TOPIKO SA KOBER: NGAA TUMAN GID ANG PAG-ANTOS? SAN-O INI MATAPOS?
Kadamo Gid sang Inosente nga Napatay!
Si Noelle mapinalanggaon nga bata nga nanamian magdrowing. Isa ka gab-i, nakasaboy sia sa likod sang ila balay kag nahulog sa swimming pool. Nalumos sia duha ka semana antes sang iya ikap-at nga birthday.
Sanday Charlotte, Daniel, Olivia, Josephine . . . Pila lang ini sang mga gintiro nga 20 ka kabataan nga nagaedad sing anom ukon pito ka tuig. Nalakip sila sa 26 ka biktima sang pagpaniro sa isa ka eskwelahan sa Connecticut, U.S.A., sang Disiembre 14, 2012. Sa ila lubong, ginlawag ni Presidente Obama ang ila mga ngalan kag ginsilingan ang nagalalaw nga mga tumalambong: “Dapat madula na ini nga trahedya.”
Sang 1996, ang 18 anyos nga si Bano kag ang iya pamilya nagsaylo sa Norway halin sa Iraq. Ang iya hayo nagakahulugan sing Silak sang Adlaw. Pero, makapasubo nga sang Hulyo 22, 2011, isa sia sa 77 nga ginpatay sang ekstremista, nga nagpadayaw: “Pasensia lang gid . . . kay amo lang ato ang napatay ko.”
Ang pareho sini nga makapasubo nga mga balita sulitsulit nga ginareport sa bilog nga kalibutan. Handurawa ang kasubo kag kasakit nga resulta sang mga aksidente, krimen, inaway, terorismo, kalamidad, kag iban pa nga trahedya. Tuman kadamo nga inosente ang nagakapatay kag nagaantos nga daw wala sing nagakaigo nga rason!
Ginabasol sang iban ang Dios kay siling nila wala kuno nagaulikid ang aton Manunuga sa mga tawo. May nagasiling man nga nakita sang Dios ang aton pag-antos pero wala sia nagapasilabot. Ang iban naman nagasiling nga natalana na ini nga mga trahedya. Tuman kadamo ang opinyon parte sini nga topiko. Sa diin kita makakita sang masaligan kag makaalayaw nga mga sabat? Sa masunod nga mga artikulo, usisaon naton ang Pulong sang Dios, ang Biblia, kon ano ang mga rason sang pag-antos kag kon paano ini dulaon.
