Buligi ang Nagasolo nga mga Ginikanan

DAW wala na sing mas masako pa sangsa nagasolo nga mga ginikanan. Kadamo sang ila alatipanon kag obligasyon sa pamilya. Magluwas nga matrabaho, sila pa ang manindahan, madigamo, maninlo, kag maatipan sa kabataan. Dapat man nila hatagan sing tion ang paglingawlingaw kag sing atension ang panglawas kag emosyon sang ila kabataan. Kon posible, dapat man nila hatagan sing tion ang ila kaugalingon.

Bisan nagadamo subong ang mga pamilya nga may nagasolo nga ginikanan, masami nga indi sila matalupangdan. Ang isa ka nanay nagsiling, “Sang may bana pa ako, wala ko gid sila ginapensar.” Paano mo mabuligan ang nagasolo nga mga ginikanan? Dapat mo bala sila kabalak-an? Hambalan naton ang tatlo ka rason kon ngaa dapat naton talupangdon ang ila mga kinahanglanon.

Kon Ngaa Buligan Sila

Madamo sa ila ang gusto magpabulig. Ang 41 anyos nga balo nga may duha ka bata nagsiling, “Kon kaisa, indi ko kabalo sang akon himuon, kag daw indi ko madala ang akon mga responsibilidad.” Nabalo man, ginbiyaan, ukon tungod sa iban pa nga rason, madamo nga nagasolo nga ginikanan ang nagabatyag pareho sang isa ka iloy, nga nagsiling, “Kinahanglan gid namon ang bulig!”

Nagapahalipay ini sa imo. Nakaagi ka na bala nga gintuwangan mo ang isa ka tawo nga may mabug-at nga dala? Mahimo nga nalipay ka kay nabuligan mo sia. Pareho man sa sini ang nagasolo nga mga ginikanan. Kon kaisa, indi nila madala ang ila mga responsibilidad. Kon buligan mo sila, mabatyagan mo nga matuod ang ginasiling sang Salmo 41:1: “Bulahan ang nagapatugsiling sang maluya!”

Nagapahamuot ini sa Dios. Ang Santiago 1:27 nagsiling: “Ang porma sang pagsimba nga matinlo kag wala sing dagta sa pagtamod sang aton Dios kag Amay amo ini: ang pag-atipan sa mga ilo kag sa mga balo nga babayi sa ila kapipit-an.” Lakip sa sini ang nagasolo nga mga ginikanan. * Ang Hebreo 13:16 nagsiling man: “Indi pagkalimti ang paghimo sing maayo kag ang pagpaambit sing mga butang sa iban, kay nahamuot gid ang Dios sa sini nga mga halad.”

Samtang ginahunahuna naton ining tatlo  ka rason, tan-awon naton kon paano mo mabuligan ang nagasolo nga mga ginikanan.

Hibalua ang Ila Kinahanglanon

Mahimo nga ang pinakasimple nga paagi amo nga pamangkuton ang nagasolo nga ginikanan, “Ano ang mabulig ko?” Pero kon amo sini ang himuon mo, posible nga indi nila pag-ihambal kon ano gid ang ila kinahanglan. Subong sang ginsiling sang Salmo 41:1, dapat kita ‘magpatugsiling.’ Suno sa isa ka reperensia, ang Hebreo nga termino nga gingamit diri mahimo nagakahulugan sing pagpamensar sing maayo para mangin maalamon ang pagpakig-angot sa iban.

Kon amo, para mahibaluan ang pinakamaayo nga paagi sa pagbulig sa nagasolo nga ginikanan, dapat pamensaron mo sing maayo ang ila mga kabudlayan kag ang ila kahimtangan. Pamangkuta ang imo kaugalingon, ‘Kon ako sa ila lugar, ano nga bulig ang gusto ko?’ Matuod, madamo sa nagasolo nga ginikanan ang magasiling nga mientras indi ikaw mismo ang makaagi, indi mo gid sila maintiendihan. Pero, kon himuon mo ang imo masarangan nga hangpon ang ila mga kabudlayan, ‘makapatugsiling’ ka sa ila.

Iluga ang Perpekto nga Halimbawa sang Dios

Kon parte sa mahigugmaon kag epektibo nga pagbulig sa nagasolo nga ginikanan, wala na sing makalabaw pa kay Jehova nga Dios. Ginapakita sang madamo nga bersikulo sa Biblia nga si Jehova nga Dios nagabulig kag nagakabalaka sa mga balo, ilo, kag siempre sa nagasolo nga mga ginikanan. Kon usisaon naton kon paano sila gin-atipan sang Dios, mahibaluan pa gid naton kon paano sila mabuligan. May apat ka butang nga dapat binagbinagon.

