PADAYON NGA MAGBANTAY!

Ano ang Ginasiling sang Biblia Parte sa Relihion kag sa Inaway sa Ukraine?

I-PLAY

Binagbinaga ang masunod nga impormasyon parte sa kilala nga mga lider sang relihion kag sa inaway sa Ukraine:

“Ang lider sang Russian Orthodox Church, nga si Patriarch Kirill, wala gid sing may ginsiling nga nagapakita nga kontra sia sa pagpang-atake sang Russia. . . . Ang iya Simbahan padayon nga nagapalapnag sang indi matuod nga mga impormasyon parte sa Ukraine, kag amo ini ang ginrason ni Putin sa iya ginhimo nga pag-atake.”—EUobserver, Marso 7, 2022.
“Si Patriarch Kirill . . . nagpanindugan gid nga nagakabagay lang nga gin-atake sang iya pungsod ang Ukraine, kay suno sa iya ini nga inaway isa ka paagi para mabatuan ang sala.”—AP News, Marso 8, 2022.
“Sang Lunes, gin-blessingan sang lider sang Ukrainian Orthodox Church, nga si Metropolitan Epiphanius I sang Kyiv, ang iya mga miembro nga ‘magbato sa nagasalakay nga mga Russian’ . . . Nagsiling pa [sia] nga ang pagpatay sa mga soldado sang Russia indi sala.”—Jerusalem Post, Marso 16, 2022.
“Ginasuportahan namon [Ukrainian Council of Churches and Religious Organizations (UCCRO)] ang Armed Forces sang Ukraine kag ang tanan nga nagapakig-away para sa amon pungsod. Gina-blessingan namon ang ila mga panikasog nga depensahan ang Ukraine sa mga kaaway kag ginapangamuyo namon sila.”—UCCRO a Statement, Pebrero 24, 2022.

Ano sa banta mo? Nagakabagay bala nga ang mga relihion nga nagasiling nga ginasunod nila si Jesucristo magsuporta sa ila mga miembro nga nagaentra sa inaway? Ano ang ginasiling sang Biblia?

Ang papel sang relihion sa inaway halin sang una

Ginapakita sang kasaysayan nga ang relihion pirme nagasiling nga ginasuportahan sini ang paghidait. Pero nagasiling man ini nga indi sala mag-entra sa inaway, nga maayo mag-entra sa inaway, ukon kinahanglan pa gani mag-entra sa inaway. Sa sulod na sang madamo nga tinuig, ginbuligan sang mga Saksi ni Jehova ang mga tawo nga makita ini nga pagpakunokuno. Binagbinaga ang pila ka halimbawa sa amon mga publikasyon.

Mabasa sa artikulo nga “Ang mga Krusada—Isa ka ‘Makahalanusbo nga Dalamguhanon’” kon paano ang Roman Catholic Church amo ang responsable sa mga pagmasaker nga ginhimo sa ngalan sang Dios kag sang Cristo.
Ginasugid sang artikulo nga “The Catholic Church in Africa” nga wala ginpunggan sang relihion ang inaway sang mga tribo, pati ang genocide ukon pag-ubos sang isa ka rasa.
Ginapaathag sang mga artikulo nga “Relihion Bala ang Balasulon?,” “Religion’s Role in Man’s Wars,” kag “Religion Takes Sides” kon paano ginsuportahan sang mga klero sang Katoliko, Orthodox, kag Protestante ang mga soldado sang magtimbang nga bahin sa madamo nga mga inaway.

Dapat bala magsuportar sa inaway ang mga relihion nga nagasiling nga Cristiano sila?

Ang gintudlo ni Jesus: “Higugmaa ang imo isigkatawo subong sang imo kaugalingon.” (Mateo 22:39) “Padayon nga higugmaa ang inyo mga kaaway.”—Mateo 5:44-47.

Binagbinaga ini: Ang isa bala ka relihion makasiling nga ginasunod sini ang sugo ni Jesus parte sa gugma kon ginasuportahan nila ang ila mga miembro nga magpamatay sa inaway? Para sa sabat, basaha ang mga artikulo nga “True Christians and War” kag “Posible Bala nga Higugmaon sang Isa ang Iya Kaaway?”

