Sa banta mo, magaayo pa bala ang aton sitwasyon sa palaabuton? Bisan pa grabe kabudlay sang aton sitwasyon subong, madamo nga tawo ang nagalaum gihapon nga mangin maayo pa ang aton sitwasyon sa ulihi. Pero may basihan bala ina nga paglaum? Huo. Ang Biblia nagasiling nga makalaum kita nga mangin maayo ang aton sitwasyon sa palaabuton.

•  Ano nga paglaum ang ginasugid sang Biblia?

•  Mapatihan gid bala naton nga matabo ining paglaum nga ginasugid sang Biblia?

•  Paano matabo ang mga butang nga aton ginalauman?

•  San-o matabo ang mga butang nga aton ginalauman?

•  Ano ang mabulig sa aton sang paglaum nga ginasugid sang Biblia?

 Ang Biblia nagasiling nga madamo gid sing problema nga ginaatubang ang mga tawo. Pero nagpromisa man ang Biblia nga ini nga mga problema dulaon sa ulihi. Binagbinaga ang pila ka halimbawa.

•   Problema: Wala sing ilistaran

   Ang ginasiling sang Biblia: “Magapatindog sila sing balay kag magapuyo [ukon magaistar] sa sini.”—Isaias 65:21.

   Ang matabo sa palaabuton: Ang tanan nga tawo may kaugalingon na nga balay.

•   Problema: Kapigaduhon kag wala sing trabaho

   Ang ginasiling sang Biblia: “Ang akon mga pinili magakalipay sa binuhatan sang ila kamot.”—Isaias 65:22.

   Ang matabo sa palaabuton: Ang tanan nga tawo may makalilipay na nga trabaho kag manamian sila sa sini kay mabatyagan nila nga may pulos ang ila ginahimo.

•   Problema: Inhustisya ukon wala sing katarungan

   Ang ginasiling sang Biblia: “Ang mga prinsipe magagahom para sa katarungan.”—Isaias 32:1.

   Ang matabo sa palaabuton: Wala na sing inhustisya bangod sa rasa, posisyon, kag kahimtangan sa pangabuhi. Mangin palareho na ang pagtratar sa tanan.

•   Problema: Malnutrisyon kag gutom

   Ang ginasiling sang Biblia: “Mangin bugana ang mga uyas sa duta; sa putukputukan sang kabukiran magahapayhapay ini.”—Salmo 72:16.

   Ang matabo sa palaabuton: Ang tanan nga tawo makapaayaw na sa pagkaon sang masustansia nga pagkaon. Wala na sing tawo nga magatulog nga gutom ukon mag-antos bangod sa malnutrisyon.

•   Problema: Krimen kag pagpamintas

   Ang ginasiling sang Biblia: “Magapungko ang kada isa sa ila sa idalom sang ila puno sang ubas kag sa idalom sang ila kahoy nga higuera, kag wala sing magapahadlok sa ila.”—Miqueas 4:4.

   Ang matabo sa palaabuton: Ang kada isa wala na sing kahadlukan kay wala na sang malain nga tawo nga magahalit sa ila, kag “ang mga matarong magapanubli sang duta.”—Salmo 37:10, 29.

•   Problema: Inaway

   Ang ginasiling sang Biblia: “Ang pungsod indi na makig-away sa iban nga pungsod, indi na sila magtuon sa pagpakig-away.”—Isaias 2:4.

   Ang matabo sa palaabuton: May paghidait na sa bug-os nga duta. (Salmo 72:7) Wala na sing magakasubo kay napatay ang ila pinalangga bangod sa inaway ukon magapalagyo sa iban nga lugar bangod sa inaway.

•   Problema: Balatian

   Ang ginasiling sang Biblia: “Wala sing pumuluyo nga magasiling: ‘Nagamasakit ako.’”—Isaias 33:24.

   Ang matabo sa palaabuton: Ang mga tawo indi na mag-antos bangod sa diperensia sa lawas kag indi naman magmasakit. (Isaias 35:5, 6) Ang Biblia nagapromisa pa gani nga “wala na sing kamatayon.”—Bugna 21:4.

