Subong sang ginpakita sa una nga artikulo, ginsentro ni Jesus ang iya kabuhi sa ‘pagbantala kag pagpahayag sang maayong balita sang ginharian.’ (Lucas 8:1) Nanikasog gid sia paagi sa paglakat sing ginatos ka kilometro sa bug-os nga Israel para itudlo ini sa katawhan. Ginrekord ang iya ministeryo sa apat ka Ebanghelyo nga nagsambit sang Ginharian sing kapin sa 100 ka beses. Ang kalabanan sini masapwan sa mga pinamulong ni Jesus, pero diutay lang ini kon ipaanggid sa kabug-usan nga ginsiling niya parte sa Ginharian sang Dios!​—Juan 21:25.

Ngaa importante gid kay Jesus ang Ginharian sang diri sia sa duta? Bangod nahibaluan niya nga ginpili sia sang Dios nga mangin Manuggahom sini. (Isaias 9:6; Lucas 22:28-30) Pero wala sia nagpokus sa pagtigayon sang gahom ukon himaya. (Mateo 11:29; Marcos 10:17, 18) Wala niya ginpadaku ang Ginharian para sa iya kaayuhan. Interesado gid sia sa Ginharian sang Dios * bangod sang mahimo sini sa iya mga ginahigugma​—sa iya langitnon nga Amay kag sa iya matutom nga mga sumulunod.

Ginahigugma gid ni Jesus ang iya langitnon nga Amay. (Hulubaton 8:30; Juan 14:31) Nagadayaw gid sia sa talalupangdon nga mga kinaiya sang iya Amay, pareho sang gugma, kaluoy, kag katarungan. (Deuteronomio 32:4; Isaias 49:15; 1 Juan 4:8) Gani ginakaugtan gid niya ang kabutigan parte sa iya Amay​—nga wala kuno labot ang Dios sa pag-antos sang mga tawo kag luyag sang Dios nga mag-antos kita. Isa ini sang mga rason kon ngaa gusto gid niya nga ibantala ang “maayong balita sang ginharian”​—kay nahibaluan niya nga tinluan sang Ginharian ang reputasyon sang iya Amay. (Mateo 4:23; 6:9, 10) Paano?

Paagi sa Ginharian, magahimo si Jehova sing dalagku nga pagbag-o para sa kaayuhan sang katawhan. “Pahiran niya ang tagsa ka luha” sa mga mata sang matutom nga katawhan. Dulaon niya ang kabangdanan sini, amo nga “wala na sing kamatayon, ukon paglalaw ukon paghibi ukon kasakit pa.” (Bugna 21:3, 4) Paagi sa Ginharian, dulaon sang Dios ang tanan nga pag-antos. *

 Gani indi katingalahan nga luyag ni Jesus isugid sa katawhan ang Ginharian! Nahibaluan niya nga ipakita sini kon daw ano ka gamhanan kag maluluy-on ang iya Amay. (Santiago 5:11) Nahibaluan man niya nga makabenepisyo sa sini ang iban niya nga ginahigugma​—ang matutom nga katawhan.

Madugay pa antes magkari si Jesus sa duta, nagkabuhi na sia sa langit upod sa iya Amay. Paagi sa iya ginpaluntad sang Amay ang tanan nga butang​—halin sa makahalawhaw nga kalangitan nga may indi maisip nga bituon kag galaksiya asta sa aton matahom nga planeta kag sa mga nagakabuhi diri. (Colosas 1:15, 16) Pero mas ‘nalipay’ gid sia sa katawhan.​—Hulubaton 8:31.

Makita sa ministeryo ni Jesus ang iya gugma sa katawhan. Sa umpisa pa lang, ginpahibalo niya nga nagkari sia sa duta “sa pagpahayag sing maayong balita” sa mga nagakinahanglan. (Lucas 4:18) Pero wala lang sia naghambal nga buligan ang katawhan. Sulitsulit niya nga ginpakita nga ginahigugma niya sila. Halimbawa, sang ang dakung kadam-an nagtipon para mamati sa iya, “naluoy sia sa ila, kag gin-ayo niya ang mga masakiton sa ila.” (Mateo 14:14) Sang nagtuo sa iya ang tawo nga may malala nga balatian nga mapaayo niya sia kon luyag niya, napahulag si Jesus sang gugma. Gin-ayo niya ang tawo, kag malulo nga ginsilingan: “Luyag ko. Mangin matinlo ka.” (Lucas 5:12, 13) Sang nakita niya nga nagapangasubo ang iya abyan nga si Maria kay napatay ang utod sini nga si Lazaro, “natandog gid ang tagipusuon” ni Jesus, “nalisang” sia, kag “nagtulo ang luha.” (Juan 11:32-36) Nian naghimo sia sing makatilingala nga butang—ginbanhaw niya si Lazaro bisan pa apat na ka adlaw nga napatay ini!​—Juan 11:38-44.

