Magtuon sa Pulong sang Dios

Ngaa Ginatugutan sang Dios ang Kalautan kag Pag-antos?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Paano nagsugod ang kalautan?

Nagsugod ang kalautan sa duta sang nagbinutig si Satanas. Indi sia malaut sang gintuga sia. Isa sia anay ka perpekto nga anghel, pero “wala sia magpabilin nga malig-on sa kamatuoran.” (Juan 8:44) Ginhandum niya ang pagsimba nga para lamang sa Dios. Nagbutig si Satanas sa una nga babayi nga si Eva, kag ginkumbinsi ini nga supakon ang Dios. Ginsupak man ni Adan ang Dios kag nagresulta ini sang pag-antos kag kamatayon.—Basaha ang Genesis 3:1-6, 17-19.

Nagrebelde si Satanas sa pagkasoberano sang Dios sang ginganyat niya si Eva nga supakon ang Dios. Madamo nga tawo ang nagbuylog kay Satanas sa pagsikway sa Dios bilang Manuggahom. Gani, si Satanas amo ang nangin “manuggahom sang kalibutan.”—Basaha ang Juan 14:30; Bugna 12:9.

2. May diperensia bala ang mga tinuga sang Dios?

Masarangan gid sang mga tawo kag mga anghel nga gintuga sang Dios nga tumanon Sia. (Deuteronomio 32:5) Gintuga kita sang Dios nga may kahilwayan sa pagpili kon ano ang maayo kag malaut. Paagi sini nga kahilwayan, mapakita naton ang aton gugma sa Dios.—Basaha ang Santiago 1:13-15; 1 Juan 5:3.

3. Ngaa ginatugutan sang Dios ang pag-antos?

Gintugutan ni Jehova ang pagrebelde sa iya pagkasoberano para ipakita nga malain gid ang resulta kon tawo ang maggahom. (Jeremias 10:23) Napamatud-an ini sa sulod sang 6,000 ka tuig sugod sang gintuga ang una nga tawo. Wala nadula sang manuggahom nga mga tawo ang inaway, krimen, inhustisya, kag balatian.—Basaha ang Manugwali 7:29; 8:9; Roma 9:17.

Sa pihak nga bahin, makabenepisyo gid ang mga nagabaton sa Dios bilang ila Manuggahom. (Isaias 48:17, 18) Malapit na lang dulaon ni Jehova ang tanan nga gobierno sang tawo. Ang mga nagapasakop lamang sa paggahom sang Dios ang makaistar sa duta.—Isaias 2:3, 4; 11:9; basaha ang Daniel 2:44.

  4. Paano kita nagapanginpulos sa pagkamapinasensiahon sang Dios?

Nagsiling si Satanas nga indi mangin matutom ang mga tawo kay Jehova. Bangod sa pagkamapinasensiahon sang Dios, may kahigayunan kita nga ipakita kon bala dampig kita sa paggahom sang Dios ukon sa paggahom sang tawo. Mapakita naton ini sa aton pagkabuhi.—Basaha ang Job 1:8-11; Hulubaton 27:11.

5. Paano naton mapakita nga ginapili naton ang Dios bilang Manuggahom?

Mapakita naton ini kon hibaluon naton kag sundon ang ginasiling sang Pulong sang Dios, ang Biblia, parte sa matuod nga pagsimba. (Juan 4:23) Pareho kay Jesus, ginalikawan man naton nga mag-entra sa pulitika kag inaway.—Basaha ang Juan 17:14.

Ginagamit ni Satanas ang iya gahom para himuon naton ang imoral kag makahalalit nga mga butang. Kon likawan naton ang paghimo sini, mahimo nga pakalainon kita ukon pamatukan sang aton mga abyan kag paryente. (1 Pedro 4:3, 4) Gani, dapat kita magdesisyon nga makig-upod sa mga nagahigugma sa Dios kag tumanon ang iya maalamon kag mahigugmaon nga mga kasuguan. Kon himuon naton ini, mapamatud-an naton nga butigon si Satanas sang nagsiling sia nga wala sing tawo nga magatuman sa Dios.—Basaha ang 1 Corinto 6:9, 10; 15:33.

Para sa dugang nga impormasyon, basaha ang kapitulo 11 sini nga libro, Ano Gid ang Ginatudlo Sang Biblia?,  nga ginhimo sang mga Saksi ni Jehova.

[Retrato sa pahina 16]

Ginpili ni Adan ang kalautan

[Retrato sa pahina 17]

Ginapakita sang aton mga desisyon kon bala dampig kita sa Dios bilang aton Manuggahom