“Si Jehova ang Akon Manugbantay”
Mangin Suod sa Dios
“Si Jehova ang Akon Manugbantay”
TAN-AWA ang piktyur sa sini nga pahina. Ano ayhan ang nabatyagan sang karnero samtang ginakugos ini sang iya manugbantay? Sa Salmo 23, ginpaanggid ang mapinalanggaon nga pag-atipan ni Jehova nga Dios sa iya mga sumilimba sa pag-atipan sang isa ka manugbantay sa iya mga karnero. Gusto niya nga mabatyagan naton ang ginabatyag sang iban, pareho ni David, nga nagsiling: “Si Jehova ang akon Manugbantay.” *—Bersikulo 1, NW.
Ang manunulat sini nga salmo nga si David manugbantay sang karnero sang pamatan-on sia. Nahibaluan niya ang mga kinahanglanon sang mga karnero kag ang mga responsibilidad sang isa ka manugbantay. Ginsulat ni David, nga nakaeksperiensia sang pag-atipan sang Dios, ang gintawag nga “salmo sang pagsalig.” Ang balaan nga ngalan nga Jehova makita sa umpisa kag sa katapusan sini nga salmo. (Bersikulo 1, 6, NW) Ginapakita man sini ang tatlo ka paagi nga ginaatipan ni Jehova ang iya katawhan pareho sang manugbantay nga nagaatipan sa iya mga karnero.—Salmo 100:3.
Ginagiyahan ni Jehova ang iya mga karnero. Ang mga karnero nga wala sing manugbantay madali madula. Gani, kinahanglan man naton ang bulig para mahibaluan ang husto nga dalanon. (Jeremias 10:23) Nagsiling si David nga ginagiyahan ni Jehova ang iya katawhan “sa hilaw nga mga halalbon,” “sa luyo sang mga tubig nga malinaw,” kag “sa mga banas sang pagkamatarung.” (Bersikulo 2, 3) Ginapakita sini nga makasalig kita sa Dios. Kon ginasunod naton ang paggiya sang Dios nga makita sa Biblia, maeksperiensiahan naton ang kalipay, kaumpawan, kag kalig-unan.
Ginaamligan ni Jehova ang iya mga karnero. Ang mga karnero nga wala sing manugbantay makaluluoy kag nahadlok. Ginasilingan ni Jehova ang iya katawhan nga indi sila dapat mahadlok, bisan pa “nagalatas [sila] sang nalupyakan sang landong sang kamatayon,” ukon sa pinakamabudlay nga tion sang ila kabuhi. (Bersikulo 4) Ginabantayan sila ni Jehova, kag handa sia pirme nga buligan sila. Ginahatagan niya ang iya mga sumilimba sing kaalam kag kusog para maatubang nila ang mga kabudlayan.—Filipos 4:13; Santiago 1:2-5.
Ginapakaon ni Jehova ang iya mga karnero. Nagasalig ang mga karnero sa ila manugbantay sa pagpangita sang pagkaon. May espirituwal man kita nga mga kinahanglanon nga matigayon lamang naton sa bulig ni Jehova. (Mateo 5:3) Maalwan sia nga Manug-aman nga nagahanda sing bugana nga espirituwal nga pagkaon para sa iya mga alagad. (Bersikulo 5) Ang Biblia kag ang mga publikasyon base sa Biblia, pareho sini nga magasin, nagabusog sang aton espirituwal nga mga kinahanglanon. Gani, nahibaluan naton ang kahulugan sang kabuhi kag ang katuyuan sang Dios para sa aton.
Nakabatyag si David sing kalig-unan kay nahibaluan niya nga kon magpabilin sia nga suod sa iya langitnon nga Manugbantay, maeksperiensiahan niya ang Iya mahigugmaon nga pag-atipan “sa tanan nga adlaw sang [iya] kabuhi.” (Bersikulo 6) Gusto mo bala ini mabatyagan? Kon amo, tun-i kon paano mangin suod kay Jehova. Paagi sini, maeksperiensiahan mo ang paggiya, pag-amlig, kag pagpakaon sang Daku nga Manugbantay sa mga mainunungon sa iya.—Isaias 40:11.
Bahin sang Biblia nga mahimo basahon sa Mayo:
[Nota]
^ par. 1 Madamo ang pamilyar sa translation nga “Ang GINUO akon Manugbantay.” Para mahibaluan kon ngaa gindula sang iban nga translation sang Biblia ang balaan nga ngalan nga Jehova, basaha ang pahina 195-197 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.
