Ang Dios indi makita nga espiritu nga persona. Gintuga niya ang langit, ang duta, kag ang tanan nga buhi nga butang. Wala sing nagtuga sa Dios kag wala sia sing ginsuguran. (Salmo 90:2) Luyag sang Dios nga pangitaon naton sia kag hibaluon ang kamatuoran parte sa iya.—Basaha ang Binuhatan 17:24-27.

Mahimo naton mahibaluan ang ngalan sang Dios. Makita naton ang pila niya ka kinaiya paagi sa pagpamalandong sa mga butang nga ginhimo niya. (Roma 1:20) Pero para makilala pa gid naton sia, dapat naton tun-an ang iya Pulong, ang Biblia. Ginatudlo sini sa aton ang iya maayo nga mga kinaiya.—Basaha ang Salmo 103:7-10.

Ginakaugtan sang aton Manunuga nga si Jehova ang inhustisya. (Deuteronomio 25:16) Kag gintuga niya kita sa iya dagway. Amo nga ang kalabanan sa aton naugot sa inhustisya. Ang inhustisya sa aton palibot wala ginpahanabo sang Dios. Ginahatagan niya sing kahilwayan sa pagpili ang mga tawo. Pero makapasubo nga madamo ang wala nagagamit sini sing maayo kag nagahimo pa sing inhustisya. Nagapasakit ini sa tagipusuon ni Jehova.—Basaha ang Genesis 6:5, 6; Deuteronomio 32:4, 5.

Ginahigugma ni Jehova ang hustisya kag indi niya pagtugutan nga magpadayon ang inhustisya. (Salmo 37:28, 29) Nagasaad ang Biblia nga lapit na lang ini dulaon sang Dios.—Basaha ang 2 Pedro 3:7-9, 13.