Sang Enero 24, 2023, gin-set sang mga scientist ang Doomsday Clock a para maglapit pa gid ini sa tungang-gab-i, nga nagakahulugan sang katapusan sang kalibutan.

•   “Ang ‘Doomsday Clock’ nagasimbulo sang katalagman bangod ginahalitan sang mga tawo ang ila kaugalingon. Sang Martes, gin-idog sang mga scientist ang kamot sini sa pinakamalapit sa tungang-gab-i bangod sang mga hitabo pareho sang inaway sa Ukraine, kahadlok sa nuclear war, kag sa katalagman bangod sa climate change.”—AFP International Text Wire.

•   “Ginpahibalo sang mga scientist nga sang Martes ginpaabante sing 90 ka segundo antes sang tungang-gab-i ang ‘Doomsday Clock,’ nga nagapakita nga ang katawhan malapit na gid kaayo sa armageddon.”—ABC News.

•   “Nagpaandam ang isa ka panel sang mga international scientist nga subong ara na gid sa katalagman nga laglagon sang mga tawo ang ila kaugalingon.”—The Guardian.

 Malapit na gid bala ang katapusan sang mga tawo kag sang aton planeta? Dapat bala naton kahadlukan ang matabo sa palaabuton? Ano ang ginasiling sang Biblia?

 Suno sa Biblia, ‘ang duta magapabilin tubtob sa wala sing katubtuban’ kag may mga tawo nga ‘magapuyo sa sini sa wala sing katubtuban.’ (Manugwali 1:4; Salmo 37:29) Gani indi maguba sang tawo ang duta kag indi man mag-abot ang tion nga indi na maistaran ang aton bilog nga planeta.

 Pero, may ginasambit gid man ang Biblia nga katapusan. Halimbawa, nagasiling ini nga “ang kalibutan nagataliwan.”—1 Juan 2:17.

•   Para mahibaluan mo kon ano ang buot silingon kon ginasambit sang Biblia ang katapusan, basaha ang artikulo nga “Malapit Na Bala ang Katapusan sang Kalibutan? Ginatagna Bala sang Biblia nga Maguba ang Kalibutan?”

•   Para mahibaluan mo ang ginasiling sang Biblia parte sa tayming sang mga hitabo sa kalibutan, basaha ang artikulo nga “San-o ang Katapusan sang Kalibutan?”

 Mabuligan kita sang Biblia nga padayon nga mangin positibo bisan pa sang mga problema sa kalibutan subong. Paano?

•   Ang Biblia nagahatag sang praktikal nga laygay. (2 Timoteo 3:16, 17) Halimbawa, basaha ang artikulo nga “Kon Paano Kontrolon ang Kabalaka” para mabal-an mo kon paano ang Biblia makabulig sa imo nga mangin positibo bisan pa sang mabudlay nga mga sitwasyon.

•   Ang Biblia nagasugid sang masaligan nga paglaum para sa palaabuton. (Roma 15:4) Ginasugid sini kon ano ang mapaabot naton subong kag sa palaabuton. Makabulig ini sa aton nga padayon nga mangin positibo bisan pa sang mga nagakatabo sa kalibutan subong.

 Para matun-an mo sing maayo ang ginatudlo sang Biblia, ginaagda ka namon nga testingan ang libre nga pagtuon sa Biblia nga may instruktor.