Minilyon ang nagalaum nga mapalangit. Si Jesus nagsiling nga ang iya matutom nga mga apostoles magakabuhi didto. Antes sia mapatay, nagpromisa sia nga ihanda ang isa ka duog para sa ila kag mangin kaupod nila ang iya Amay sa langit.—Basaha ang Juan 14:2.

Ngaa may mga pagabanhawon pakadto sa langit? Ano ang himuon nila didto? Ginsilingan ni Jesus ang iya mga apostoles nga mangin hari sila. Gamhan nila ang duta.—Basaha ang Lucas 22:28-30; Bugna 5:10.

Sa madamo nga kadutaan, diutay lamang ang manuggahom. Bangod banhawon ni Jesus ang mga tawo nga mapalangit para maggahom sa duta, makalaum kita nga diutay lang ang iya ginpili. (Lucas 12:32) Ginasambit sang Biblia kon pila ang magagahom kaupod ni Jesus.—Basaha ang Bugna 14:1.

Indi lamang ang mga mapalangit ang makabaton sang padya. Ang matutom nga mga sakop sang Ginharian ni Jesus mabuhi sing wala katapusan sa paraiso nga duta. (Juan 3:16) Ang iban maluwas gikan sa kalaglagan sining malaut nga sistema sang mga butang kag makasulod sa Paraiso. Ang iban pagabanhawon.—Basaha ang Salmo 37:29; Juan 5:28, 29.