Pamangkot sang mga Bumalasa . . .

Malaglag Bala ang Duta sa 2012?

▪ “Madamo nga tawo ang nagkadto sa isa ka lugar sa Pransia kay para sa ila malapit na ang kalaglagan . . . Nagapati sila nga maguba ang kalibutan sa Disiembre 21, 2012, nga amo ang katapusan sang 5,125 ka tuig sa dumaan nga kalendaryo sang mga Maya.”—BBC News.

May mga prediksion man ang mga lider sang relihion, nagapangangkon nga mga sientipiko, kag mga manugpakot sang ika-21 nga siglo. Pero bisan pa sini, ang duta indi malaglag sa 2012. Ang matuod, ang planeta nga Duta magapabilin indi lang sina nga tuig kundi asta san-o.

Ang Biblia nagasiling: “Ang mga kaliwatan nagataliwan kag nagaalabot, apang ang duta nagapabilin sa walay katubtoban.” (Manugwali 1:4, Biblia sang Katilingban sang mga Kristiano, BKK) Binagbinaga man ang ginasiling sang Isaias 45:18: “Kay amo ini ang ginasiling sang GINOO, . . . nga naghuman sang duta kag naghimo sini nga nagpalig-on sini; wala sia magtuga sini nga walay pulus, nga naghuman sini nga pagpuy-an!: ‘Ako amo ang GINOO, kag wala na gid sing iban.’”

Mangabudlay bala ang isa ka amay sa paghimo sing hampanganan para sa iya bata, kag dayon gub-on niya ini sa tapos mahatag sa iya? Siempre indi! Sing kaanggid, gintuga sang Dios ang duta para malipay ang mga tawo. Ginsilingan sang Dios ang una nga mag-asawa nga sanday Adan kag Eva: “Magmabungahon kag magbuad, kag magtugub sang duta kag magpakaagalon sa iya.” Dayon, “nakita sang Dios ang tagsa ka butang nga nahimo niya, kag yari karon, tama gid kaayo.” (Genesis 1:27, 28, 31) Wala ginbag-o sang Dios ang iya katuyuan sa duta; indi niya pagtugutan nga malaglag ini. Parte sa tanan niya nga promisa, si Jehova nagsiling: “Indi magbalik ini sa akon sa wala sing pulus, kondi magatigayon ini sang akon nahamut-an, kag magauswag ini sa butang nga akon ginpadal-an sini.”—Isaias 55:11.

Kabubut-on ni Jehova nga ‘laglagon ang mga nagalaglag sang duta.’ (Bugna 11:18) Sa iya Pulong, nagpromisa sia: “Ang matadlong magapuyo sa duta, kag ang himpit magapabilin sa sini; apang ang malauton utdon gikan sa duta, kag ang maluib gabuton sa sini.”—Hulubaton 2:21, 22.

San-o ini matabo? Wala sing tawo nga nakahibalo. “Tuhoy sa amo nga adlaw ukon oras wala sing nakahibalo,” siling ni Jesus, “bisan pa ang mga anghel sa langit ukon ang Anak, kundi ang Amay.” (Marcos 13:32) Ang mga Saksi ni Jehova wala nagahimo sing prediksion kon san-o laglagon ang mga malain. Bisan nahibaluan nila ang “tanda” sang katapusan kag nagapati nga nagakabuhi na ang mga tawo sa ginasiling sang Biblia nga “katapusan nga mga adlaw,” wala sila nakahibalo kon san-o gid “ang katapusan.” (Marcos 13:4-8, 33; 2 Timoteo 3:1) Ginatugyan nila ini sa ila Amay sa langit kag sa iya Anak.

Samtang wala pa ini, masako ang mga Saksi ni Jehova sa pagwali sing maayong balita sang Ginharian sang Dios, ang gobierno sa langit nga magagahom kag magahimo sa Duta nga paraiso, diin ‘ang mga matarong padayon nga magaestar sa sina nga duta hasta san-o.’—Salmo 37:29, APD.

[Picture Credit Line sa pahina 10]

Image Science and Analysis Laboratory, NASA-Johnson Space Center