Sang Domingo sang gab-i, Pebrero 24, 1924, ang bag-o nga estasyon sang radyo sang mga Estudyante sang Biblia a nga WBBR, nagsugod sa pag-broadcast sa una nga tion. Ano ang natabo sa una nga broadcast? Sin-o ang nakabati sini? Kag paano padayon nga ginagamit sang mga Saksi ni Jehova ang pinakabag-o nga teknolohiya para masugid ang “maayong balita sang Ginharian . . . sa bug-os nga duta”?—Mateo 24:14.

 Ang pinakauna nga broadcast nagsugod sang 8:30 sang gab-i kag naglawig ini sang duha ka oras. Ang programa ginhimo sa bag-o gintukod nga studio sa Staten Island, New York. Nadumduman sang lead sound engineer, nga si Brother Ralph Leffler, nga “excited kag nakulbaan gid” ang tanan nga ara sa studio. “May makabati bala sa aton?” pamensar niya. “Ginpaandar ko ini, kag ginsugdan namon ang programa, kag nagalaum nga mangin madinalag-on ang tanan.”

 Ang announcer sa sining makasaysayan nga broadcast amo si Brother Victor Schmidt, nga amo ang station manager. Ginsugdan niya ang programa paagi sa pagpakilala sang pila ka musikero kag mga manugkanta, nga mga Estudyante sang Biblia tanan. Una, nagtokar ang brother sang isa ka classical music sa piano. Dayon, ginkanta ni Cora Wellman ang “The Ninety and Nine,” base sa parabola ni Jesus parte sa nadula nga karnero. (Lucas 15:4-7) Nagsunod ang iban nga mga nag-perform, lakip kay Frederick W. Franz, nga nagkanta sang “The Penitent,” nga isa ka kanta nga nagasugid sang istorya sang nadula, ukon rebelde nga anak nga lalaki.—Lucas 15:11-25.

 Si Joseph F. Rutherford, nga amo ang nagapanguna sa hilikuton sang mga Estudyante sang Biblia sa sina nga tion, nagpamulongpulong para idedikar ang estasyon “sa intereses sang ginharian sang Mesias.” Sia nagsiling: “Bangod gintugutan ni Jehova ang mga tawo nga maimbento ang radyo, sigurado nga iya gid ini kabubut-on nga gamiton naton ini para tudluan ang mga tawo parte sa katumanan sang iya dalayawon nga mga tagna.”

 Madamo nga tagpalamati sa northeastern United States ang nakabati sang una nga broadcast. Ang isa ka tagpalamati nga taga-Morrisville, Vermont, nga sobra 320 ka kilometro ang kalayuon, nagsiling: “Nalipay gid ako sa pagsiling nga nabatian ko sing maayo ang programa. . . . Maathag gid ang tingog ni Rutherford. . . . Nabatian gid ang tanan nga tinaga.” Bisan ang isa ka lalaki nga taga-Monticello, Florida, nakapamati man sa programa! Nangin madinalag-on gid ang bag-o nga estasyon sang radyo, kag madamo nga tawo ang nagsulat para magpasalamat.

 Padayon nga gin-broadcast sang estasyon ang mensahe sang Ginharian sa sulod sang 33 ka tuig, b kalabanan sa mga lugar sa northeastern United States. Pero kon kaisa ang WBBR ginkonek sa iban pa nga mga estasyon, gani nalab-ot ang minilyon nga tagpalamati sa United States, Canada, kag sa iban pa nga malayo nga lugar. Ang 1975 nga Yearbook of Jehovah’s Witnesses nagsiling: “Sang 1933, amo ang tuig nga nag-broadcast ang estasyon sa pinakamadamo nga tawo. Gingamit ang 408 ka estasyon para mapalab-ot ang mensahe sa anom ka kontinente, kag 23,783 ka sarisari nga mga pamulongpulong base sa Biblia ang gin-broadcast . . . Sa sina nga tion, ang broadcast sang Watch Tower mabatian sa madamo nga estasyon sang radyo. Sa masami, ang mga tawo nga nagapamati sang radyo bisan diin man sila, makabati sang kamatuoran nga nagadayaw sa Dios.”