Pamatii sila

Sa Kasuguan nga ginhatag ni Jehova sa Israel sang una, nagsiling sia nga ‘pamatian niya ang pagtuaw’ sang mga ginabudlayan. (Exodo 22:22, 23) Paano mo ini mailog? Ang nagasolo nga mga ginikanan masami nga ginasubuan gid, kay wala sila sing maistorya nga adulto. “Kon kaisa kon tulog na ang mga bata, nagasige ako ka hibi,” siling sang isa ka nagasolo nga ginikanan. “May mga bes nga indi ko na maagwanta ang kasubo.” Kon nagakaigo, puede mo bala ‘mapamatian ang pagtuaw’ sang nagasolo nga ginikanan kon gusto niya nga may maistorya? Daku gid ang mabulig sang imo pagpamati para masarangan nila ang mga kabudlayan.

Pabakura sila

Gingiyahan ni Jehova ang pagsulat sang sagrado nga mga kanta, ukon salmo, nga ginakanta sang mga Israelinhon kon magsimba sila. Sigurado nga napabakod gid ang balo kag ilo nga mga Israelinhon kon ginakanta nila ang mga liriko nga halin sa Dios. Napahanumdom sila sini nga si Jehova “amay” kag “hukom” nga magapaumpaw sa ila. (Salmo 68:5; 146:9) Ang aton ginahambal nga mga pagpabakod mahimo nga indi gid malipatan sang nagasolo nga mga ginikanan. Bisan 20 ka tuig na ang nagligad, nadumduman gihapon sang nagasolo nga ginikanan nga si Ruth ang ginhambal sa iya sang isa ka maayo nga amay: “Maayo ka gid magpadaku sa imo duha ka bata. Padayuna gid ina.” Si Ruth nagsiling: “Nabuligan gid ako sang iya ginsiling.” Matuod gid nga “ang malulo nga mga pulong makapaayo” kag makapabakod gid sa nagasolo nga ginikanan. (Hulubaton 15:4, APD) Ngaa indi mo paghatagan sing espesipiko kag sinsero nga pagdayaw ang nagasolo nga ginikanan para mapabakod sia?

Buligi sila sa materyal kon kinahanglanon

Nalakip sa Kasuguan nga ginhatag ni Jehova sa Israel ang pag-aman sing pagkaon sa  mga balo kag ilo sa dungganon nga paagi. Kon sundon nila ini, ining mga kubos “makakaon . . . kag mabusug.” (Deuteronomio 24:19-21; 26:12, 13) Makahatag man kita sing materyal nga bulig sa pamilya nga may nagasolo nga ginikanan sa nagakaigo kag dungganon nga paagi. Puede mo bala sila madul-ungan sing pagkaon ukon grocery sa ila balay? May mga bayo ka bala nga puede mo mahatag sa iya ukon sa iya kabataan? Ukon puede mo bala sia mahatagan sing kuarta para sa kinahanglanon sang iya pamilya?

Makig-upod sa ila

Nagsugo si Jehova nga ilakip ang mga balo kag ilo sa mga kapiestahan sang pungsod kada tuig, para malipay sila sa pagpakig-upod sa pareho nila nga Israelinhon. Ginsingganan pa gani sila: ‘Magkalipay kamo.’ (Deuteronomio 16:10-15) Subong, ginasugo man ang mga Cristiano nga mangin ‘maabiabihon sa isa kag isa,’ para mangin makalilipay ang pag-inupdanay. (1 Pedro 4:9) Ngaa indi mo pag-agdahon ang nagasolo nga ginikanan kag ang iya pamilya nga magkaon upod sa inyo? Indi kinahanglan nga damo gid ang handa. “Pila lamang ka butang ang kinahanglan, ukon isa lamang,” siling ni Jesus sang magkadto sia sa balay sang iya mga abyan.—Lucas 10:42.

Ginapasalamatan Gid ang Imo Bulig

Si Kathleen, nga isa ka nagasolo nga ginikanan nga may tatlo ka kabataan, nagsiling nga indi gid niya malipatan ining maalamon nga laygay, “Pasalamati ang ara; indi magpaabot sang wala.” Pareho kay Kathleen, nahibal-an gid sang nagasolo nga mga ginikanan nga responsibilidad nila ang pagpadaku sang ila kabataan. Wala nila ginapaabot nga tungdan ini sang iban. Pero, sigurado nga apresyahon nila kon buligan sila. Maayo gid ang epekto sini sa nagasolo nga mga ginikanan kag mangin malipayon ka kon buligan mo sila. Makasalig ka nga si Jehova nga Dios ‘magabayad sa imo.’—Hulubaton 19:17, APD.

[Nota]

[Retrato sa pahina 24]

San-o mo ulihi nga gin-agda nga magkaon upod sa inyo ang nagasolo nga ginikanan kag ang iya pamilya? Ngaa indi mo ini paghimuon dayon?