Pagkaguba sang kalibutan. Kon kaisa ginaistoryahan sang mga tawo ini nga topiko. Ginapensar nila nga isa ini ka trahedya nga magapatay sa tanan nga kabuhi sa duta. Nagapati ang iban nga dali na lang ini matabo, ilabi na kon makabasa sila sang mga balita pareho sang masunod:

•   “Posible gid nga may matabo nga nuclear war. Mahimo ini matabo sing indi hungod, sing aksidente, ukon bangod sa indi pag-intiendihanay.”—Bulletin of the Atomic Scientists.

•   “Sang nagligad nga napulo ka tuig, damudamo nga mabaskog nga bagyo, pagkasunog sang mga kagulangan, malawig nga tig-ilinit, pagkapatay sang mga coral, heat wave, kag mga baha ang natabo sa bilog nga kalibutan.”—National Geographic.

•   “Mas grabe ang halit sang mas dalagku nga panong sang mga apan sa Africa subong kon ikumparar sa nagligad nga tinuig.”—The Associated Press.

 Maguba bala ang duta paagi sa isa ka trahedya nga matabo sa bilog nga kalibutan? Ano ang ginasiling sang Biblia?

 Indi. Ginapasalig kita sang Pulong sang Dios, ang Biblia, nga ang duta magapabilin tubtob sa wala sing katubtuban. (Manugwali 1:4) Indi paggub-on sang Dios ang duta nga gintuga niya, kundi ‘laglagon niya ang mga nagalaglag sang duta.’—Bugna 11:18.

 Suno sa Biblia, ang “kalibutan” nga matapos amo ang mga tawo nga wala nagatuman sa Dios kag ila lang gusto ang ila ginasunod. Pareho sa ginhimo sang Dios sang panahon ni Noe, tapuson Niya ang “kalibutan sang indi diosnon nga mga tawo.”—2 Pedro 2:5; 3:7.

 Ang 1 Juan 2:17 nagasiling: “Ang kalibutan nagataliwan kag amo man ang kailigbon sini.” Ginapakita sini nga bersikulo nga tapuson sang Dios, indi ang aton planeta nga duta, kundi ang mga tawo nga padayon nga nagahimo sang malain.

 Wala ginasugid sang Biblia kon san-o gid maabot ang katapusan. (Mateo 24:36) Pero ginapakita sini nga malapit na lang ini matabo. Amo ini ang ginasugid sang Biblia:

•   May mga inaway, kakulang sing pagkaon, epidemia, kag mabaskog nga mga linog “sa nagkalainlain nga mga lugar.”—Mateo 24:3, 7, 14; Lucas 21:10, 11; Bugna 6:1-8.

•   Ang kalabanan nga mga tawo magapensar sang ila lang kaugalingon. Halimbawa, sila mangin “mahigugmaon sa kuarta,” “indi mapinasalamaton,” kag “wala sing pagpugong sa kaugalingon.”—2 Timoteo 3:1-5.

 Madamo nga tawo ang nagapati nga halin sang 1914, ang nagakatabo sa kalibutan pareho gid sa ginasugid sang Biblia, gani malapit na ang katapusan. Para sa dugang nga impormasyon, tan-awa ang mga artikulo nga “Ano ang Ginapakita sang Kronolohiya sang Biblia Parte sa 1914?” kag “Ano ang Tanda sang ‘Katapusan nga mga Adlaw,’ Ukon sang ‘Katapusan nga Panahon’?”

 Ang katapusan nga libro sang Biblia nagasugid sang “tion kon ipahayag na si Ginuong Jesus,” nga matabo kon magkari na si Jesus para dulaon ang tanan nga malain diri sa duta kag padyaan ang mga nagasimba sa Dios.—2 Tesalonica 1:6, 7; 1 Pedro 1:7, 13.

Gani ginasugid sang  katapusan nga libro sang Biblia ang matabo sa palaabuton. (Bugna 1:1) Mabasa man sa sini ang maayong balita kag ang mensahe sang paglaum. (Bugna 1:3) Ginapakita sini nga dulaon sang Dios ang tanan nga inhustisya kag himuon nga paraiso ang duta. Sina nga tion, indi na maeksperiensiahan sang mga tawo ang kasakit, pag-antos, kag bisan ang kamatayon.—Bugna 21:3, 4.

 Gusto mo bala nga mahibaluan ang dugang nga impormasyon parte sa matahom nga mga promisa sang Biblia? Ang mga Saksi ni Jehova may ginatanyag nga libre nga pagtuon sa Biblia nga makabulig sa imo. Puede mo sila kontakon kon gusto mo.