Sang Hulyo 2022, natabo ang daw indi mapatihan nga pagpamatay paagi sa pusil sa sarisari nga lugar sa bilog nga kalibutan:

•   “Ang pagpatay sa kilala gid nga pulitiko sa Japan [ang prime minister anay nga si Shinzo Abe] nagpakibot sa bilog nga pungsod kag ginbalita gid sa bilog nga kalibutan. Daw indi ini mapatihan kay sa sini nga pungsod, talagsa lang nagakatabo ang mapintas nga krimen kag may estrikto ini nga kasuguan parte sa pagpanag-iya sang pusil.”—Hulyo 10, 2022, The Japan Times.

•   “Ang mga tawo sa Denmark daw indi makapati sang may lalaki nga nagpaniro sa isa ka shopping mall kag tatlo ang napatay.”—Hulyo 4, 2022, Reuters.

•   “South Africa: 15 ang napatay bangod sang pagpaniro sang mga lalaki sa isa ka bar sa banwa sang Soweto.”—Hulyo 10, 2022, The Guardian.

•   “Sobra 220 ang natiruhan kag napatay sa U.S. sang Hulyo 4 nga holiday.”—Hulyo 5, 2022, CBS News.

 May paglaum pa bala nga madula ang pagpamintas? Ano ang ginasiling sang Biblia?

 Ginatawag sang Biblia ang aton panahon nga “katapusan nga mga adlaw,” sa diin ang mga tawo mangin mabangis, mapintas, kag wala sing kaluoy. (2 Timoteo 3:1, 3) Bangod sini, nagakahadlok ang mga tawo. (Lucas 21:11) Pero nagpromisa ang Biblia nga magaabot ang tion nga dulaon na ang kapintas kag “ang katawhan magapuyo sa malinong nga puluy-an, sa mga balay nga may kalig-unan kag sa mga palahuwayan nga matawhay.” (Isaias 32:18) Paano madula ang kapintas?

 Dulaon sang Dios ang malain nga mga tawo kag gub-on niya ang tanan nga armas.

•   “Apang ang mga malauton utdon sa duta.”—Hulubaton 2:22.

•   “Ginapauntat [sang Dios] ang mga inaway sa bug-os nga duta. Ginabali niya ang pana kag ginautod ang bangkaw; ginasunog niya ang mga kangga sang mga hangaway.”—Salmo 46:9.

 Dulaon sang Dios ang tanan nga kabangdanan sang kapintas paagi sa pagtudlo sa mga tawo kon paano magkabuhi nga may paghidait.

•   “Indi sila manghalit ukon mangguba sa bug-os ko nga balaan nga bukid, bangod ang duta mapuno sang ihibalo tuhoy kay Jehova kaangay sang tubig nga nagahil-ob sa dagat.”—Isaias 11:9.

•   Bisan subong pa lang, ginatudluan sang Dios ang mga tawo sa bilog nga kalibutan nga indi magpamintas kag indi maggamit sang mga armas, kundi “salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas.”—Miqueas 4:3.

 Para sa dugang nga impormasyon parte sa promisa sang Biblia nga kalibutan nga wala na sing kahadlukan ang mga tawo, basaha ang artikulo nga “Freedom From Fear—Is It Possible?”

 Para sa dugang nga impormasyon parte sa kon paano permanente nga madula ang kapintas, basaha ang artikulo nga “Paghidait sa Duta sa Katapusan!”