 Sang gingamit sang mga Estudyante sang Biblia ang WBBR, may aberids nga 1,064 ka manugbantala lang sang Ginharian sa United States. Nabuligan gid sang broadcast ining gamay nga grupo para malab-ot sang maayong balita ang mas madamo nga tawo. Pero sang 1957, may ara na sang aberids nga 187,762 ka manugbantala sang Ginharian sa United States kag 653,273 sa bilog nga kalibutan. Dugang pa, bangod sang paghanas sa mga miting sa kongregasyon, ining mapisan nga mga kauturan nangin mas epektibo sa pamalaybalay nga hilikuton kag iban pa nga porma sang ministeryo.

 Bilang resulta sining positibo nga mga pagbag-o, ginpamensaran sing maayo sang mga utod nga nagapanguna sa organisasyon kon bala epektibo pa ang pag-broadcast sa radyo kon ikumparar sa pagpamalaybalay. Ano ang ila desisyon? Nagdesisyon sila nga ibaligya ang WBBR, nga amo ang estasyon nga ginapanag-iyahan pa kag ginagamit sang Watchtower Society. Sang Abril 15, 1957, nabaligya ang estasyon. Sang adlaw antes ini ginbaligya, sa tion sang katapusan nga pag-broadcast, ginpamangkot si Nathan H. Knorr kon ngaa ginabaligya ang estasyon. Sia nagsiling nga ang pagdamo sang mga Saksi ni Jehova, resulta sang pagpamalaybalay nga ministeryo. “Madamo ang nabuligan sang mga broadcast sang WBBR,” siling niya, kag nagdugang pa sia: “Pero mas nagdamo ang mga Saksi ni Jehova sa mga lugar nga wala gina-broadcast ang WBBR sangsa mga lugar nga gina-broadcast ini.” Gani nagdesisyon ang mga brother nga mas epektibo ang pamalaybalay nga hilikuton sangsa radyo para mabuligan ang mga tawo nga mabatian ang maayong balita. Pero, indi ato ang katapusan nga tion nga gamiton sang katawhan ni Jehova ang pag-broadcast. Madamo nga tinuig sang ulihi, gingamit ini liwat pero sa bag-o nga porma.

 Sang Oktubre 6, 2014, may makalilipay gid nga natabo sa organisasyon ni Jehova. Ginsugdan ang Internet television station nga gintawag nga JW Broadcasting. Ang mga Saksi ni Jehova kag ang iban pa nagtan-aw kag nagpamati sa broadcast kada bulan paagi sa Web browser, JW Library nga app, mga streaming device, ukon paagi sa satellite receiver. c Pero, sa iban nga bahin sang duta, ginagamit gihapon sang katawhan ni Jehova ang radyo kag TV para magbantala. Paano?

 Sang nagligad nga mga tinuig, gingamit sang organisasyon ni Jehova ang radyo kag TV nga ginapanag-iyahan sang mga indi Saksi nga kompanya para mag-broadcast kada semana sang mga miting sa kongregasyon kag pati man sang mga kombension sa mga lugar nga mahinay ang Internet. Ini nga pag-broadcast nabatian man sang madamo nga indi Saksi, pati man sang madamo nga interesado. Halimbawa halin sang 2021 asta 2022, ginsilingan sang mga station manager sang radyo ang branch office sang mga Saksi ni Jehova sa East Africa nga madamo nga indi Saksi ang nanamian sang aton mga miting. Madamo pa gani nga tagpalamati sa Kenya, South Sudan, kag Tanzania ang nagpangabay sang personal nga pagtuon sa Biblia.

 Pero ang panguna nga paagi nga nagabantala ang mga Saksi ni Jehova amo ang pagpamalaybalay, cart witnessing, kag ang jw.org nga website para masugid ang mensahe sang Ginharian sa bilog nga kalibutan. Bangod sang amon website, mabasa dayon sang mga interesado ang Biblia kag ang base sa Biblia nga mga publikasyon sa sobra 1,080 ka lenguahe, nga wala sing bayad. Makakita man sila sang mga sabat sa mga pamangkot sa Biblia kag mabal-an man nila kon diin ginahiwat ang Cristianong mga miting. Bangod sini nga mga panikasog kag mga pamaagi, mas mahapos na gid subong para sa mga tawo nga matun-an ang maayong balita sang Ginharian sang Dios! Gani, ginabantala ini “sa bug-os nga duta,” pareho sa gintagna sang Biblia.—Mateo 24:14.