Ang mga balita napuno na sang mga report sang mga tawo nga nagahambal sang malain ukon nagapamintas sa iban bangod sang inhustisya, sang mga tawo nga nagapakalain sa iban bangod lain ang ila ginhalinan, kag sang inaway.

•   “Subong, mas madamo na nga tawo ang nagapakalain sa iban sa social media bangod sa nagakatabo nga inaway sa Israel kag Gaza, kag bangod sang mga tawo nga gusto gid sang kapintas kag pagdinumtanay.”—The New York Times, Nobiembre 15, 2023.

•   “Halin sang Oktubre 7, mas nagdamo pa gid ang mga tawo nga nagadumtanay kag nagapamintas bangod sang inhustisya.”—Dennis Francis, presidente sang United Nations General Assembly, Nobiembre 3, 2023.

 Ang pagpakalain sa iban, kapintas, kag inaway nagakatabo na halin sang una. Ang matuod, ginasugid sang Biblia nga sang una may mga tawo nga ‘nagapuntariya sang ila masakit nga mga pulong kaangay sang mga baslay’ kag nagaentra sa inaway kag nagapamintas. (Salmo 64:3; 120:7; 140:1) Pero ginasugid sang Biblia nga ang pagdumtanay subong may ara sang importante nga kahulugan.

 Ginasugid sang Biblia ang duha ka rason kon ngaa lapnag ang pagdumtanay subong.

1.  1. Ini nagasugid sang tion nga “ang gugma sang madamo nga tawo magabugnaw.” (Mateo 24:12) Imbes nga maghigugmaanay, madamo nga tawo ang magadumot sa isa kag isa.—2 Timoteo 3:1-5.

2.  2. Ang grabe nga pagdumtanay sa kalibutan subong resulta sang malain nga impluwensia ni Satanas nga Yawa. Ang Biblia nagasiling nga “ang bug-os nga kalibutan yara sa gahom sang isa nga malauton.”—1 Juan 5:19; Bugna 12:9, 12.

 Pero, ginasugid man sang Biblia nga sa indi madugay dulaon na sang Dios ang tanan nga rason sang pagdumtanay. Kag ayuhon man niya ang tanan nga kasakit nga resulta sang pagdinumtanay. Nagapromisa ang Biblia:

•   “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.