Ang Ginharian sang Dios Ara Bala sa Tagipusuon?

“Ang Ginharian sang Dios magakari sa mabinatunon nga tagipusuon,” siling ni Papa Benedict XVI sa iya libro nga Jesus of Nazareth. Ang iban nagapati gid nga ang Ginharian sang Dios amo ang pagbag-o sang isa ka tawo kon batunon niya si Jesucristo kag magtuo sa iya. Amo bala sini ang Ginharian sang Dios, isa ka ginharian nga ‘sa imo lamang tagipusuon’?

IMPORTANTE gid kay Jesus ang Ginharian. Amo ini “ang sentro sang pagwali ni Jesus,” siling ni Papa Benedict. Sa malip-ot nga panahon sang pagministeryo ni Jesus, naglibot sia sa mga kadutaan, nga “nagabantala sang maayong balita sang ginharian.” (Mateo 4:23) Paagi sa iya pagpanudlo kag mga milagro, ginpakita ni Jesus nga ang Ginharian indi pagbaton sa Dios kag pagtuman sa iya. Kundi isa ini ka paggahom, paghukom, kag wala sing katapusan nga mga pagpakamaayo.

Paggahom kag Paghukom

Isa ka bes, sang madali na lang matapos ang ministeryo ni Jesus, ang iloy sang iya suod nga mga disipulo nga sanday Santiago kag Juan, nagsiling sa iya: “Isiling mo nga ining duha ko ka anak maglingkod sa imo ginharian, ang isa sa imo tuo kag ang isa sa imo wala.” (Mateo 20:21) Maathag nga wala niya ginatumod ang isa ka butang sa tagipusuon sang iya mga anak. Naintiendihan niya nga magagahom si Jesus sa Ginharian, kag gusto niya nga didto man ang iya mga anak. Ang matuod, ginpromisahan gid man ni Jesus ang iya 11 ka matutom nga apostoles nga makaupod niya sila sa iya Ginharian kag ‘magalingkod sa mga trono’ kag ‘magahukom.’ (Lucas 22:30) Gani para sa iya mga sumulunod, ang Ginharian ni Jesus isa ka matuod nga paggahom, administrasyon, kag paggobierno.

Ano naman ang pagpati sang mga tawo sang panahon ni Jesus? Para bala sa ila ang Ginharian isa lang ka pagbag-o sang tawo, ukon may iban pa ini nga kahulugan? Antes sang Paskua sang 33 C.E., nagsulod si Jesus sa Jerusalem nga nagasakay sa polyino. Ginbaton nila sia kag ang iban nagsinggit: “Luwasa, nagapangamuyo kami, ang Anak ni David!” (Mateo 21:9) Ngaa amo sini ang ila ginsinggit? Mahimo gid nga nahibaluan nila nga si Jesus amo ang ginpromisa nga Mesias kag ihatag sa iya sang Dios ang wala sing katapusan nga Ginharian, “ang trono ni David nga iya amay.” Ginahulat nila ang kaluwasan, paghidait, kag katarungan nga ihatag sini nga Ginharian.—Lucas 1:32; Zacarias 9:9.

Wala sing Katapusan nga Pagpakamaayo

Bisan ang mga tawo nga indi interesado sa ministeryo ni Jesus nakahibalo sang iya mga panudlo parte sa Ginharian. Sang ginlansang si Jesus, ang kriminal sa tupad niya nagpakitluoy: “Jesus, dumduma ako kon magsulod ka sa imo ginharian.” Ano ang sabat ni Jesus? “Mangin kaupod ko ikaw sa Paraiso,” pasalig niya sa nagatagumatayon nga tawo.—Lucas 23:42, 43.

Ining makawat nagapati gid nga pagkatapos mabanhaw, si Jesus magabaton ukon magasulod sa isa ka Ginharian. May awtoridad si Jesus nga banhawon kag buligan nga magbag-o ang makawat, pati ang minilyon pa ka tawo. Kag  gusto gid niya nga himuon ini. Bilang may awtoridad nga Manuggahom sa langit, ihatag ni Jesus ang wala sing katapusan nga pagpakamaayo sa mga tawo sa bilog nga duta paagi sa Ginharian.—Juan 5:28, 29.

