Natawo ako kag nagdaku malapit sa siudad sang Roma, sa lugar nga mga imol ang nagaistar. Mabudlay ang kabuhi. Wala ko nakilala ang akon matuod nga iloy, kag indi kami suod sang akon amay. Nagdaku ako sa kalye.

Sang dies anyos ako, nagpangawat na ako. Sang 12 anyos ako, una nga bes nga naglayas ako sa balay. Pila ka beses nga ginasugat lang ako ni Tatay sa presinto. Pirme ako nagapakigbais sa mga tawo—masingki ako kag akig sa kalibutan. Sang 14 anyos ako, naglayas ako kag wala na gid nagpauli. Nagdroga na ako kag nag-istar sa kalye. Bangod wala ako sing matulugan, ginaguba ko ang salakyan kag dira ako nagakaagahan. Dayon nagapangita ako sing tubig agod makapaninlo.

Nangin sagad ako sa pagpangawat sang bisan ano—nagapang-agaw sang bag, nagapangawat sa mga apartment kag dalagku nga balay kon gab-i. Nangin malain ang akon reputasyon kag wala madugay ginhagad ako nga mag-upod sa kilala nga gang, amo nga may “oportunidad” na ako nga mangawat sa mga bangko. Bangod maisog ako, ginataha na ako nga miembro sang gang. May pusil ako bisan diin magkadto; ginabutang ko pa gani ini sa idalom sang akon ulunan. Nagakabuhi ako sa kasingki, droga, pagpangawat, pagpamuyayaw, kag imoralidad. Pirme lang ako ginapangita sang mga pulis. Pila ka beses na ako nga nadakpan, kag tinuig nga nagagua-sulod sa prisuhan.

Isa ka bes sang ginpagua ako sa prisuhan, nagbisita ako sa akon tiya. Wala ako kabalo nga Saksi ni Jehova sia kag ang akon duha ka pakaisa. Gin-agda nila ako nga magtambong sa pagtilipon sang mga Saksi. Bangod interesado  ako sa ila ginahimo, nag-upod ako. Pag-abot namon sa Kingdom Hall, nag-insister ako nga magpungko malapit sa puertahan para makita ko ang mga nagagua-sulod. Siempre dala ko ang akon pusil.

Ginbag-o gid sadto nga pagtilipon ang akon kabuhi. Nakahunahuna ako nga daw ara lang ako sa iban nga planeta. Nagayuhum sila kag mainabyanon sa akon. Madumduman ko pa ang kaayo kag pagkabunayag sang mga Saksi. Tuhay gid ini sa kalibutan nga akon naandan!

Dayon nagtuon ako sa Biblia upod sa mga Saksi. Samtang nagadugang ang akon nahibaluan, nagaathag pa gid nga dapat ako magbag-o. Ginsunod ko ang laygay sang Hulubaton 13:20: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” Narealisar ko nga dapat ako magbiya sa gang. Indi gid ini mahapos, pero sa bulig ni Jehova, nagmadinalag-on ako.

Gintinluan ko man ang akon hitsura. Gintinguhaan ko gid nga mauntat ang akon pagpanigarilyo kag pagdroga. Ginpaguntingan ko ang akon malaba nga buhok kag wala na ako nagpang-aritos kag nagpamuyayaw. Sa una nga tion, nakontrol ko gid man ang akon kaugalingon.

Wala ako nanamian magbasa kag magtuon amo nga nabudlayan gid ako magkonsentrar sa akon pagtuon sa Biblia. Pero sang gintinguhaan ko ini, amat-amat ko nga ginhigugma si Jehova, kag nagsugod nga gintublag ako sang akon konsiensia. Negatibo ako pirme kag nagaduhaduha kon bala mapatawad pa ako ni Jehova sa tanan ko nga kalainan. Sadto nga mga tion, nakabulig sa akon ang sugilanon ni David nga ginpatawad sia ni Jehova sang nakahimo sia sing serioso nga mga sala.—2 Samuel 11:1–12:13.

Nabudlayan man ako magpamalaybalay para isugid sa iban ang akon pagtuo. (Mateo 28:19, 20) Nakulbaan ako basi makita ko ang ginhimuan ko sing sala sang una! Pero amat-amat nga nalandas ko ini. Nalipay gid ako nga mabuligan ang iban nga makatuon parte sa aton Amay sa langit, nga nagapatawad sing bugana.

Ang akon pagtuon parte kay Jehova nagluwas sa akon! Ang kalabanan ko nga kaupdanan sadto napatay na ukon napriso, pero malipayon ako kag may paglaum sa palaabuton. Natun-an ko nga mangin mapainubuson kag matinumanon kag makontrol ang akon nagabalingaso nga kaakig. Gani, nangin maayo ang akon kaangtanan sa iban. Malipayon kami sang akon matahom nga asawa, nga si Carmen, sa pagbulig sa iban nga matun-an ang Biblia.

Subong bunayag na ang akon obra—kon kaisa sa bangko man gihapon, pero imbes nga kawatan, ginatinluan ko na ini!