Isa ka bes kada tuig, sa bilog nga kalibutan, ang mga Saksi ni Jehova kag ang minilyon ka tawo nga gin-imbitar nila nagatipon para saulugon ang Memoryal sang kamatayon ni Jesus, base sa sugo niya. (Lucas 22:19) Ini nga okasyon nagabulig sa aton nga makita kon daw ano ka importante ang ginhimo ni Jesus sang ginhatag niya ang iya kabuhi para sa mga tawo. Maintiendihan man naton kon ano ang mangin epekto sang iya sakripisyo sa aton kabuhi subong kag sa palaabuton.—Juan 3:16.

 Naka-attend ka man sa Memoryal sa sini nga tuig ukon wala, paano ka makabenepisyo sa pagsakripisyo ni Jesus sang iya kabuhi? May duha ka importante nga butang nga gintudlo si Jesus nga dapat naton himuon:

1.  1. Kilalaha ang Dios kag si Jesus. Sa pangamuyo ni Jesus sa iya Amay, sia nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.”—Juan 17:3.

2.  2. Himua ang imo mga natun-an. Nagsiling si Jesus nga dapat naton himuon ang iya mga gintudlo. Halimbawa, gintapos ni Jesus ang iya bantog nga Sermon sa Bukid paagi sa pagdayaw sa tanan nga “nagapamati kag nagatuman sang [iya] ginatudlo.” (Lucas 6:46-48) Sa isa pa ka okasyon, nagsiling man sia: “Bangod nahibaluan ninyo ini, malipayon kamo kon himuon ninyo ini.”—Juan 13:17.

 Gusto mo bala nga mas makilala pa gid ang Dios kag si Jesus? Gusto mo bala sang bulig para mahimo mo ang imo natun-an? Ari ang pila ka paagi nga makabulig sa imo.

 Ang amon libre kag interactive nga pagtuon sa Biblia nakabulig sa madamo nga tawo nga matun-an ang Biblia kag masunod ang ginasiling sini.

•   Kadtui ang web page nga Pagtuon sa Biblia nga May Instruktor para mabal-an mo kon paano ini ginahimo.

•   Tan-awa ang video nga Welcome sa Imo Pagtuon sa Biblia para makita mo kon paano ginahimo ang Bible study upod sa mga Saksi ni Jehova.

 Duha ka bes kada semana, ang mga Saksi ni Jehova nagatipon sa lugar nga ginagamit nila sa ila pagsimba, nga ginatawag Kingdom Hall. Sa sini nga mga miting, ginabinagbinag namon ang Biblia kag kon paano namon sundon ang mga ginatudlo sini sa amon kabuhi.

 Ang bisan sin-o puede mag-attend sa sini nga mga miting; pati ang mga indi Saksi. Depende sa sitwasyon sa inyo lugar, puede ka mag-attend sing face-to-face ukon paagi sa videoconference.

•   Tan-awa ang video nga Ano ang Ginahimo sa Kingdom Hall? para may ideya ka kon ano ang ginahimo sa sini nga mga miting.

•   Mangita sang miting malapit sa imo paagi sa pagkadto sa web page nga Miting sa Kongregasyon sang mga Saksi ni Jehova.

 Madamo nga artikulo kag video sa sini nga website ang makabulig sa imo nga matun-an pa gid ang mga panudlo ni Jesus kag kon daw ano ka importante ang pagsakripisyo niya sang iya kabuhi.

 Halimbawa, para mabal-an mo kon ngaa minilyon ka tawo ang puede makabenepisyo sa kamatayon sang isa ka tawo, basaha ang mga artikulo nga “Ginaluwas Kita ni Jesus—Paano?” kag “Ngaa Nag-antos kag Napatay si Jesus?” ukon tan-awa ang video nga Ngaa Napatay si Jesus?