Masaligan Mo Bala ang Imo Relihion Parte sa Moral?
“Nag-eskwela ako sa kolehiyo diin madamo ang nagapangangkon nga relihioso,” siling ni Sylvia, nga ang obra amo ang pag-atipan sa mga tigulang. “Pero nagapangdaya sila sa mga eksam kag nagadroga. Wala sing epekto ang relihion sa ila kabuhi.”
Si Lionel nagsiling: “Ang akon mga katrabaho nagabinutig kag nagasiling nga nagamasakit sila bisan wala man. Wala gid sing epekto ang ila relihion sa ila—daw kasangkapan lang ini nga ginapakitakita.”
Wala sing daku nga impluwensia ang relihion sa moral sang kalabanan nga tawo. Madamo subong ang may “dagway sang diosnon nga debosyon apang nagapanghiwala sang gahom sini.” (2 Timoteo 3:5) Ang ila mga lider sang relihion wala nagapakita sang maayo nga halimbawa. Wala man ginalaygayan halin sa Biblia sang mga klero ang ila mga miembro agod magkabuhi sing matinlo sa moral. Indi katingalahan nga madamo ang nagapati nga indi interesado ang Dios sa paagi sang ila pagkabuhi.
ANO ANG GINATUDLO SANG BIBLIA?
Ginapakita sang Biblia nga ang Dios may balatyagon kag importante gid sa iya kon paano kita nagagawi. Sang ang mga Israelinhon sang una nagrebelde batok sa Dios, ‘nagpalisod ini sa iya.’ (Salmo 78:40) Pero, may daku nga “kalipay sa langit” kon sinsero nga nagbag-o ang isa. (Lucas 15:7) Kon maapresyar sang isa ang maayo nga mga kinaiya sang aton Amay sa langit, ang iya gugma sa Dios magatubo kag magapahulag sa iya nga higugmaon ang ginahigugma sang Dios kag dumtan ang ginadumtan sang Dios.—Amos 5:15.
KAMUSTA ANG MGA SAKSI NI JEHOVA?
Ang mga Saksi ni Jehova “nagapalig-on sang suod nga kaangtanan sang pamilya kag nagahimo sa mga pumuluyo nga mabungahon kag bunayag,” siling sang Deseret News sang Salt Lake City, Utah, U.S.A. Nagsiling pa ini: “Ang mga miembro nagasunod sa mataas nga prinsipio sa moral. Nagapati sila nga ang pagpanigarilyo, sobra nga pag-inom, paggamit sang droga, pagpanahor, seksuwal nga imoralidad, kag homoseksuwalidad nagaguba sang espirituwalidad.”
Ginabuligan bala sang mga lider sang relihion ang ila mga miembro nga iaplikar ang mga prinsipio sang Dios sa moral?
Paano ang pagtuon sa personalidad sang Dios nakabulig sa mga Saksi? “Ang pagpangdaya lapnag sa amon ulubrahan,” siling ni Sylvia, nga ginsambit kaina. “Mahapos lang mag-ugyon sa ila ginahimo. Pero ang paghibalo kon ano ang batyagon ni Jehova * parte sini nagabulig sa akon nga himuon ang husto. Malipayon ako kag may kalinong.” Kumbinsido si Sylvia nga ang pagkabuhi suno sa iya relihioso nga ginapatihan nagpauswag sang iya kabuhi.
^ par. 9 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”
