Maistorya Bala ang mga Espiritu?

GINTUGYAN sang Labing Gamhanan nga Dios ang pila ka responsibilidad sa iban nga mga espiritu. Halimbawa, gintugyan niya kay Jesucristo ang paggahom sa duta, kag nagtangdo sia sing matutom nga mga anghel para magbulig sa mga nagawali sang maayong balita. (Bugna 14:6) Pero wala niya gintugyan sa iban ang pagpamati sa pangamuyo, kay dapat i-direkta lamang ini sa Dios.

Si Jehova ang “nagapamati sang pangamuyo.” (Salmo 65:2) Ginapamatian gid niya ang aton pangamuyo kag ginasabat ini. Parte sa sini, si apostol Juan nagsulat sa pareho niya nga mga alagad ni Jehova: “Bisan ano ang pangayuon naton suno sa iya kabubut-on, nagapamati [ang Dios] sa aton. Dugang pa, kon nahibaluan naton nga nagapamati sia sa aton nahanungod sa bisan ano nga ginapangayo naton, nahibaluan naton nga matigayon naton ang mga butang nga ginpangayo sanglit ginpangayo naton ini sa iya.”—1 Juan 5:14, 15.

Indi gusto sang matutom nga mga anghel nga pakig-angutan sila ukon pangamuyuan. Naintiendihan nila kag ginasunod ang pagsulundan sang Dios sa pangamuyo, kag kon kaisa ginagamit pa gani sila. Sa ano nga paagi? Sang nangamuyo si propeta Daniel kay Jehova  parte sa kalaglagan sang Jerusalem, ginsabat sia sang Dios paagi sa pagpadala kay anghel Gabriel para pabakuron sia.—Daniel 9:3, 20-22.

Mensahe Halin sa mga Patay?

Pakig-angutan bala naton ang mga patay? Madamo ang nagsiling nga naistorya nila ang espiritu sang mga patay. Halimbawa sa Ireland, may babayi nga ginkontak sang isa ka espiritista nga nagsiling nga naistorya niya si Fred, ang bana sang babayi. Pero pila na ka semana nga napatay si Fred. Ginsugid sini nga espiritista ang mga butang nga ginsiling ni “Fred,” nga para sa asawa sila lang ni Fred ang nakahibalo. Daw makasiling gid ining babayi nga buhi si Fred sa lugar sang mga espiritu, kag ginapakig-angutan sia paagi sining espiritista. Pero, wala nagsiling ang Biblia nga amo sini ang kahimtangan sang mga patay.—Basaha ang kahon sa ubos.

Kon amo, ano ang paathag sa sini nga mga istorya? Ang isa ka paagi sang mga demonyo sa pagdaya sa mga tawo amo ang pag-ilog sa hitsura sang mga napatay, pareho ni Fred. Ano ang ila motibo? Para ipalayo ang mga tawo sa ginatudlo sang Biblia, kag paluyahon ang ila pagtuo kag pagsalig kay Jehova. Ginapatalang ni Satanas kag sang mga demonyo ang mga tawo paagi sa “tagsa ka gamhanan nga buhat kag butig nga mga tanda kag mga kalatingalahan kag may tagsa ka di-matarong nga pagpangdaya para sa mga nagakalaglag.”—2 Tesalonica 2:9, 10.

Ang iban nga espiritista kag ang mga nagakadto sa ila nagapati gid nga nagapakig-angot  sila sa mga patay. Pero ang matuod, kon may napakig-angutan gid man sila, ina amo ang mga espiritu nga nagrebelde kay Jehova. Pareho gid sini ang mga nagapati nga ginasimba nila ang Dios pero wala gali. Ginpasulat sang Dios kay apostol Pablo ini nga paandam: “Ang mga butang nga ginahalad sang mga pungsod ginahalad nila sa mga demonyo, kag indi sa Dios.”—1 Corinto 10:20, 21.

Kon puede gali kita makapangamuyo sa Labing Gamhanan nga nagahigugma kag nagaulikid sa aton, ngaa mangamuyo pa kita sa iban? Isa pa, ang Biblia nagapasalig: “Kay ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”—2 Cronica 16:9.

