Pangamuyo—Ngaa?
PANGAMUYO. Isa ini sa mga topiko sa Biblia nga gusto gid usisaon sang mga tawo. Binagbinaga ang pito ka butang nga pirme ginapamangkot parte sa pangamuyo. Dayon, tan-awon naton kon ano ang mga sabat sang Biblia. Ini nga mga artikulo makabulig sa imo kon indi ka kabalo mangamuyo kag para pamatian sang Dios ang imo pangamuyo.
ANG mga tawo nagapangamuyo bisan ano man ang ila kultura kag relihion. Nagapangamuyo sila sing isahanon ukon upod sa grupo. Nagapangamuyo sila sa mga simbahan, templo, sinagoga, moske, ukon sa mga lugar nga ginakabig nga sagrado. Nagagamit sila sing mga sagyadan (prayer rug), prayer wheel, rosarito, imahen, libreta, ukon nasulat nga pangamuyo sa mga tapitapi nga ginapakabit.
Ang pangamuyo nagaseparar sa mga tawo sa iban nga tinuga. Matuod, pareho sa mga sapat, nagakaon man kita, nagainom, kag nagaginhawa. Ginabun-ag man kita, nagakabuhi, kag nagakapatay. (Manugwali 3:19) Pero tawo lamang ang nagapangamuyo. Ngaa?
Siguro, bangod kinahanglan naton mangamuyo. Kay man, amo ini ang kinaandan nga paagi para makakomunikar sa mga butang nga ginakabig nga balaan ukon sagrado, kag imortal. Siling sang Biblia, gintuga kita nga may handum sa paghimo sini. (Manugwali 3:11) Si Jesucristo nagsiling sadto: “Malipayon ang mga mahunahunaon sang ila espirituwal nga kinahanglanon.”—Mateo 5:3.
Bangod sining “espirituwal nga kinahanglanon,” madamo ang simbahan, mga gamit sa pagsimba, kag nagapangamuyo sing inoras. May mga tawo nga nagapabulig para sa ila espirituwal nga kinahanglanon, kag ang iban nagamatumato na lang. Pero indi bala nga limitado lang ang mabulig sang tawo? Maluya kita, malip-ot sing kabuhi, kag kulang sing paghangop. Ang isa lamang nga mas maalam, mas gamhanan, kag wala nagabag-o ang makahatag sang aton kinahanglanon. Ano ining espirituwal nga mga kinahanglanon nga nagapahulag sa aton nga mangamuyo?
Binagbinaga: Nagapangita ka bala sing giya, kaalam, ukon sabat sa mga pamangkot nga daw indi matungkad sang ihibalo sang tawo? Nagkinahanglan ka na bala sing lugpay bangod sa pagkadula sang imo pinalangga, sing giya sa paghimo sing mabudlay nga mga desisyon, ukon sing kapatawaran kon nakasala ka?
Suno sa Biblia, mga rason ini para mangamuyo. Ang Biblia masaligan gid sa sini nga topiko, kag mabasa sa sini ang mga pangamuyo sang mga matutom sa Dios. Nangamuyo sila sing lugpay, kapatawaran, kag mga sabat para sa pinakamabudlay nga mga pamangkot.—Salmo 23:3; 71:21; Daniel 9:4, 5, 19; Habacuc 1:3.
Bisan pa lainlain ang ila mga pangamuyo, may pagkapareho ini. Ginpamatian ang ila pangamuyo kay ginhimo nila ang importante nga butang nga nalipatan na ukon ginabalewala sang mga tawo subong. Nahibaluan nila kon kay sin-o dapat mangamuyo.