Ang ginsiling ni Jesus: “Ang akon Ginharian indi bahin sini nga kalibutan. Kon ang akon Ginharian bahin sini nga kalibutan, ang akon mga alagad nakig-away kuntani agod indi ako madakop.” (Juan 18:36) “Ang tanan nga nagagamit sang espada mapatay sa espada.”—Mateo 26:47-52.

Binagbinaga ini: Kon ang mga Cristiano indi gani magpakig-away para proteksionan si Jesus, dapat bala sila mag-entra sa inaway bangod sang iban nga rason? Basaha ang artikulo nga “Puede Bala Mag-entra sa Inaway ang mga Cristiano?” para mabal-an mo kon paano ginsunod sang una nga mga Cristiano ang halimbawa kag ang mga gintudlo ni Jesus.

Ano ang matabo sa mga relihion nga nagasuporta sa inaway?

Ginatudlo sang Biblia nga indi pagkilalahon sang Dios ang mga relihion nga nagasiling nga ginarepresentar nila si Jesus pero wala nila ginasunod ang iya mga ginatudlo.—Mateo 7:21-23; Tito 1:16.

Suno sa libro sang Bugna, sukton sang Dios ini nga mga relihion sa kamatayon “sang tanan nga ginpatay sa duta.” (Bugna 18:21, 24) Para mahibaluan mo kon ngaa, basaha ang artikulo nga “Ano ang Babilonia nga Daku?”
Ginapakita sa ginsiling ni Jesus nga ang tanan nga relihion nga wala ginakilala sang Dios laglagon ukon dulaon bangod sang mga ginahimo nila nga malain. Pareho sila sa malain nga kahoy nga malain man ang bunga nga “ginapulod kag ginadap-ong sa kalayo.” (Mateo 7:15-20) Basaha ang artikulo nga “Malapit Na ang Kalaglagan sang Butig nga Relihion!” para mabal-an mo kon paano ini matabo.

Indi Pareho sa Iban nga Relihion ang mga Saksi ni Jehova

Sa Russia kag sa Ukraine, kag sa bilog nga kalibutan, ginatuman sang mga Saksi ni Jehova ang mga sugo ni Jesus nga mangin neutral sa pulitika kag indi mag-entra sa inaway. Amo ini ang rason kon ngaa wala kami nagaentra ukon nagasuporta sa sini nga inaway ukon sa bisan ano nga inaway. Bangod ginasunod gid namon ang ginasiling sang Biblia, may mga Saksi nga ginahingabot. (Juan 15:19, 20; 2 Timoteo 3:12) Halimbawa, madamo nga Saksi ang ginpriso kag ang iban pa gani gin-torture sang gobierno sang Russia. Ginkumpiskar man sang gobierno ang amon mga bilding kag mga propiedad nga ginagamit sa pagsimba. Para sa dugang nga impormasyon, buksi ang www.jw-russia.org.

Tan-awa ang apat ka minuto nga video nga Nagpabilin nga Matutom ang mga Saksi ni Jehova sa Irkutsk Bisan Pa nga Mapintas Sila nga Gin-raid sa Ila mga Puluy-an para makita mo kon paano ginahingabot ang mga Saksi ni Jehova sa Russia bangod sa ila pagtuo.
Halin pa sang una kilala gid ang mga Saksi ni Jehova bangod neutral sila. Tan-awa ang video nga Malig-on Bisan Pa May Pagpamatok para makita mo kon paano sila padayon nga nangin neutral bisan sang grabe nga paghingabot sang Nazi Germany kag sang Soviet Union sadto.

Palihug buksi ang amon website para mabal-an mo ang dugang nga impormasyon parte sa amon mga pagpati, lakip ang mga promisa sang Biblia parte sa palaabuton nga wala na sing inaway. (Isaias 2:4; Jeremias 29:11) Puede mo kami kontakon para sa dugang nga impormasyon.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Ang UCCRO, ukon ang Ukrainian Council of Churches and Religious Organizations, nagalakip sang 15 ka relihion nga nagarepresentar sang mga sekta sang Orthodox, Greek kag Roman Catholic, Protestante, kag sang Evangelical, pati man sang Judiyo kag mga Muslim.