[Blurb sa pahina 9]

Kon puede gali kita makapangamuyo sa Labing Gamhanan nga nagahigugma kag nagaulikid sa aton, ngaa mangamuyo pa kita sa iban?

[Kahon/Retrato sa pahina 8, 9]

Husto kag Sala

HUSTO: SI SATANAS MATUOD NGA PERSONA

“Si Satanas mismo padayon nga nagahimo sang iya kaugalingon nga anghel sang kapawa.”—2 Corinto 11:14.

“Hupti ang inyo kaligdong, mangin mabinantayon. Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.”—1 Pedro 5:8.

“Sia nga nagapadayon sa pagpakasala naggikan sa Yawa, bangod ang Yawa nagapakasala kutob sa ginsuguran.”—1 Juan 3:8.

“Gani, magpasakop kamo sa Dios; apang pamatuki ang Yawa, kag magapalagyo sia sa inyo.”—Santiago 4:7.

‘Ang Yawa manugpatay sing tawo sang nagsugod sia sa iya kalautan, kag wala sia magpabilin nga malig-on sa kamatuoran, bangod ang kamatuoran wala sa iya. Kon maghambal sia sang kabutigan, nagahambal sia suno sa iya kinaugali, bangod butigon sia kag amay sang kabutigan.’—Juan 8:44.

SALA: KON MAPATAY ANG TAWO, MAGASAYLO SIA SA PIHAK NGA KINABUHI

“Sa balhas sang imo nawung magakaon ka sing kalan-on tubtub nga magbalik ka sa duta, kay ginkuha ka sa iya; yab-ok ka, kag sa yab-ok magabalik ka.”—Genesis 3:19.

“Ang buhi nakahibalo nga mapatay sila, apang ang patay wala makahibalo sang bisan ano.”—Manugwali 9:5.

“Ang bisan ano nga makita nga himoon sang imo kamut, himoa ini sa imo gahum; kay sa Sheol [ang lulubngan] nga imo ginakadtoan walay buluhaton ukon pahito ukon ihibalo ukon kaalam.”—Manugwali 9:10.

“Kon maggowa ang iya ginhawa nagabalik sia sa iya duta; sa amo nga adlaw nagakawala ang iya mga hunahuna.”—Salmo 146:4.

HUSTO: NAGAULIKID SA ATON ANG MATUTOM NGA MGA ANGHEL

“Ang anghel sang GINOO nagabantay sa mga nagatahod sa GINOO, kag ginaluwas niya sila.”—Salmo 34:7; 91:11, Ang Pulong sang Dios, APD.

“Indi bala sila tanan [nga mga anghel] mga espiritu para sa pagpangalagad sa publiko, nga ginpadala agod mag-alagad sa mga magapanubli sang kaluwasan?”—Hebreo 1:14.

“Nakita ko ang isa pa ka anghel nga nagalupad sa tunga sang kalangitan, kag may yara sia wala katapusan nga maayong balita nga ipahayag subong makalilipay nga balita sa mga nagapuyo sa duta, kag sa tagsa ka pungsod kag tribo kag hambal kag katawhan, nga nagasiling sa mabaskog nga tingog: ‘Kahadluki ninyo ang Dios kag hatagi sia sang himaya.’”—Bugna 14:6, 7.

SALA: SI JESUS TUPONG SA DIOS

“Luyag ko nga mahibaluan ninyo nga ang ulo sang tagsa ka lalaki amo ang Cristo; ang ulo naman sang babayi amo ang lalaki; ang ulo naman sang Cristo amo ang Dios.”—1 Corinto 11:3.

“Kon mapasakop na ang tanan nga butang sa iya, nian ang Anak mismo magapasakop man sa Isa nga nagpasakop sang tanan nga butang sa iya, agod ang Dios mangin tanan nga butang sa tanan.”—1 Corinto 15:28.

“Sa pagkamatuod nagasiling ako sa inyo, Ang Anak indi makahimo sang bisan ano sa iya lamang kaugalingon, kundi ang makita niya lamang nga ginahimo sang Amay.” —Juan 5:19.