May Katuyuan nga Kabuhi Subong kag sa Palaabuton

MATIGAYON mo ang kabuhi nga may katuyuan bisan subong. Paano? Kon sundon mo ang mga prinsipio sang Pulong sang Dios, ang Biblia. Binagbinagon naton ang pila sa sini.

PRINSIPIO SA BIBLIA: “Wala na sing maayo pa sa tawo,” sulat ni Hari Solomon, “sang sa magkaon sia kag mag-inum, kag magkalipay ang iya kalag sing kaayohan sa iya kinabudlayan.”—MANUGWALI 2:24.

Gintuga kita nga magkalipay sa aton ginaobra. Bisan mabudlay katama ang imo kahimtangan subong, mangin malipayon ka kon mapisan ka kag tampad sa imo ginahimo.

PRINSIPIO SA BIBLIA: “May kapin nga kalipay sa paghatag sangsa pagbaton.”—BINUHATAN 20:35.

Madamo ang naggamit sang ila tion kag kusog para buligan ang iban sa tion sang kabudlayan, kag naghatag ini sing daku nga kalipay kag katuyuan sa ila kabuhi. “Indi pag-idingot ang maayo sa mga nagakinahanglan sini,” sulat ni Solomon, “kon masarangan mo ini himuon.”—Hulubaton 3:27, NW.

Binagbinaga ang halimbawa ni Ralph. Sang nagretiro sia, gin-updan niya ang iya asawa sa pagwali sa mga balay nga nagahinguyang sing madamo nga oras sa pagtudlo  sing Biblia sa iban kada bulan. “Kon magpauli kami sa gab-i, nakapoy kami indi lang bangod tigulang na kami, kundi bangod gingamit namon ang amon kusog sa pag-alagad sa aton Amay sa langit,” siling ni Ralph. “Pero malipayon gid kami!” Malipayon sila nga mag-asawa kay ginauna nila sa ila kabuhi ang paghatag.

PRINSIPIO SA BIBLIA: “Ang isa ka abyan nagahigugma sa tanan nga tion, kag ang isa ka utud natawo tungud sa kapiotan.”—HULUBATON 17:17.

Mahapos atubangon ang mga problema kon may nagabulig sa imo. Ang Ingles nga pilosopo, nga si Francis Bacon, nagsulat nga ang mga tawo nga wala sing matuod nga mga abyan daw “pareho lang nga nadula sa desyerto.” Kon may matuod ka nga mga abyan, kag kon maayo ka nga abyan, mangin makalilipay ang imo kabuhi bisan pa may mga problema.

PRINSIPIO SA BIBLIA: “Malipayon ang mga mahunahunaon sa ila espirituwal nga kinahanglanon.”—MATEO 5:3.

Suno kay Jesus, para matigayon mo ang mga promisa sang Dios, dapat mo hibaluon kag busgon ang imo “espirituwal nga kinahanglanon.” Indi pareho sa mga sapat, dapat naton mahangpan ang katuyuan sang kabuhi. Si Jehova nga Dios lamang ang makahatag sini paagi sa iya Pulong, ang Biblia. Sa nagligad nga artikulo, ginpakita sang Biblia ang katuyuan sang Dios sa duta. Ginasugid sini kon ngaa ari kita diri, kon ngaa grabe ang pag-antos, kag kon ano ang ginapaabot sang Dios nga himuon naton. Dapat naton mahangpan ini nga mga kamatuoran para mangin malipayon kag may katuyuan ang aton kabuhi. Malipayon ang mga tawo nga nagatuon sa Biblia kag nagatuman sang ila natun-an. Ngaa? Bangod nagatukod sila sing mabakod nga kaangtanan sa aton Manunuga, ang “malipayon nga Dios,” si Jehova.—1 Timoteo 1:11.

PRINSIPIO SA BIBLIA: “Dumduma man ang imo Manunuga . . . sa wala pa mag-abut ang malaut nga mga adlaw, kag magpalapit ang mga tuig, nga magsiling ka, ‘Wala ako sing kalipay sa ila.’”—MANUGWALI 12:1.

Importante gid sa aton tanan ang laygay ni Hari Solomon sa mga pamatan-on, nga mahimo nagabalewala sa mga kabudlayan nga ila maatubang. Unaha pirme ang imo Manunuga kay makahatag ini sing katuyuan sa imo kabuhi. Likawi ang panimuot nga, “Magkaon kita kag mag-inom, kay buas mapatay kita.” (1 Corinto 15:32) Kon unahon  mo ang Dios, “manginmaayo” ang imo madangatan, siling sang Manugwali 8:12.

Naeksperiensiahan ini sang isa ka babayi nga si Wendi. Sang pamatan-on sia, nagtuon sila sang iya manghod sing Spanish para makasaylo sa Dominican Republic, diin kinahanglan ang dugang nga manugwali sang maayong balita sang Biblia. “Madamo kami sing ginsakripisyo para buligan ang mga tawo sa iban nga lugar, pero malipayon kami. Indi ko gid pag-ibaylo ang amon ginhimo sa anom ka bulan! Mas madamo ang amon pagpakamaayo sangsa amon ginsakripisyo.”

Ang Katutom sa Dios Nagahatag sing Katuyuan sa Kabuhi

Kon maayo ang imo kaangtanan kay Jehova, may pinasahi nga katuyuan ang imo kabuhi. Paano? Wala lamang ginsulay ni Satanas sanday Adan kag Eva nga magrebelde sa paggahom sang Dios, kundi ginpakita man niya nga wala sing tawo nga magapabilin nga matutom sa Dios kon nagaatubang sing mga kabudlayan. (Job 1:9-11; 2:4) Pero mapamatud-an mo nga butigon si Satanas! Paano? Kon magpabilin ka nga matutom kay Jehova nga Dios, tumanon ang iya mga prinsipio, kag kilalahon nga sia lamang ang may kinamatarong sa paghibalo kon ano ang maayo kag malain.—Bugna 4:11.

Kon gusto naton himuon ang matarong, kinahanglan naton batason ang mga kabudlayan. Madula bala sang mga kabudlayan ang katuyuan sang aton kabuhi? Halimbawa, may mapintas nga kaaway nga nagapakalain sa aton abyan ukon kapamilya. Kon nag-antos kita bangod ginpangapinan naton ang reputasyon sang aton pinalangga, madula bala sini ang katuyuan sang aton kabuhi? Indi! Nalipay kita nga apinan sia. Amo man sini kon magpabilin kita nga matutom sa Dios. Ang aton katutom bisan pa may mga kabudlayan nagapahalipay sa Dios.—Hulubaton 27:11.

May Katuyuan nga Kabuhi Asta San-o

Himua ang imo masarangan nga magtuon parte sa Dios kag sa iya katuyuan. Nagsiling si Jesucristo: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Kon himuon na sang Dios ang iya orihinal nga katuyuan sa duta, matigayon sang matutom nga mga tawo ang katuyuan ni Jehova para sa ila—ang “kabuhi nga walay katapusan” sa paraiso nga duta. Mangin makalilipay na kag may katuyuan ang kabuhi.—Salmo 145:16.

Diin mo makuha ini nga ihibalo nga ginsiling ni Jesus? Sa Pulong sang Dios, ang Biblia. Para mabuligan ka, magsulat lang sa mga manugbalhag sini nga magasin. Nalipay sila nga matun-an mo kon ano gid ang ginatudlo sang Biblia.