Magtuon sa Pulong sang Dios

Ngaa Dapat Kita Magpatudlo sa Dios?

Makita sa sini nga artikulo ang mga pamangkot nga mahimo ginapaligban mo kag kon diin nga bahin sang Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa dapat kita magpatudlo sa Dios?

Ang Dios may maayong balita para sa mga tawo. Ginasugid niya ini sa aton paagi sa Biblia. Ang Biblia pareho sa isa ka sulat halin sa aton mahigugmaon nga Amay sa langit.—Basaha ang Jeremias 29:11.

2. Ano ang maayong balita?

Kinahanglan sang mga tawo ang maayo nga gobierno. Wala gid masolbar sang paggahom sang tawo ang kapintas, inhustisya, balatian, ukon kamatayon. Pero may maayong balita. Magahimo ang Dios sing maayo nga gobierno nga magadula sang tanan nga kabangdanan sang pag-antos.—Basaha ang Daniel 2:44.

3. Ngaa importante nga magpatudlo sa Dios?

Malapit na lang dulaon sang Dios ang mga nagapaantos sa iban. Pero ginatudluan niya anay ang minilyon ka mapainubuson nga magpakita sing gugma para mangin mas maayo ang ila kabuhi. Paagi sa Pulong sang Dios, matun-an sang mga tawo kon paano atubangon ang mga problema, pahamut-an ang Dios, kag mangin malipayon.—Basaha ang Sofonias 2:3.

  4. Sin-o ang Awtor sang Biblia?

Ang Biblia may 66 ka magagmay nga tulun-an. Mga 40 ka lalaki ang nagsulat sini. Ang una nga lima ka tulun-an ginsulat ni Moises mga 3,500 ka tuig na ang nagligad. Ang pinakaulihi ginsulat ni apostol Juan sing sobra sa 1,900 ka tuig na ang nagligad. Pero ginsulat sang mga manunulat sang Biblia indi ang ila panghunahuna, kundi ang iya sang Dios. Gani, ang Awtor sini amo ang Dios.—Basaha ang 2 Timoteo 3:16; 2 Pedro 1:21.

Ang Biblia halin gid sa Dios kay detalyado kag eksakto ang ginasiling sini parte sa palaabuton. Wala sing tawo nga makahimo sini. (Isaias 46:9, 10) Ginasugid man sini ang mga kinaiya sang Dios. Makapabag-o ini sang kabuhi sang tawo. Amo kon ngaa kumbinsido ang minilyon nga ang Biblia Pulong sang Dios.—Basaha ang Josue 23:14; 1 Tesalonica 2:13.

5. Paano mo maintiendihan ang Biblia?

Si Jesus bantog nga manunudlo sang Pulong sang Dios. Bisan pa ang kalabanan sa iya naistorya pamilyar sa Biblia, kinahanglan sila buligan nga maintiendihan ini. Gani madamo si Jesus sing ginsambit nga mga bersikulo kag ginpaathag niya “ang kahulugan sang Kasulatan.” Para mabuligan ka, amo man sini ang pamaagi sining “Magtuon sa Pulong sang Dios” nga artikulo.—Basaha ang Lucas 24:27, 45.

Makalilipay gid ang magpatudlo sa Dios parte sa katuyuan sang kabuhi. Mahimo nga indi gusto sang iban nga magbasa ka sang Biblia. Pero sigeha lang, kay dapat nga makilala mo ang Dios para may paglaum ka nga mabuhi sing walay katapusan.—Basaha ang Mateo 5:10-12; Juan 17:3.

Para sa dugang nga impormasyon, basaha ang kapitulo 2 sini nga libro, Ano Gid ang Ginatudlo sang Biblia? nga ginhimo sang mga Saksi ni Jehova.