Siempre nahibaluan ni Jesus nga temporaryo lang nga paumpaw ang iya ginhimo. Nahibaluan niya nga sa indi madugay, magabalatian liwat ang iya ginpang-ayo kag mapatay liwat ang iya mga ginbanhaw. Pero nahibaluan man niya nga ang Ginharian sang Dios makahatag sing permanente nga solusyon sa sini nga mga problema. Amo kon ngaa wala lang sia naghimo sing mga milagro; makugi man sia nga nagbantala sang “maayong balita sang ginharian.” (Mateo 9:35) Ang iya mga milagro nagapakita sang himuon sang Ginharian sang Dios sa bug-os nga duta sa indi madugay. Binagbinaga kon ano ang mga saad sang Biblia.

•  Wala na sing balatian.

  “Niyan ang mga mata sang mga bulag pamuklaton, kag ang mga idulungug sang mga bungul mabuksan; niyan ang piang magalumpat subong sang usa, kag ang dila sang apa magaamba.” Dugang pa, “ang pumuluyo indi magsiling, ‘Nagamasakit ako.’”​—Isaias 33:24; 35:5, 6.

• Wala na sing kamatayon.

  ‘Ang mga matarung magapanubli sang duta, kag magapuyo dira sa gihapon.’​—Salmo 37:29.

  “Ginlamon niya sing dayon ang kamatayon, kag pahiran sang Ginoong DIOS ang luha sang tanan nilang nawung.”​—Isaias 25:8.

• Ang mga napatay mabuhi liwat.

  “Ang tanan nga yara sa handumanan nga mga lulubngan makabati sang iya tingog kag magagua.”​—Juan 5:28, 29.

  “May pagkabanhaw.”​—Binuhatan 24:15.

• Ang tanan may balay kag trabaho.

  “Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila. Indi sila magpatindug kag iban ang magapuyo; indi sila magtanum kag iban ang magakaon; . . . Ang akon mga pinili magakalipay sing malawig sa binuhatan sang ila mga kamut.”​—Isaias 65:21, 22.

•  Wala na sing inaway.

  “Sia nagapatonong sang mga inaway tubtub sa ukbung sang duta.”​—Salmo 46:9.

  “Ang pungsud indi magbayaw sing espada batok sa pungsud, kag indi na sila magtoon sing inaway.”​—Isaias 2:4.

• Wala na sing gutom.

  “Ang duta naghatag sang iya patubas; ang Dios, ang aton kaugalingon nga Dios, magapakamaayo sa aton.”—Salmo 67:6.

  “May bugana nga uyas sa duta; sa putokputokan sang kabukiran magahapayhapay ini.”​—Salmo 72:16.

• Wala na sing imol.

  “Ang may kinawad-on indi malimtan sing dalayon.”​—Salmo 9:18.

  “Magaluwas sia sang nawad-an kon magtuaw sia, sang imol nga wala sing manugtabang. Magakaawa sia sa imol kag sa nawad-an, kag luwason niya ang mga kalag sang nawad-an.”​—Salmo 72:12, 13.

Kon binagbinagon mo ining mga saad nga himuon sang Ginharian sang Dios, mahangpan mo bala kon ngaa importante gid ini kay Jesus? Sang diri sia sa duta, gusto gid niya ini isugid sa tanan nga nagapamati, kay nahibaluan niya nga amo ini ang magadula sang tanan nga problema subong.

Nanamian ka bala sang mga saad sang Biblia nga himuon sang Ginharian? Kon amo, paano ka makatuon sing dugang pa parte sa sini? Kag ano ang mahimo mo para matigayon mo gid ang mga pagpakamaayo sini? Sabton sang katapusan nga artikulo ini nga mga pamangkot.