Sang Mayo 24, 2022, natabo ang isa ka daw indi mapatihan nga trahedya sa gamay nga banwa sang Uvalde, Texas, U.S.A. Suno sa The New York Times, “ginpaniro kag napatay sang isa ka tawo ang 19 ka kabataan kag duha ka maestra . . . sa Robb Elementary School.”

 Masubo gid nga pirme na lang nagakatabo subong ining makasiligni nga mga balita. Ginreport sang USA Today nga sa United States lamang, “249 ka pagpaniro ang natabo sa mga eskwelahan sang nagligad nga tuig. Amo ini ang pinakamataas nga rekord sugod sang 1970.”

 Ngaa nagakatabo ining makahaladlok nga mga hitabo? Ano ang maayo nga himuon kon matabo ini nga mga kalainan sa aton palibot? May paglaum pa bala nga mauntat ini nga kapintas? Ang Biblia nagahatag sing sabat.

•    Base sa Biblia, nagakabuhi na kita sa panahon nga ginatawag “ang katapusan nga mga adlaw” sa diin ang mga tawo “indi mapinalanggaon” kag “mabangis,” nga nagahimo sing mapintas kag makasiligni nga mga buhat. Ang mga tawo nga nagahimo sini “magalain pa gid.” (2 Timoteo 3:1-5, 13) Para sa dugang nga impormasyon, basaha ang artikulo nga “Gintagna Bala sang Biblia ang Panghunahuna kag Paggawi sang mga Tawo Subong?”

 Madamo nga tawo ang nagapamangkot, ‘Ngaa wala ginapunggan sang Dios ang makasiligni nga mga trahedya pareho sang pagpaniro sa eskwelahan?’ Para mabal-an mo ang sabat sang Biblia, basaha ang artikulo nga “Nagakatabo ang Malain sa Maayo nga mga Tawo—Ngaa?”

•    “Ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan . . . nagapabakod sa aton.”—Roma 15:4.

 Ang mga prinsipio sa Biblia makabulig sa imo nga mabal-an ang maayo nga himuon bangod sa pagpamintas nga nagakatabo sa sini nga kalibutan. Para sa dugang nga impormasyon, tan-awa ang Magmata! nga magasin nga may tig-ulo nga “Madula Pa Ayhan ang Kasingki?”

 Para sa mga panugda kon paano buligan sang mga ginikanan ang ila kabataan kon may makahaladlok nga mga balita, basaha ang artikulo nga “Makahaladlok nga mga Balita kag ang Inyo Kabataan.”

•    “Luwason niya sila sa pagpamigos kag sa pagpamintas.”—Salmo 72:14.

•   “Salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas. Ang pungsod indi na makig-away sa iban nga pungsod, kag indi na sila magtuon sa pagpakig-away.”—Miqueas 4:3.

 Himuon sang Dios ang indi mahimo sang tawo. Dulaon sang iya Ginharian, nga isa ka gobierno sa langit, ang tanan nga armas kag untaton ang tanan nga kapintas. Para mahibaluan mo kon ano pa ang himuon sang Ginharian sang Dios, basaha ang “‘Magabugana ang Paghidait’ sa Paggahom sang Ginharian sang Dios.”