TOPIKO SA KOBER
Sin-o ang mga Saksi ni Jehova?
“Pila na ka tuig nga kilala ko si Mike. Isa sia sa mga Saksi ni Jehova. Pero pirme nagalibog ang ulo ko sa iya relihion. Sin-o si Jehova? Ngaa wala nagaselebrar sang mga piesta opisyal ang mga Saksi? Kulto bala ang nasudlan ni Mike?”
—Becky, California, U.S.A.
“Sang nagtuon sa Biblia sa mga Saksi ni Jehova ang akon mga kaingod, nagpalibog ako, ‘Ano ang buot silingon sang ngalan nga mga Saksi ni Jehova? Daw indi ini kinaandan nga ngalan sang isa ka relihion!’”
—Zenon, Ontario, Canada.
“Abi namon nga mag-asawa, ang mga Saksi ni Jehova nagabisita para pakonsiensiahon kami bangod wala kami sa simbahan. Para sa amon, kon indi namon makita sa dalagku nga mga relihion ang ginapangita namon sa isa ka relihion, labi nga indi namon ini makita sa daw indi kinaandan nga sekta pareho sa mga Saksi ni Jehova.”
—Kent, Washington, U.S.A.
“Ang matuod, indi ko sila kilala kag wala ako makahibalo sang ila ginapatihan.”
—Cecilie, Esbjerg, Denmark.
Mahimo nga nakita mo sila nga nagabantala sa mga pamalay ukon sa publiko nga mga lugar, nagapanagtag sang base sa Biblia nga mga literatura, kag nagatanyag sing libre nga mga pagtuon sa Biblia. Ayhan nabaton mo ini nga magasin gikan sa isa sa ila. Pero nagapalibog ka gihapon kon sin-o gid ang mga Saksi ni Jehova. Mahimo nga pareho kamo sang ginahunahuna sang isa sa mga nasambit na.
Kon ginapamangkot mo ini kag ginapaligban, sa diin mo masapwan ang mga sabat? Paano mo mahibaluan kon ano gid ang ginapatihan sang mga Saksi ni Jehova, kon paano ginasuportahan sa pinansial ang ila ministeryo kag duog sang pagsimba, kon ngaa nagabisita sila sa inyo puluy-an kag nagapakig-istorya sa inyo sa publiko nga mga lugar?
“Madamo ako sing nabasahan sa Internet parte sa mga Saksi ni Jehova,” siling ni Cecilie, nga ginsambit kaina. “Nakabati ako sing pila ka istorya kag pagpakalain sa ila. Gani negatibo gid ang pagtamod ko sa mga Saksi ni Jehova.” Apang sang ulihi, nakig-istorya sia sa mga Saksi ni Jehova kag nasabat ang madamo niya nga pamangkot.
Gusto mo bala masabat sing husto ang imo mga pamangkot parte sa mga Saksi ni Jehova? Ginapalig-on ka namon nga mamangkot sa nakahibalo gid sini
