Magtuon sa Pulong sang Dios

Paano Mangin Malipayon ang Imo Pamilya?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa importante ang pag-asawahay para mangin malipayon ang pamilya?

Si Jehova, nga malipayon nga Dios, ang ginhalinan sang pag-asawahay. Paagi sa sini, ang isa makatigayon sing kaupod kag maatipan sing maayo ang kabataan. Paano ginatamod sang Dios ang pag-asawahay? Gusto niya nga mangin permanente ini kag narehistro. (Lucas 2:1-5) Gusto man niya nga mangin matutom sa isa kag isa ang bana kag asawa. (Hebreo 13:4) Ginatugutan ni Jehova ang mga Cristiano nga magbulag kag magminyo liwat kon ang ila tiayon nagpanghilahi ukon nakigrelasyon sa iban.—Basaha ang Mateo 19:3-6, 9.

2. Paano dapat pakig-angutan sang bana kag asawa ang isa kag isa?

Gintuga ni Jehova ang lalaki kag babayi nga magbuligay. (Genesis 2:18) Bilang ulo sang pamilya, dapat manguna ang bana sa pag-aman sing materyal nga kinahanglanon sang iya pamilya kag sa pagtudlo sa ila parte sa Dios. Dapat mangin masinakripisyuhon sia bangod sa iya gugma sa iya asawa. Dapat higugmaon kag respetuhon sang bana kag asawa ang isa kag isa. Bangod indi sila perpekto, dapat mangin mapinatawaron sila para mangin malipayon ang ila pag-asawahay.—Basaha ang Efeso 4:31, 32; 5:22-25, 33; 1 Pedro 3:7.

3. Dapat mo bala biyaan ang imo tiayon kon indi kamo malipayon?

Kon may mga problema kamo nga mag-asawa, pakig-anguti ninyo sing mahigugmaon ang isa kag isa. (1 Corinto 13:4, 5) Wala nagsiling ang Biblia nga ang pagbulagay amo ang solusyon sa problema sang mag-asawa. Pero sa pila ka kahimtangan, ang isa ka Cristiano mahimo magdesisyon kon bala bulagan niya ang iya tiayon.—Basaha ang 1 Corinto 7:10-13.

  4. Mga kabataan, ano ang gusto sang Dios para sa inyo?

Gusto ni Jehova nga mangin malipayon kamo. Nagahatag sia sing pinakamaayo nga laygay kon paano kamo magkalipay sa inyo pagkapamatan-on. Gusto niya nga makatuon kamo sa halimbawa sang inyo ginikanan. (Colosas 3:20) Malipay si Jehova kon matinumanon kamo sa inyo ginikanan.—Basaha ang Manugwali 11:9–12:1; Mateo 19:13-15; 21:15, 16.

5. Mga ginikanan, ano ang himuon ninyo para mangin malipayon ang inyo kabataan?

Dapat kamo manikasog nga amanan sing pagkaon, puluy-an, kag bayo ang inyo kabataan. (1 Timoteo 5:8) Pero para mangin malipayon sila, dapat ninyo sila tudluan nga higugmaon kag tumanon ang Dios. (Efeso 6:4) Ang inyo gugma sa Dios may daku nga impluwensia sa inyo kabataan. May maayo man nga epekto ang pagtudlo sa ila nga nabase sa Biblia.—Basaha ang Deuteronomio 6:4-7; Hulubaton 22:6.

Makabenepisyo ang kabataan kon ginadayaw sila kag ginapabakod ang ila kompiansa. Dapat man sila tadlungon kag disiplinahon. Paagi sini, malikawan nila ang paggawi nga makadula sang ila kalipay. (Hulubaton 22:15) Pero ang pagdisiplina indi dapat mapintas.—Basaha ang Colosas 3:21.

Ang mga Saksi ni Jehova nagahimo sang mga libro nga makabulig sa mga ginikanan kag kabataan. Ini nga mga libro nabase sa Biblia.—Basaha ang Salmo 19:7, 11.

Para sa dugang nga impormasyon, basaha ang kapitulo 14 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.