Para sa madamo, ang palareho nga pagtrato sa tanan nga rasa sang tawo daw damgo lang nga wala gihapon natabo.

•   “Sa bilog nga kalibutan, ang diskriminasyon sa rasa daw hilo nga nagahalit sa mga organisasyon kag mga komunidad, kag sa adlaw-adlaw nga kabuhi sang ordinaryo nga mga tawo. Ang diskriminasyon sa rasa amo gihapon ang panguna nga rason kon ngaa indi palareho ang pagtrato sang mga tawo sa isa kag isa.”—António Guterres, UN Secretary-General.

 Maabot bala ang tion nga mangin palareho ang pagtrato sa tanan nga rasa sang tawo? Ano ang ginasiling sang Biblia?

 Ginatudluan kita sang Biblia kon ano ang pagtan-aw sang Dios sa sarisari nga rasa sang tawo.

•   “Ginhimo [sang Dios] halin sa isa ka tawo ang tagsa ka pungsod sang mga tawo, agod mag-istar sa bug-os nga duta.”—Binuhatan 17:26.

•   “Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.”—Binuhatan 10:34, 35.

 Ginatudlo sang Biblia nga ang tanan nga tawo bahin sang isa ka pamilya kag ginabaton sang Dios ang tanan nga tawo bisan ano man ang rasa.

 Matabo ina sa paggahom sang Ginharian sang Dios, nga isa ka gobierno sa langit. Tudluan sina nga gobierno ang mga tawo kon ano ang insakto nga paagi sa pagtrato sa iban. Matun-an sang mga tawo nga dulaon ang bisan ano nga diskriminasyon sa rasa nga mahimo nabatyagan nila.

•   “Ang mga pumuluyo sini [magatuon] sang pagkamatarong.”—Isaias 26:9.

•   “Ang resulta sang matuod nga pagkamatarong paghidait, kag wala sing katapusan nga kalinong kag kalig-unan.”—Isaias 32:17.

 Subong, minilyon ka tawo ang nagatuon sa Biblia kon paano respetuhon kag pakitaan sang dignidad ang iban.

•   Para sa dugang nga impormasyon, basaha ang isyu sang Magmata! nga magasin nga may tig-ulo “Madula Pa Bala ang Diskriminasyon?”

•   Para sa dugang nga impormasyon kon paano istoryahan sang mga ginikanan ini nga topiko sa ila balay, basaha ang artikulo nga “Pag-istorya sa mga Bata Parte sa Diskriminasyon sa Rasa.”