•   Problema: Pagkaguba sang palibot

   Ang ginasiling sang Biblia: “Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—Isaias 35:1.

   Ang matabo sa palaabuton: Mangin paraiso na ang bug-os nga duta para istaran sang mga tawo, kay amo ina ang tuyo sang Dios halin sa umpisa.—Genesis 2:15; Isaias 45:18.

 Natural lang nga daw indi ini mapatihan. Pero ginapalig-on ka namon nga tun-i pa gid ang ginasiling sang Biblia parte sa palaabuton. Ngaa? Ang mga promisa sa Biblia lain gid sa mga promisa kag mga prediksion sang mga tawo. Kay man, ang mga promisa nga mabasa sa Biblia ginpromisa sang Dios. Ari ang mga rason kon ngaa makapati kita nga tumanon sang Dios ang iya mga promisa:

•   Ang Dios masaligan. Ang Biblia nagasiling nga ang Dios “indi makabutig.” (Tito 1:2) Dugang pa, ang Dios lang ang may ikasarang nga mabal-an ang palaabuton. (Isaias 46:10) Mabasa sa Biblia ang madamo nga halimbawa sang gintagna sang Dios nga natuman. Para sa dugang nga impormasyon, tan-awa ang video nga Ngaa Makasiguro Kita nga Husto ang Ginasiling sang Biblia?

•   Ang Dios may gahom sa pagsolbar sang aton mga problema. Ang Biblia nagasiling nga ang Dios may gahom para himuon “ang tanan nga luyag niya.” (Salmo 135:5, 6) Buot silingon, wala sing makapugong sa Dios nga tumanon ang iya mga promisa. Dugang pa, bangod palangga kita sang Dios, gusto gid niya nga buligan kita.—Juan 3:16.

 Pero mahimo magpalibog ka, ‘Kon gusto sang Dios nga buligan kita kag kon may gahom sia nga himuon ini, ngaa madamo kita gihapon sang mga problema?’ Para masabat ina nga pamangkot, tan-awa ang video nga Ngaa Ginapasugtan sang Dios ang Pag-antos?

 Gamiton sang Dios ang iya Ginharian, ukon gobierno sa langit, para tumanon ang iya mga promisa. Gintangdo niya si Jesucristo bilang Hari sina nga Ginharian, kag ginhatagan niya sia sing responsibilidad nga atipanon ang duta kag ang mga tawo. Sang ari si Jesus sa duta, gin-ayo niya ang nagamasakit, ginpakaon ang ginagutom, ginpakalma ang malain nga tiempo, kag ginbanhaw pa gani niya ang patay. (Marcos 4:39; 6:41-44; Lucas 4:40; Juan 11:43, 44) Paagi sa sini, ginpakita ni Jesus kon ano ang iya himuon bilang Hari sang Ginharian sang Dios.

 Kon gusto mo mabal-an kon ano nga benepisyo ang mabaton mo paagi sa Ginharian sang Dios, tan-awa ang video nga Ano ang Ginharian sang Dios?

 Dali na lang! Ngaa masiling naton ini? Kay gintagna sang Biblia ang mga hitabo nga mangin tanda nga malapit na lang maggahom ang Ginharian sang Dios sa bilog nga duta. (Lucas 21:10, 11) Kag makita naton nga nagakatabo na ini sa aton panahon subong.

 Para sa dugang nga impormasyon, basaha ang artikulo nga “San-o Magagahom sa Duta ang Ginharian sang Dios?”

 Ang isa ka manunulat sang Biblia nagsiling nga ang paglaum nga ginasugid sang Biblia daw pareho sang “angkla para sa kalag.” (Hebreo 6:19) Kon may bagyo, ang angkla nagabulig sa isa ka barko nga indi maanod palayo. Sing kaanggid, ang masaligan nga paglaum nga ginasugid sang Biblia, makabulig sa aton nga mabatas ang aton mga problema subong. Ang aton paglaum makabulig man sa aton nga mangin kalmado, mangin malipayon, kag makapamensar sing maayo, kag makabulig pa gani ini para mangin mapagros kita.—1 Tesalonica 5:8.