion sa Israel. Ara na sila sa Canaan, ang duta nga ginpromisa sang Dios kay Abraham. Sa sulod sang mga siglo, ang mga Israelinhon sulitsulit nga nagpakasala, ginpigos, nagpakitluoy, kag ginluwas. *

Nagpakasala. Gin-impluwensiahan sang mga taga-Canaan ang mga Israelinhon amo nga “ginbayaan nila ang GINOO” kag nagsimba sila sa iban nga dios pareho kay ‘Baal kag Astarot.’ * Bangod nagsimba sila sa iban nga dios, ginbayaan nila si Jehova. Amo nga “ginpaakig nila ang GINOO,” ang Dios nga nagpagua sa ila sa Egipto!—Bersikulo 11-13; Hukom 2:1.

Ginpigos. Bangod gintalikdan sang mga Israelinhon si Jehova, naakig gid sia sa ila. Gani, wala na sila ginproteksionan ni Jehova. Ginhatag niya ang mga Israelinhon “sa mga kamut sang ila mga kaaway” nga nagkuha sang ila pagkabutang.—Bersikulo 14.

Nagpakitluoy. Bangod sa grabe nga kabudlayan nga ila naagyan, naghinulsol ang mga Israelinhon kag nagpakitluoy kay Jehova. Sulit-sulit ini nga natabo. (Hukom 3:9, 15; 4:3; 6:6, 7; 10:10) Ginpakita nila ini sa ila “mga pag-ugayong tungud sa mga nagpigus sa ila.” (Bersikulo 18) Ano ang ginhimo ni Jehova?

Ginluwas. Ginpamatian ni Jehova ang pag-ugayong sang mga Israelinhon kag ‘nagkalisud’ ukon naghinulsol sia. Ang Hebreo nga tinaga para sa naghinulsol mahimo magkahulugan nga “nagbag-o ang pensar ukon tuyo.” Ang isa ka reperensia nagsiling: “Bangod sa ila mga pag-ugayong, ginluwas sila ni Jehova sa baylo nga silutan.” Naluoy si Jehova sa ila amo nga ‘nagbangon sia sing mga hukom’ nga amo ang nagluwas sa ila halin sa ila mga kaaway.—Bersikulo 18.

Ngaa naghinulsol ukon nagbag-o ang pensar ni Jehova? Bangod nagbag-o man ang iya katawhan. Sa pag-ilustrar: Mahimo disiplinahon sang isa ka mapinalanggaon nga amay ang iya bata nga nakasala. Amo nga indi niya sia pagpasugtan nga himuon ang pila ka butang. Pero kon makita niya nga naghinulsol na ang iya bata, untaton na sang amay ang pagpina sa iya.

Ano ang matun-an naton diri parte kay Jehova? Bisan pa naakig sia sa hungod nga nagapakasala, nagakaluoy man sia sa mga mahinulsulon. Gani, dapat naton dumdumon nga may epekto gid sa Dios ang aton ginahimo. Tinguhai nga ‘mapasadya ang tagiposoon’ ni Jehova. (Hulubaton 27:11) Indi mo gid ini paghinulsulan.

[Mga Nota]