Kada tuig, linibolibo ka linog ang nagakatabo. Kalabanan sini mahinay lang, pero ang mabaskog nga mga linog nagaresulta sa grabe nga halit, pag-antos, kag kamatayon. Kon kaisa, ginabangdan pa ini sang mga tsunami nga nagaguba sang mga baybayon kag nagapatay sang madamo nga tawo nga nagaistar malapit sa sini nga mga lugar. Gintagna bala sang Biblia ining mabaskog nga mga linog?

Sa sini nga artikulo

•  Gintagna bala sang Biblia ang mga linog?

•  Ang mga linog bala nga nagakatabo subong katumanan sang tagna sang Biblia?

•  Ano ang epekto sa aton sang tagna sa Biblia parte sa mga linog?

•  Sala nga mga pagpati parte sa tagna sa Biblia kag mga linog

 Sa Biblia, gintagna ni Jesus ang mga linog. Mabasa naton ang iya ginsiling sa tatlo ka libro sa Biblia:

 “Magailinaway ang mga pungsod kag subong man ang mga ginharian, kag may kakulang sa pagkaon kag mga linog sa nagkalainlain nga mga lugar.”—Mateo 24:7.

 “Magailinaway ang mga pungsod kag subong man ang mga ginharian; may mga linog sa nagkalainlain nga lugar; may kakulang man sa pagkaon.”—Marcos 13:8.

 “May mabaskog nga mga linog, kag sa nagkalainlain nga lugar may kakulang sa pagkaon kag mga balatian.”—Lucas 21:11.

 Gintagna ni Jesus nga matabo ang “mabaskog nga mga linog” sa “nagkalainlain nga lugar” sa tion nga matabo man ang mga inaway, kakulang sa pagkaon, kag mga balatian. Kon dungan nga matabo ini tanan, maathag nga nagakabuhi na kita sa ginatawag nga “hingapusan sang sistema sang mga butang,” ukon “katapusan nga mga adlaw.” (Mateo 24:3; 2 Timoteo 3:1) Kon isipon naton ang tion base sa Biblia, makita naton nga ang “katapusan nga mga adlaw” nagsugod sang 1914 kag wala pa matapos.

 Huo. Ang tagna ni Jesus, lakip na ang ginsiling niya parte sa mga linog, nagakatabo gid sa aton panahon subong. Halin sang 1914, sobra 1,950 ka mabaskog nga mga linog ang natabo. Kon totalon, sobra duha ka milyon ka tawo ang napatay bangod sini. a Binagbinaga ang pila ka halimbawa sining karon lang nga mga tinuig.

 2004—Indian Ocean. Ang magnitute 9.1 nga linog nagresulta sa tsunami nga nag-igo sa madamo nga pungsod kag nagpatay sang mga 225,000 ka tawo.

 2008—China. Ang magnitude 7.9 nga linog nagguba sang mga baryo kag mga banwa, kag ginabulubanta nga mga 90,000 ka tawo ang nagkalamatay, mga 375,000 ang nasamaran, kag minilyon ang wala na sing balay.

 2010—Haiti. Ang magnitude 7.0 nga linog nga ginsundan sang pila ka mabaskog nga mga aftershock nagpatay sa sobra 300,000 ka tawo kag sobra sa isa ka milyon ang wala na sing balay.

 2011—Japan. Ang magnitude 9.0 nga linog kag ang mga tsunami nga resulta sini nagpatay sa ginabulubanta nga 18,500 ka tawo kag ginatos ka libo ang nagbakwit. Ang Fukushima power plant naguba amo nga nagsungaw ang makahalalit nga radiation. Pagligad sang pulo ka tuig, mga 40,000 ka tawo gihapon ang wala makabalik sa ila balay malapit sa planta bangod sa mataas nga level sang makahalalit nga radiation.

 Ang tagna sa Biblia parte sa mga linog nagasugid sa aton kon ano ang matabo sa palaabuton. Si Jesus nagsiling: “Kon makita ninyo nga nagakahanabo ini, mahibaluan ninyo nga malapit na ang Ginharian sang Dios.”—Lucas 21:31.

 Ginasugid sang Biblia nga ang Ginharian sang Dios isa ka matuod nga gobierno sa langit kag si Jesucristo ang Hari sini. Gintudluan ni Jesus ang iya mga sumulunod nga ipangamuyo ini nga Ginharian.—Mateo 6:10.

 Kon maggahom na ang Ginharian sang Dios sa duta, siguraduhon sang Dios nga ang mga kalamidad pareho sang mga linog, indi na maghalit sa mga tawo. (Isaias 32:18) Ayuhon man niya ang halit sa pisikal kag emosyon bangod sa mga linog nga nagakatabo subong. (Isaias 65:17; Bugna 21:3, 4) Para sa dugang nga impormasyon, basaha ang artikulo nga “Ano ang Himuon sang Ginharian sang Dios?”