Para sa iban nga tawo, ang pangamuyo uyang lang sang tion kag wala sing nagapamati sa sini. Ang iban nangamuyo pero pamatyag nila wala sila ginasabat. Ginhanduraw sang isa ka atiesta kon ano ang iya ginahunahuna parte sa Dios, dayon nangamuyo sia: “Sabta ako bisan hutik lang.” Pero suno sa iya, “wala gid nagsabat” ang Dios.

Pero nagapasalig ang Biblia nga may Dios nga nagapamati sa mga pangamuyo. Ginrekord ini sa Biblia para sa katawhan sang una: “Kahamut-an ka niya [Dios] kon mabatian niya ang imo pagpangayo sing bulig; sabton ka niya gilayon kon mabatian niya ini.” (Isaias 30:19) Ang isa pa ka bersikulo sang Biblia nagsiling: “Ginakahamut-an Niya ang pangamuyo sang matarong.”—Hulubaton 15:8.

Ginsambit man sa Biblia ang mga halimbawa sang pila nga ginpamatian ang ila mga pangamuyo. Ang isa ka teksto nagsiling nga si Jesus “nagpangabay . . . sa Isa nga makaluwas sa iya” kag “ginpamatian ang iya mga pangamuyo.” (Hebreo 5:7) Ang iban pa nga halimbawa mabasa sa Daniel 9:21 kag 2 Cronica 7:1.

Kon amo, ngaa nagabatyag ang iban nga wala ginasabat ang ila mga pangamuyo? Agod pamatian kita, dapat mangamuyo kita kay Jehova, * ang Dios sa Biblia, kag indi sa iban nga dios ukon sa mga katigulangan. Ginapatuman man sang Dios nga mangamuyo kita “suno sa iya kabubut-on”—para sa mga butang nga iya nahamut-an. Kon amo sini ang aton ginapangamuyo, ginapasalig kita sang Dios nga “magapamati sia sa aton.” (1 Juan 5:14) Gani, agod pamatian ang aton mga pangamuyo, kinahanglan nga makilala naton ang Dios sa Biblia kag tun-an kon ano ang iya kabubut-on.

Madamo ang nagapati nga ang pangamuyo indi lang isa ka rutina kundi ginapamatian ini kag ginasabat sang Dios. Si Isaac nga taga-Kenya nagsiling: “Nangamuyo ako agod mahangpan ang Biblia. Wala madugay, may nagpalapit sa akon kag nagtanyag sang bulig nga kinahanglan ko.” Luyag untatan ni Hilda nga taga-Pilipinas ang pagpanigarilyo. Pagkatapos sang sulitsulit nga kapaslawan, nagpanugda ang iya bana, “Ngaa indi ka mangamuyo sa Dios?” Ginsunod niya ang laygay kag nagsiling: “Nagdayaw gid ako kon paano Niya ako ginbuligan. Amat-amat nga nadula ang gana ko sa pagpanigarilyo. Nauntatan ko ini.”

Interesado bala ang Dios sa pagbulig sa imo nga himuon ang mga butang suno sa iya kabubut-on?