Kon sobra ang imo kabalaka, mahimo sini mahalitan ang imo lawas kag emosyon. Mahimo pa gani ini bangdan sang mas daku nga mga problema.

•  Likawi ang sobra nga pagtan-aw, pagbasa, kag pagpamati sa indi maayo nga mga balita. Indi mo kinahanglan mabal-an ang tanan nga detalye sa mga nagakatabo. Kon pirme ka nagatan-aw, nagabasa, ukon nagapamati sang indi maayo nga mga balita, mahimo madugangan lang ang imo kahadlok kag madulaan ka sang paglaum.

   Prinsipio sa Biblia: “Ang nadugmok nga espiritu nagaubos sang kusog.”—Hulubaton 17:22.

   “Mahimo nga gusto naton nga tan-awon pirme sa Internet ang bag-o kag daw indi kinaandan nga mga balita. Pero indi gid ina maayo nga batasan. Sang wala na ’ko pirme nagatan-aw sang balita, naghaganhagan ang akon kabalaka.”—John.

   Pamensari ini: Kada san-o ka gid bala dapat mangin updated sa balita?

•  Maghimo sang iskedyul kag sunda ini. Tilawi nga maghimo sang iskedyul kon ano oras ka mabugtaw, makaon, kag magtulog kag sunda ini. Kon may iskedyul ka, mabatyagan mo nga normal ang imo kabuhi kag makabulig ini sa imo nga indi magkabalaka sing sobra.

   Prinsipio sa Biblia: “Ang mga plano sang mapisan pat-od nga magamadinalag-on.”—Hulubaton 21:5.

   “Sang nagsugod ang COVID-19 nga pandemic, wala ko na nasunod ang akon iskedyul kag nawili ako sa mga kalingawan. Gusto ko nga gamiton ang akon oras sa may pulos nga mga butang, gani naghimo ako sang iskedyul sang dapat ko himuon kada adlaw.”—Joseph.

   Pamensari ini: Nabatyagan mo bala nga pagkatapos sang isa ka adlaw kanami sang imo pamatyag kay nahimo mo ang imo iskedyul?

•  Magpokus sa maayo nga nagakatabo sa imo kabuhi. Kon pirme mo pamensaron ang mga butang nga ginhimo mo kuntani sang una ukon ang malain nga mga butang nga mahimo matabo sa ulihi, magadugang lang ang imo pagkabalaka. Para mabatuan ini, pamensara ang duha ukon tatlo ka butang nga dapat mo pasalamatan.

   Prinsipio sa Biblia: “Ipakita nga mapinasalamaton kamo.”—Colosas 3:15.

   “Ang pagbasa sang Biblia nakabulig sa akon nga indi magsagi pamensar sang negatibo nga mga impormasyon kundi sang positibo nga mga butang. Daw ka simple lang sina, pero epektibo!”—Lisa.

   Pamensari ini: Mas nagapokus ka bala sa negatibo nga mga butang sa imo kabuhi amo nga nabalewala mo na ang maayo nga mga butang nga nagakatabo sa imo?

•  Pamensara ang iban. Imbes nga magpalayo sa iban—nga amo pirme ang ginahimo sang mga tawo nga nagakabalaka sing sobra—pensara kon ano ang mahimo mo para mabuligan ang iban nga nagakinahanglan.

   Prinsipio sa Biblia: ‘Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:4.

   “Nalipay ako kon may ginahimo ako para sa iban. Naga-enjoy ako sa pagpakig-upod sa ila, kag nagahaganhagan pa ang akon kabalaka. Ang matuod, wala na ako sing tion nga magkabalaka.”—Maria.

   Pamensari ini: Sin-o sa mga kakilala mo ang nagakinahanglan gid sing bulig, kag ano ang puede mo himuon para mabuligan sila?

•  Atipana ang imo panglawas. Mag-exercise pirme kag magpahuway sing maayo. Magkaon sing masustansia nga pagkaon. Ang pag-atipan sing maayo sa imo panglawas makabulig para mangin positibo ka pirme kag mapahaganhagan ang imo pagkabalaka.

   Prinsipio sa Biblia: “Ang ehersisyo may . . . kapuslanan.”—1 Timoteo 4:8, footnote.

   “Kami sang akon bata nga lalaki indi pirme maka-exercise sa gua, gani ginlakip namon sa amon iskedyul ang pag-exercise sa sulod sang balay. Na-enjoy namon ini kag mas nga nagsuod pa kami sa isa kag isa.”—Catherine.

   Pamensari ini: Kinahanglan bala nga may bag-uhon ka sa imo mga ginakaon kag mag-exercise pirme para mangin mas mapagros ka?

 Ang pagsunod sa sini nga mga tip makapahaganhagan sang kabalaka. Magluwas sa sini, nakabenepisyo pa gid ang madamo nga tawo sang natun-an nila ang masaligan nga promisa sang Biblia parte sa mas maayo nga palaabuton. Tan-awa ang artikulo nga “Ano ang Himuon sang Ginharian sang Dios?”