Ang Ginharian sa Tunga Nila

Indi bala nagsiling si Jesus: “Ang ginharian sang Dios yara sa tunga ninyo”? Mabasa ini sa Lucas 17:21. Ang iban gani nga bersion sang Biblia nagasiling nga “ang paghari sang Dios ara mismo sa inyo,” kag ang iban naman “yara na sa tunga ninyo.” (Tan-awa palihug Ang Pulong sang Dios kag ang Biblia sang Katilingban sang mga Kristiano.) Ano ang buot silingon ni Jesus?

Kon basahon naton ang bersikulo antes sini, ang ginhambalan sini ni Jesus amo ang mga Fariseo, ang Judiyo nga relihion nga nagahingabot sa iya. Gani, sigurado gid nga wala ginapatuhuyan ni Jesus ang ila pagbag-o ukon nga may ara sila mabinatunon nga tagipusuon. Lain ang ila ginapaabot parte sa Mesias kag sa iya Ginharian. Nagapati sila nga ang Mesias magakari, “upud sa mga panganud sang langit” bilang mahimayaon nga Hari, kag magaluwas sa mga Judiyo sa mga Romano kag magapasag-uli sang ginharian sang Israel. (Daniel 7:13, 14) Pero, ginpakita ni Jesus nga sala sila sang nagsiling sia: “Ang ginharian sang Dios indi mag-abot nga madali matalupangdan.” Kag nagdugang sia: “Yari karon! ang ginharian sang Dios yara sa tunga ninyo.”—Lucas 17:20, 21.

Bisan pa napamatud-an nga si Jesus ang ginpromisa nga Hari sang Ginharian paagi sa iya gintudlo kag mga milagro, ginhingabot pa gid sia sang mga Fariseo bangod wala sila sing pagtuo kag malain ang ila motibo. Nagduhaduha sila nga si Jesus ang Mesias. Gani, ginhambal ni Jesus ang kamatuoran sa ila: Ang Ginharian, nga ginarepresentar sang mangin Hari sini, ara ‘sa tunga nila.’ Wala sia naghambal nga tan-awon nila ang ila mismo kaugalingon. Upod nila si Jesus kag ang iya mga disipulo. “Ang ginharian sang Dios ari diri kaupod ninyo,” siling niya.—Lucas 17:21, Contemporary English Version.

Isa ka Ginharian nga Importante sa Imo

Ang Ginharian sang Dios wala sa tagipusuon sang makasasala nga mga tawo. Pero dapat importante ini sa aton. Paagi sa iya mga panudlo kag mga milagro, ginbuligan ni Jesus ang iya mga tagpalamati nga magtuo sa matarong nga paggobierno nga magadala sang matuod nga paghidait kag kalig-unan. Gusto niya nga ang ila pagtuo magapaayo sang ila kabuhi. Gintudluan niya sila nga mangamuyo: “Amay namon nga yara sa langit, pakabalaanon ang imo ngalan. Magkari ang imo ginharian. Matuman ang imo kabubut-on sa duta, subong sang sa langit.” (Mateo 6:9, 10) Madamo sang tagpalamati ni Jesus ang napahulag sang iya ginhambal, nagtuo, kag nagsunod sa iya para mabaton ang pagpakamaayo sang Ginharian sang Dios.

Gusto mo bala ang amo man sini nga pagtuo? Ano ang himuon mo para matigayon ini? Dumduma ang ginsiling ni Jesus sa iya Sermon sa Bukid: “Malipayon ang mga mahunahunaon sang ila espirituwal nga kinahanglanon, kay ila ang ginharian sang langit.” (Mateo 5:3) Gani, batuna ang imbitasyon nga magtuon sing Biblia upod sa mga Saksi ni Jehova, ang naghatag sa imo sining magasin. Kon himuon mo ini, magabag-o ang imo kabuhi, kag may paglaum ka nga magkabuhi sa isa ka matarong nga paggahom sang Ginharian nga magahatag sang paghidait kag kalig-unan sa tanan.

[Blurb sa pahina 11]

Ang Ginharian sang Dios ara bala sa tagipusuon sang batinggilan kag manugpatay nga manughingabot ni Jesus?