Magtuon sa Pulong sang Dios

Paano Kita Makapili sang Maayo nga mga Abyan?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa dapat naton pilion sing maayo ang aton mga abyan?

Gusto sang madamo nga tawo nga manamian sa ila ang iban. Gani sa masami, gusto naton ilugon ang aton kaupdanan. Daku gid ang impluwensia sang aton mga abyan sa aton paggawi. Makaimpluwensia sila sa aton pagkatawo.—Basaha ang Hulubaton 4:23; 13:20.

Ginpili sing maayo sang manunulat sang Biblia nga si David ang iya mga abyan. Nakig-upod sia sa mga tawo nga nagbulig sa iya nga magmatutom sa Dios. (Salmo 26:4, 5, 11, 12) Halimbawa, nalipay si David nga makig-abyan kay Jonatan bangod ginpabakod sia sini nga magsalig kay Jehova.—Basaha ang 1 Samuel 23:16-18.

2. Paano ka mangin abyan sang Dios?

Bisan gamhanan katama si Jehova, mahimo kita mangin abyan niya. Halimbawa, si Abraham nangin abyan sang Dios. Nagsalig sia kag nagtuman kay Jehova, gani ginkabig sia ni Jehova nga abyan. (Genesis 22:2, 9-12; Santiago 2:21-23) Mangin abyan man kita ni Jehova kon nagasalig kita sa iya kag nagatuman sa ginapahimo niya sa aton.—Basaha ang Salmo 15:1, 2.

  3. Paano makabulig sa imo ang maayo nga mga abyan?

Ang matuod nga mga abyan mainunungon kag nagabulig sa imo nga himuon ang husto. (Hulubaton 17:17; 18:24) Halimbawa, bisan mga 30 ka tuig ang kinamagulangan ni Jonatan kay David kag sia na kuntani ang manubli sang trono sang Israel, ginsuportahan niya si David nga ginpili sang Dios nga mangin hari. Ang matuod nga mga abyan nagatadlong man sa imo kon nagahimo ka sang indi husto. (Salmo 141:5) Ang mga abyan nga nagahigugma sa Dios makabulig para mangin maayo ang imo batasan.—Basaha ang 1 Corinto 15:33.

Makilala mo sa Kingdom Hall sang mga Saksi ni Jehova ang mga tawo nga nagahimo sing husto. Makita mo didto ang mga abyan nga makabulig sa imo nga pahamut-an ang Dios.—Basaha ang Hebreo 10:24, 25.

Pero kon kaisa, bisan ang mga abyan nga nagahigugma sa Dios mahimo makasala sa aton. Indi dayon maakig. (Manugwali 7:9, 20-22) Dumduma nga wala sing perpekto nga abyan kag ang mga abyan nga nagahigugma sa Dios makabulig sa aton. Ginalaygayan kita sang Biblia nga patawaron ang pareho naton nga mga Cristiano.—Basaha ang Colosas 3:13.

4. Paano kon kontrahon ka sang imo “mga abyan”?

Madamo ang ginkontra sang ila mga abyan sang nagtuon sila sa Biblia. Mahimo nga wala nila maintiendihan ang praktikal nga laygay ukon ang pat-od nga paglaum nga natun-an mo sa Biblia. Puede mo sila buligan.—Basaha ang Colosas 4:6.

Kon kaisa, mahimo insultuhon sang imo “mga abyan” ang maayong balita sang Biblia. (2 Pedro 3:3, 4) Mahimo ka man insultuhon kon ginatinguhaan mo nga himuon ang husto. (1 Pedro 4:4) Kon matabo ini sa imo, dapat ka magpili kon bala makig-abyan ka sa ila ukon sa Dios. Kon pilion mo ang Dios, ginpili mo ang pinakamaayo nga abyan.—Basaha ang Santiago 4:4, 8.

Para sa dugang nga impormasyon, basaha ang kapitulo 12 kag 19 sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.